ಸ್ವಿಟ್ಝರ್‌ಲ್ಯಾಂಡ್

ಸ್ವಿಟ್ಸರ್‍’ಲ್ಯಾಂಡ್ (ಸ್ವಿಟ್ಝರ್'ಲ್ಯಾಂಡ್, Switzerland, Confederatio Helevtica, CH). ಯುರೋಪ್ ಖಂಡದ ಕೇಂದ್ರ ಭಾಗೊಡು, ಗಿರಿಪರ‍್ವತೊಲು, ಸುದೆಕುಲು ಮಲ್ಲ ಮಲ್ಲ ಕೆದುಕೆಲು ಕೂಡ್ದಿನ, ಪಚ್ಚ ಪರಿಸರೊತ ನಡುಟು ಉಪ್ಪುನ,  ಅಂಚನೆ  ಪ್ರಪಂಚದ ಸಮಶೀತೋಷ್ಣ ವಲಯೊಗು ಸೇರ‍್ದಿನ, ಒಂಜಿ ಎಲ್ಯ ದೇಶ: ಸ್ವಿಟ್ಸರ್‍’ಲ್ಯಾಂಡ್. ಪ್ರಬಲವಾದ್ ಬುಳೆತಿನ ವಿಶಿಷ್ಟ ಬ್ಯಾಂಕಿಂಗ್ ಉದ್ಯಮದ ಕಾರಣವಾದ್ ಅಂಚನೆ ಸ್ವಛ್ಚವಾಯಿನ ಆರ್ಥಿಕ ನಿರ‍್ವಹಣೆಡ್ ಜಗತ್ತ್’ಡ್ ಮುಂಚೂಣಿಡ್ ಉಪ್ಪುನ ದೇಶ. ಅಂಚನೆ, ಸ್ವಿಟ್ಸರ್‍’ಲ್ಯಾಂಡ್ ದೇಶ ಊಂಚಿದ ಕೈಗಡಿಯಾರ (ವಾಚ್) ಬೊಕ ಚಾಕಲೇಟ್ ಉದ್ಯಮೊಲೆಗ್ ಜಾಗತಿಕ ಮನ್ನಣೆ ಪಡೊವೊಂದುಂಡು.

“ಕಾನ್ಫೆಡೊರೇಶಿಯೊ ಹೆಲ್ವೆಟಿಕಾ”

ಸ್ವಿಟ್ಸರ್‍’ಲ್ಯಾಂಡ್ ದೇಶದ ಪರ‍್ಯಾಯ ನಾಮ “ಕಾನ್ಫೆಡೊರೇಶಿಯೊ ಹೆಲ್ವೆಟಿಕಾ” ಇನ್ನಗ ಹೆಲ್ವೆಟಿಕಾ ಒಕ್ಕೂಟೊಲು ಇಂದ್ ಅರ್ಥ. “ಹೆಲ್ವೆಟಿಕಾ” ಇನ್ಪಿನವು ಸ್ವಿಟ್ಸರ್‍’ಲ್ಯಾಂಡ್ ದೇಶದ ಲ್ಯಾಟೀನ್ ಭಾಷೆದ ಪುರಾತನ ಪುದರ್. ಕಾನ್ಫೆಡೊರೇಶಿಯೊ ಹೆಲ್ವೆಟಿಕಾ (CH) ಇನ್ಪಿನೆನೆ ದೇಶದ ಅಧಿಕೃತ ಪುದರಾದ್ ಬಳಕೆ ಮಲ್ತೊಂದು ಉಲ್ಲೆರ್. ಆಯಿನೆಡ್ದಾವರಾ, ಸ್ವಿಟ್ಸರ್‍’ಲ್ಯಾಂಡ್ ದೇಶದ ಅಂಚೆ ಸಂಕೇತ ಅಂಚನೆ ಅಂತರಜಾಲದ ದೇಶ ಸಂಕೇತ : .CH. ಆದುಂಡು.

ರಾಜಧಾನಿ

ಸ್ವಿಟ್ಸರ್‍’ಲ್ಯಾಂಡ್  ಒಕ್ಕೂಟದ ರಾಜಧಾನಿ ಬೆರ್ನ್(Bern,Berne) .

ರಾಷ್ಟ್ರಧ್ವಜ

ಸ್ವಿಟ್ಸರ್‍’ಲ್ಯಾಂಡ್ ದೇಶದ ರಾಷ್ಟ್ರಧ್ವಜ ಕೆಂಪು ಮೆಯಿಟ್ ಬೊಲ್ದುದ ಕತ್ತೆರಿ (ಕ್ರಾಸ್, ) ಚಿಹ್ನೆ ಆದುಂಡು.

ಪಣವು

ಸ್ವಿಟ್ಸರ್‍’ಲ್ಯಾಂಡ್ ದೇಶದ ಪಣವು ಸ್ವಿಸ್ ಫ್ರಾಂಕ್. ಅಯಿತ ಸಂಕೇತ ಕೂಡಾ: CHF. ಇತ್ತೆ (ಮೇ ೨೦೧೮) ಒಂಜಿ ಸ್ವಿಸ್ ಸ್ವಿಸ್ ಫ್ರಾಂಕ್'ಗ್ ವಿನಿಮಯ ಬಿಲೆ ೬೮ ರೂಪಾಯಿ ಆಪುಂಡು. ಅತ್ತಾಂದೆ ಯೂರೋಪ್ ಒಕ್ಕೂಟದ ಯೂರೊ (Euro) ಪಣವುಲಾ ಈ ದೇಶೊಡು ನಡಪುಂಡು. ಇತ್ತೆ (ಮೇ ೨೦೧೮) ಒಂಜಿ ಯೂರೊದ ವಿನಿಮಯ ಬಿಲೆ ೮೦ ರೂಪಾಯಿ ಆದುಂಡು.

ವಿಸ್ತೀರ್ಣ ಬೊಕ ಜನಸಂಖ್ಯೆ

ಸ್ವಿಟ್ಸರ್‍’ಲ್ಯಾಂಡ್ ದೇಶದ ಒಟ್ಟು ವಿಸ್ತೀರ್ಣ ೪೧,೨೮೫ ಚದರ ಕಿಲೊಮೀಟರುಲು. ಅಯಿಟ್ ಸುದೆ-ಕೆದು-ಗಿರಿಕುಲೆನ್ ಬುಡುಂಡ ನೆಲ ಭಾಗದ ವಿಸ್ತೀರ್ಣ ೩೯,೫೧೬ ಚದರ ಕಿಲೊಮೀಟರುಲು. ಸ್ವಿಟ್ಸರ್‍’ಲ್ಯಾಂಡ್ ದೇಶದ ೨೦೧೮ನೆ ಇಸವಿದ ಜನಸಂಖ್ಯೆ ಅಂದಾಜಿ ೮.೫೪ ಮಿಲಿಯನ್.

ಭೌಗೋಳಿಕ ವಿಶೇಷೊಲು

ಸ್ವಿಟ್ಸರ್‍’ಲ್ಯಾಂಡ್  ದೇಶದ ೨೦% ಭಾಗ ಆಲ್ಪ್’ಸ್ (Alps) ಇನ್ಪಿನ  ಪರ್ವತ ಶ್ರೇಣಿಡ್ ಮುಚ್ಚಿದ್ ಪೋತುಂಡು. ಆಲ್ಪ್’ಸ್ ಪರ್ವತ ಶ್ರೇಣಿ ಹಿಮಾಲಯ ಪರ್ವತ ಶ್ರೇಣಿದ ಪಡ್ಡಾಯಿ ದಿಕ್ಕ್’ಡ್  ದುಂಬರಿಯಿನ ಭಾಗೊ. ಆಲ್ಪ್’ಸ್ ಪರ್ವತ ಶ್ರೇಣಿಡ್  ಸರಾಸರಿ ಸಮುದ್ರ ಮಟ್ಟೊರ್ದು ೪,೦೦೦ ಮೀಟರುರ್ದು  ಎಚ್ಚ ಎತ್ತರ ಉಪ್ಪುನ  ಕನಿಷ್ಟ ೧೦೦ ಪರ್ವತ ಶಿಖರೊಲು ಉಲ್ಲಾ. ಆಲ್ಪ್’ಸ್ ಪರ್ವತೊಲೆರ್ದ್ ಪ್ರಸ್ಥ ಭೂಮಿಗ್  ಪರತೊಂದು ಬರ್ಪಿನ ಸುದೆಕುಲು ಅಲ್ಪಲ್ಪ ಕಟ್ದ್ ಪಾಡ್ದಿಲೆಕ್ಕ ಆದಿತ್ತದ್ ಪೊರ‍್ಲುದ ಕೆದುಕುಲಾದ್ ಸ್ವಿಟ್ಸರ್‍’ಲ್ಯಾಂಡ್  ದೇಶದ ಅಮೂಲ್ಯ ಜಲಮೂಲೊಲಾದ್ ಉಲ್ಲಾ. ಆಲ್ಪ್’ಸ್ ಪರ್ವತ ಶ್ರೇಣಿ ಅತ್ತಾಂದೆ, ಸ್ವಿಟ್ಸರ್‍’ಲ್ಯಾಂಡ್  ದೇಶದ ಕೆಲವು ಭಾಗೊಲೆಡ್ ಜೂರಾ (Jura) ಪರ್ವತೊಲುಲಾ ತೋಜಿದ್ ಬರ್ಪಾ. ಸ್ವಿಟ್ಸರ್‍’ಲ್ಯಾಂಡ್ ದೇಶದ ಅತಿ ಎತ್ತರದ ಬಿಂದು ಮಾಂಟೆ ರೋಸಾ (Monte Rosa) ಪರ್ವತ ಶಿಖರ:‍ ಸಮುದ್ರ ಮಟ್ಟೊರ್ದು  ೪,೬೩೪ ಮೀಟರ್ ಎತ್ತರೊಡು ಉಂಡು. ಅಂಚನೆ ಅತಿ ತಿರ್ತ್’ದ (ತಗ್ಗ್‘ದ) ಬಿಂದು ಮೆಗ್ಗಿಯೋರೆ ಕೆದು (Lake Maggiore); ಸಮುದ್ರ ಮಟ್ಟೊರ್ದು  ೧೯೩ ಮೀಟರ್ ಎತ್ತರೊಡು ಉಂಡು.

ಮುಖ್ಯನಗರೊಲು

ಜ್ಯೂರಿಕ್, ಜಿನೇವಾ, ಬೆರ್ನ್,ಬಾಸೆಲ್, ಲ್ಯೂಸರ್ನ್ ಇತ್ಯಾದಿ.