ಅದೃತಿ ಲಕ್ಷ್ಮೀಬಾಯಿ

ಅದೃತಿ ಲಕ್ಷ್ಮೀಬಾಯಿ ಪುಟ್ಟು ದಿನಿ 12 ಅಕ್ಟೋಬರ್ 1899ಕ್ . ಆರ್ ಒರ್ತಿ ಭಾರತೀಯ ಸ್ವಾತಂತ್ರ್ಯ ಚಳವಳಿದ ಕಾರ್ಯಕರ್ತೆ ಬೊಕ್ಕ ರಾಜಕಾರಿಣಿ. ಲಕ್ಷ್ಮೀಬಾಯಿ ಕೊಲ್ಕತ್ತಾದ ದಯಾಸಿಶಿಯನ್ ಕಾಲೇಜುಡು ಪದವಿ ಪಡೆಯೆರ್ ಬೊಕ್ಕ ವೆಲ್ಲೂರುದ ಕ್ರಿಶ್ಚಿಯನ್ ಮೆಡಿಕಲ್ ಕಾಲೇಜುಡು ವೈದ್ಯಕೀಯ ಅಧ್ಯಯನೊಕ್ ಸೇರಿಯೆರ್. ಅದೃತಿ ಲಕ್ಷ್ಮೀಬಾಯಿ 1937 ಬೊಕ್ಕ 1946ಟ್ ಬೆರ್ಹಾಂಪುರ ಕ್ಷೇತ್ರೊಡು ಚುನಾಯಿತರಾಯೆರ್ ಬೊಕ್ಕ 1946ಡ್ ಒರಿಸ್ಸಾ ಪಂದ್ ಲೆಪ್ಪುನ ಒಡಿಶಾ ವಿಧಾನಸಭೆತ ಉಪ ಸ್ಪೀಕರ್ ಆದ್ ಸೇವೆ ಸಲ್ಲಿಸಾಯೇರ್. ಲಕ್ಷ್ಮೀಬಾಯಿ ಆರ್ ಒಡಿಶಾಡ್ ಪೊಣ್ಣು ಜೋಕುಲೆಗ್ ಉಚಿತೊ ಶಿಕ್ಷಣೊದ ನೀತಿನ್ ಪರಿಚಯ ಮಂತು ಕೊರಿಯೆರ್.

ಆರಂಭಿಕೊ ಜೀವನೊ, ಶಿಕ್ಷಣೊ ಬೊಕ್ಕ ವೈವಾಹಿಕ ಜೀವನೊ

ಲಕ್ಷ್ಮೀಬಾಯಿ 1899 ಅಕ್ಟೋಬರ್ 12 ಕ್ ಬರ್ಹಾಂಪುರಡ್ ತೆಲುಗು ನಿಯೋಗಿ ಬ್ರಾಹ್ಮೊಣ ಕುಟುಂಬೊಡು ವರಾಹಗಿರಿ ವೆಂಕಟ ಜೋಗಯ್ಯ ಪಂತುಲು (ಪೊಪ್ಪ) ಬೊಕ್ಕ ವರಾಹಗಿರಿ ಸುಭದ್ರಮ್ಮ (ಅಮ್ಮ) ದಂಪತಿಗ್ ಜನಿಸಿಯೆರ್. ಆರ್ ಭಾರತೊದ ರಾಷ್ಟ್ರಪತಿ ವಿ.ವಿ.ಗಿರಿನ ಕಿನ್ಯ ಮೆಗ್ದಿ. ಲಕ್ಷ್ಮೀಬಾಯಿ ತನ್ನ ಮಾಧ್ಯಮಿಕ ಶಿಕ್ಷೊಣನ್ ಬರ್ಹಾಂಪುರಡ್ ಮುಗಿಸಾಯೆರ್. ಬೊಕ್ಕ ಕಾಶಿದ ಥಿಯಾಸಾಫಿಕಲ್ ಸೊಸೈಟಿಗ್ ಸೇರಿಯೆರ್. ಆರ್ ಕೊಲ್ಕತ್ತಾದ ದಯಾಸಿಶಿಯನ್ ಕಾಲೇಜುಡ್ದು ಪದವಿ ಪಡೆಯೆರ್ ಬೊಕ್ಕ ವೆಲ್ಲೂರುದ ಕ್ರಿಶ್ಚಿಯನ್ ವೈದ್ಯಕೀಯ ಕಾಲೇಜುಡು ವೈದ್ಯಕೀಯ ಶಿಕ್ಷಣೊನು ಪಡೆಯೆರ್. ಅನಾರೋಗ್ಯದ ಕಾರಣ ಲಕ್ಷ್ಮೀಬಾಯಿ ಅರೆನ ವೈದ್ಯಕೀಯ ಅಧ್ಯಯೊನನ್ ಪೂರ್ಣಗೊಳಿಸಾರೆ ಆಯಿಜಿ,ಬೊಕ್ಕ ಆರ್ ಅಕೆರಿಗ್ ಬೆರ್ಹಾಂಪುರಕ್ ಮರಳಿಯೆರ್. ಆರ್ ಪಿರ ತಿರುಗಿನ ಬೊಕ್ಕ , ಆರ್ ರಾಜಮಂಡ್ರಿದ ಅದ್ರುತಿ ವೆಂಕಟೇಶ್ವರ ರಾವ್ ಅರೆನ್ ಮದಿಮೆ ಆಯೆರ್. ಅರೆನ ಮದಿಮೆ ಆಯಿನ ಒಂಜೇ ವರ್ಷೊಡು ಅರೆನ ಕಂಡನಿ ತೀರುಪೋಯೆರ್ ಬೊಕ್ಕ ಆರ್ ಬೆರ್ಹಾಂಪುರೊತ ಅರೆನ ಅಪ್ಪೆ ಇಲ್ಲಗ್ ಪಿರಾ ಬತ್ತೆರ್.

ಭಾರತದ ಸ್ವಾತಂತ್ರ್ಯೊ ಚಳುವಳಿಡ್ ಮೆರೆನ ಪಾತ್ರೊ

ಕಂಡನಿನ ಮರಣೊದ ಬೊಕ್ಕ , ಲಕ್ಷ್ಮೀಬಾಯಿ ಮಹಾತ್ಮ ಗಾಂಧಿನ ಸ್ಫೂರ್ತಿ ಪಡೆದ್ ಭಾರತೀಯ ಸ್ವಾತಂತ್ರ್ಯ ಚಳುವಳಿಡ್ ಭಾಗವಹಿಸಾಯೆರ್, ಅಯಿಟ್ಲ ಅರೆನ ಕುಟುಂಬೊದ ಮಸ್ತ್ ಸದಸ್ಯೆರು ಅದಾಗ ಚಳುವಳಿದ ಭಾಗಿವಾದ್ ಇತ್ತೆರ್. ಗಾಂಧಿ, ಜವಾಹರಲಾಲ್ ನೆಹರು ಬೊಕ್ಕ ರಾಜೇಂದ್ರ ಪ್ರಸಾದ್ ಅಂಚಿನ ರಾಷ್ಟ್ರೀಯ ನಾಯಕೆರ್ ಬರ್ಹಾಂಪುರ ಜಿಲ್ಲೆಗ್ ಭೇಟಿ ಕೊರ್ನಗ ಗಿರಿ ಅರೆನ ನಿವಾಸೊಡೆ ಉಂತುದು ಇತ್ತೆರ್. ಲಕ್ಷ್ಮೀಬಾಯಿ ವಿದೇಶಿ ವಸ್ತುಲೆನ್ ಬಹಿಷ್ಕಾರ ಮಂಪುನು, ಮದ್ಯದಂಗಡಿದ ಎದುರು ಪಿಕೆಟಿಂಗ್ ಅಂಚಿನ ಪೂರಾ ಚಟುವಟಿಕೆಡ್ ಭಾಗವಹಿಸಾದ್ ಇತ್ತೆರ್. ಈ ಚಟುವಟಿಕೆಲೆಡ್ ಆರ್ ಭಾಗವಹಿಸಿನ ಕಾರಣೊ 18 ಜನವರಿ 1932 ತಾನಿ ಅರೆನ್ ಬಂಧಿಸಾಯೆರ್ . ಛತ್ರಪುರ ನ್ಯಾಯಾಲಯೊ ಅರೆಗ್ ಒಂಜಿ ವರ್ಷೊ ಜೈಲು ಶಿಕ್ಷೆ ಬೊಕ್ಕ 700 ಭಾರತೀಯ ರೂಪಾಯಿದ ದಂಡೊ ವಿಧಿಸಿದುಂಡು ಬೊಕ್ಕ ಅರೆನ್ ವೆಲ್ಲೂರು ಕೇಂದ್ರೊ ಕಾರಾಗೃಹಕ್ ವರ್ಗಾಯಿಸಲಾಂಡ್ ಬೊಕ್ಕ ಒಂಜರೆ ವರ್ಷೊ ಜೈಲು ಶಿಕ್ಷೆನ್ ವಿಧಿಸಾಂಡ್. 1935 ಟ್ ಆರ್ ಗಂಜಾಂನ ಕುಲಾದಡ್ ರಯೋಟ್ಸ್ ಮಹೊಸಭೆತ ಅಧ್ಯಕ್ಷರಾದ್ ಸೇವೆ ಸಲ್ಲಿಸಾಯೆರ್. ಲಕ್ಷ್ಮೀಬಾಯಿ ಖಾದಿ ಚಳವಳಿಡ್ ಪ್ರಮುಖೊ ಕಾರ್ಯಕರ್ತರಾದು ಇತ್ತೆರ್ ಬೊಕ್ಕ ಬಡವರೆಗ್ ಉಚಿತವಾದ್ ಖಾದಿಲೆನ್ ವಿತರಣೆ ಮಂತೆರ್. ಆರ್ 1942 ದ ಕ್ವಿಟ್ ಇಂಡಿಯಾ ಚಳುವಳಿಡ್ ಸಕ್ರಿಯವಾದ್ ಭಾಗವಹಿಸಾದು ಇತ್ತೆರ್. ಭಾರತೊ ಸ್ವಾತಂತ್ರ್ಯನು ಸಾಧಿಸಾನಗ, ಆರ್ ಕಟಕ್‌ನ ಜೈಲುಡು ಶಿಕ್ಷೆನ್ ಅನುಭವಿಸೊಂದು ಇತ್ತೆರ್ , ಅಲ್ಪ ಸ್ವರಾಜ್ ಚಳವಳಿತ ಸಮಯೊಡು ಮಸ್ತ್ ಗಮನಾರ್ಹ ಸ್ವಾತಂತ್ರ್ಯ ಹೋರಾಟಗಾರರೆನ್ ಬಂಧಿಸಾದು ಇತ್ತೆರ್.

ಜನವರಿ 2010 ಕ್ ಒಡಿಶಾದ ಗೌರವಾನ್ವಿತ ಮುಖ್ಯಮಂತ್ರಿ ನವೀನ್ ಪಟ್ನಾಯಕ್ ಆರ್ ಜೈಲುದ ಜಾಗೊಡು ಸ್ವಾತಂತ್ರ್ಯ ಹೋರಾಟಗಾರರೆನ ಸ್ಮಾರಕೊನು ಉದ್ಘಾಟನೆ ಮಂತೆರ್, ಆಂಡಾ, ಅಯಿತ ಅಭಿವೃದ್ಧಿ ಸ್ಥಗಿತ ಆತುಂಡು.

ರಾಜಕೀಯೊಡು ಲಕ್ಷ್ಮೀಬಾಯಿ ಅರೆನ ಪಾತ್ರೊ

ಲಕ್ಷ್ಮೀಬಾಯಿ 1930 ಡ್ದ್ 1940 ಮುಟ್ಟ ಒಡಿಶಾಡ್ ಭಾರತದ ರಾಷ್ಟ್ರೀಯ ಕಾಂಗ್ರೆಸ್‌ದ ಸಕ್ರಿಯ ಸದಸ್ಯರಾದ್ ಸೇವೆ ಸಲ್ಲಿಸಾದೆರ್. ಆರ್ ಗಂಜಾಂ ಜಿಲ್ಲೆದ ಉಪಾಧ್ಯಕ್ಷರಾದ್, ಕಾಂಗ್ರೆಸ್ ಸಮಿತಿ ಬೊಕ್ಕ ಬರ್ಹಮ್‌ಪುರ ಟೌನ್ ಕಾಂಗ್ರೆಸ್‌ದ ಅಧ್ಯಕ್ಷರಾದ್ ಇತ್ತೆರ್. ಲಕ್ಷ್ಮೀಬಾಯಿ 1937 ದ ದುಂಬು ಸಾರ್ವತ್ರಿಕ ಚುನಾವಣೆಡ್ ಬ್ರಹ್ಮಪುರ ಅಸೆಂಬ್ಲಿ ಕ್ಷೇತ್ರೊಡ್ದು ಒವ್ವೇ ವಿರೋಧ ಉಪ್ಪಂದೆ ಒಡಿಶಾ ಅಸೆಂಬ್ಲಿಗ್ ಆಯ್ಕೆ ಆತೆರ್ ಬೊಕ್ಕ 1953 ತನೊಕ ಸತತವಾದ್ ಶಾಸಕರಾದ್ ಮುಂದುವರಿಯೆರ್. 29 ಮೇ 1946 ಡ್ದ್ 20 ಫೆಬ್ರವರಿ 1952 ಮುಟ್ಟ ಲಕ್ಷ್ಮೀಬಾಯಿ ಡೆಪ್ಯೂಟಿ ಸ್ಪೀಕರ್ ಬೊಕ್ಕ ಒಡಿಶಾ ವಿಧಾನಸಭೆದ ಸ್ಪೀಕರ್ ಆದ್ ಕಾರ್ಯನಿರ್ವಹಿಸುದು ಇತ್ತೆರ್.

ಪೊಂಜೊವುಲೆನ ಸಬಲೀಕರಣ

ಲಕ್ಷ್ಮೀಬಾಯಿ ಕೇರಳೊಡು ನಡೆತಿನ ಡೆಪ್ಯುಟಿ ಸ್ಪೀಕರ್ ರಾಷ್ಟ್ರೀಯೊ ಸಮ್ಮೇಳನೊಡು ಮಂಡಣೆ ಮಂತಿನ ಶಿಕ್ಷೊಣ ನೀತಿನ್ ವಿಮರ್ಶಾತ್ಮಕವಾದ್ ಮೌಲ್ಯಮಾಪನ ಮಂತೆರ್. ಪೊಂಜೋವುಲೆನ ಸಬಲೀಕರಣೊದ ಆಸಕ್ತಿದ ಭಾಗವಾದ್ ಆರ್ ಒಡಿಶೊಡು ಪೊಣ್ಣು ಜೋಕುಲೆಗ್ ಉಚಿತೊ ಶಿಕ್ಷಣೊ ನೀತಿನ್ ಪರಿಚಯ ಮಂತೆರ್.

ಈ ನೀತಿ ಪ್ರದೇಶೊದ ವಿದ್ಯಾರ್ಥಿನಿ ನಕಲೆಗ್ ಕಾರ್ಯಕ್ಷಮತೆನ್ ಸುಧಾರಣೆ ಮಂತುಂಡು. ಒಡಿಶೊಡು, ಕಸ್ತೂರ್ಬಾ ಸ್ಮಾರಕ ನಿಧಿತ ಸ್ಥಳೀಯ ಶಾಖೆಡ್ ಅಧ್ಯಕ್ಷರಾದ್ ಸರ್ಕೊರ ಬಾಲಕಿನಕಲೆನ ಪ್ರೌಢಶಾಲಾ ಸಮಿತಿದ ಸಲಹೆಗಾರರಾದ್ ಸೇವೆ ಸಲ್ಲಿಸಾದೇರ್ ಬೊಕ್ಕ ಆರ್ ರಾಜ್ಯೊ ಸಮಾಜೊ ಕಲ್ಯಾಣ ಮಂಡಳಿಡ್ ಸದಸ್ಯರಾದು ಇತ್ತೆರ್. ಲಕ್ಷ್ಮೀಬಾಯಿ ಬಡ ವಿದ್ಯಾರ್ಥಿನಕಲೆಗ್ ಸಹಾಯೊ ಮಂಪರೆ ಗಂಜಾಂ ಜಿಲ್ಲೆ, ಬೌದ್ ಜಿಲ್ಲೆ ಬೊಕ್ಕ ಫುಲ್ಬಾನಿ ಜಿಲ್ಲೆಗ್ ಭೇಟಿ ಕೊರ್ದು ಇತ್ತೆರ್ ಬೊಕ್ಕ ಆರ್ ಜಯ ಮಂಗಲಂ ಆಶ್ರಮೊದ ವಿದ್ಯಾರ್ಥಿನಿನಕಲೆಗ್ ಸಹಾಯೊ ಮಂತು ಇತ್ತೆರ್.