ಕುಶಲಾಕ್ಷಿ. ವಿ .ಕುಲಾಲ್

ಶ್ರೀಮತಿ ಕುಶಲಾಕ್ಷಿ ವಿ.ಕುಲಾಲ್ ಮೆರೆ ಒರ್ತಿ ತುಳು ಸಾಹಿತಿ.

ಕುಶಲಾಕ್ಷಿ ವಿ,ಕುಲಾಲ್

ಪುಟ್ಟು ಬೊಕ್ಕ ಜೀವನ

ಕಣ್ವತೀರ್ಥ ದಿ/ನಾರಾಯಣ ಮೂಲ್ಯೆರ್ ಬೊಕ್ಕ ಚಂದ್ರಾವತಿ ದಂಪತಿಲೆನ ಏಳ್ ಜೋಕುಲೆಡ್ ನಾಲ್ನೆದಾರ್ 20-11-1967ಡ್ ಪುಟ್ಟುದೆರ್ ,ಕುಡ್ಲದ ಬಿಜೈ ಕಾಫಿಕಾಡು ಸರಕಾರಿ ಕಿರಿಯ ಪ್ರಾರ್ಥಮಿಕ ಶಾಲೆಡ್ ಪ್ರಾರ್ಥಮಿಕ ಅಂಚನೆ ಕುಂಜತ್ತೂರು ಸರಕಾರಿ ಪ್ರೌಢಶಾಲೆಡ್ ಪ್ರೌಢ ಶಿಕ್ಷಣೊನು ಪಡೆತೆರ್ ಅಂಚನೆ. ಡಿಪ್ಲೊಮೊ ಇನ್ ಫ್ಯಾಷನ್ ಡಿಸೈನಿಂಗ್‌ಡ್ ತರಬೇತಿ ಪಡೆಯಿನ ಮೆರ್ ನವಭಾರತ ಹೊಲಿಗೆ(ಪೊಲಿಗೆ) ತರಬೇತಿ ಕೇಂದ್ರೊನು ನಡಪಾವೊಂದುಲ್ಲೆರ್. ಇಂಬೆರೆ ಕಂಡನಿ ವಾಸು ಕುಲಾಲ್ ಕಣ್ವತೀರ್ಥ,ಅಂಚನೆ ಅಮೃತ.ಕೆ ಬೊಕ್ಕ ಅರ್ಪಿತ .ಕೆ ಮೆರೆನ ರಡ್ಡ್ ಪೊಣ್ಣು ಜೋಕುಲು.

ಸಾಹಿತ್ಯೊ ಕ್ಷೇತ್ರೊಡು

ಎಲ್ಯ ಪ್ರಾಯೊಡೆ ತುಳು, ಕನ್ನಡ ಕತೆ ಕವನೊಲೆನ್ ಬರೆವೊಂದಿತ್ತೆರ್. ತುಳು ಲಿಪಿನ್ ಕಲ್ತ್‌ದ ಅವೆಟ್‌ಲ ಕೆಲವೊಂಜಿ ಲೇಖನೊನು ಬರೆತೆರ್. ಕಾಸರಗೋಡು ಕುಲಾಲ ಸುದಾರಕ ಸಂಘ ಪ್ರಕಟಣೆದ ಕುಂಭವಾಣಿ ಪತ್ರಿಕೆಡ್ ಮೆರೆನ ಕಬಿತೆವೊಂಜಿ ಸುರುಕು ಮುದ್ರಣ ಆಂಡ್ ಅವೆಡ್ದ್ ಬೊಕ್ಕ ಕಾರವಲ್ ಪತ್ರಿಕೆಡ್ ಬರೆಪೆರ್. ಇಡೆ ಮುಟ್ಟ ಮೂಜಿ ತುಲು ಕವನ ಸಂಕಲನ , ಬೊಕ್ಕಪತ್ತ್ ಪನಿ ತೀರ್ಥೊ ಪನ್ಪಿ ತುಲು ಕಿರು ಲೇಖನ, ಕಡಲ ಮುತ್ತು ಬೊಕ್ಕ ಆಸ್ತಿ ಪನ್ಪಿ ರಡ್ಡ್ ತುಲು ಕಾದಂಬರಿ, ಸೀಕ್ ಸಂಕಡ ಇಲ್ಲ ಪಾತೆರ,ಬೈದ್ಯೆರೆನ ಕೆಬಿ ಪಾತೆರ ಪನ್ಪಿ ಅನುವಾದಿತ ವೈದ್ಯಕೀಯ ಲೇಕನ ಬೊಕ್ಕ ಕರ್ನಾಟಕ ತುಲು ಸಾಹಿತ್ಯ ಅಕಾಡೆಮಿದ ಮರಪೆರೇವಂದಿ ತುಲುವೆರೆ ಮಾಲಿಕೆಡ್ ,*ನಡಪುನ ಜೂವಕೋಶ ಡಿ.ಯಂ.ಕುಲಾಲ್* ಪನ್ಪಿ ದಿ| ಡಿ.ಯಂ ಕುಲಾಲೆರೆನ ವ್ಯಕ್ತಿ ಪರಿಚಯದ ಕೃತಿನ್ ಬರೆತೆರ್, ಮಸ್ತ್ ಆಲ್ಬಮ್ ಪದೊಕುಲು, ಕೆಲವು ಎಲ್ಯ ಕತೆ ,ನಾಟಕ,ವ್ಯಕ್ತಿ ಪರಿಚಯ, ಕ್ಷೇತ್ರ ಪರಿಚಯದಂಚಿನ ಲೇಖನೊಲೆನ್ ಬರೆತೆರ್ . ಆಕಾಶವಾಣಿಡ್‌ಲ ತುಳು ಕಾರ್ಯಕ್ರಮ ಕೊರ್ತೆರ್, ಕಾರ್ಯಕ್ರಮೊಕುಲೆಡ್ ಸಂಪನ್ಮೂಲ ವ್ಯಕ್ತಿಯಾದ್ ಪಾಲ್ ಪಡೆದ್ ತುಲು ಜನಪದ ಆಚರಣೆ, ಆರಾಧನೆ, ಮೂಲ ನಂಬಿಕೆಲೆನ ಬಗ್ಗೆ ಮಾಹಿತಿನ್ ಪಟ್ಟೊನುವೆರ್ . ಮಸ್ತ್ ಸಾಂಸ್ಕೃತಿಕ ಸ್ಪರ್ಧಾ ಕ್ಷೇತ್ರೊಡು ತೀರ್ಪುಗಾರ್ತಿಯಾದ್ ಪಾಲ್ ಪಡೆಯಿನಾರ್ , ಸಾಮಾಜಿಕ ಸಂಘ ಸಂಸ್ಥೆಲೆಡ್ ಸೇವೆ ಸಂದಾಯಿನಾರ್.ನೂದೆಡ್ದ್ ಜಾಸ್ತಿ ಕವಿ ಗೋಷ್ಠಿಲೆಡ್ ಪಾಲ್ ಪಡೆಯಿನಾರ್ ಮೆರ್ ಕುವಿಕು ಪನ್ಪಿನ ಪುದರ್‌ಡ್ ಲೇಕನೊಲೆನ್ ಬರೆಪೆರ್.

ಮಾನಾದಿಗೆ

• 2019 ದ ಕರ್ನಾಟಕ ತುಲು ಸಾಹಿತ್ಯ ಅಕಾಡೆಮಿದ ಪುಸ್ತಕ ಪ್ರಶಸ್ತಿ ( *ಪನಿ ಮುತ್ತು ಮಾಲೆ* ಕವನ ಸಂಕಲನೊಗು).
• ತುಲು ಕೂಟ ಉಡುಪಿ 2020 ದ ಫಣಿಯಾಡಿ ಪ್ರಶಸ್ತಿ (*ಕಡಲ ಮುತ್ತು* ಕಾದಂಬರಿಗ್)
• ಕುಲಾಲ ಸಂಘ ಬೆಂಗಳೂರು ಮುಕುಲೆನ *ಕುಲಾಲ ಕಿರೀಟ*ಪ್ರಶಸ್ತಿ.
• ತುಲುವೆರೆ ಚಾವಡಿ ಬೆಂಗಳೂರು ಮುಕುಲೆನ*ತುಲುನಾಡ್ ದ ಸಿರಿ* ಪ್ರಶಸ್ತಿ(ಸಾಹಿತ್ಯ ಸೇವೆಗ್)

ಪ್ರಕಟಿತ ಲೇಖನೊಲು

• ಸುರೂತ ಪನಿ(ತುಲು ಕವನ ಸಂಕಲನ)2007
• ರಡ್ಡ್ ಪನಿ (ತುಲು ಕಬಿತೆದ ಕೋಪೆ)2017
• ಪತ್ತ್ ಪನಿ ತೀರ್ಥೊ(ತುಲು ಕಿನ್ಯ ಬರವುದ ಪೊದಿಕೆ)2018
• ಪನಿ ಮುತ್ತು ಮಾಲೆ(ತುಲು ಕಬಿತೆದ ಜೊಂಕುಲಿ)2019 ,ತುಲು ಲಿಪಿಟ್‌ಲ ಮುದ್ರಿತವಾದುಂಡು.
• ಕಡಲ ಮುತ್ತು ತುಲು ಕಾದಂಬರಿ(2020)
• ಆಸ್ತಿ ...ತುಲು ಕಾದಂಬರಿ (2021)
• ಸೀಕ್ ಸಂಕಡ ಇಲ್ಲ ಪಾತೆರ,ಬೈದ್ಯೆರೆನ ಕೆಬಿ ಪಾತೆರ (ಅನುವಾದಿತ ತುಲು ವೈದ್ಯಕೀಯ ಲೇಖನ)
• ನಡಪುನ ಜೂವಕೋಶ ಡಿ.ಯಂ ಕುಲಾಲ್(ಮರಪೆರೇವಂದಿ ತುಲುವೆರಾ ಮಾಲಿಕೆ,ಕರ್ನಾಟಕ ತುಲು ಸಾಹಿತ್ಯ ಅಕಾಡೆಮಿ ಕುಡ್ಲಡ್ ಪ್ರಕಟವಾಯಿನ ಕೃತಿ)