ದ್ರೋಣ

ಮಹಾಭಾರತಡ್ ದ್ರೋಣ (ಸಂಸ್ಕೃತ ಭಾಷೆ: द्रोण) ಅಥವಾ ದ್ರೋಣಾಚಾರ್ಯ (ಸಂಸ್ಕೃತ ಭಾಷೆ: द्रोणाचार्य) ಒಂಜಿ ಮುಕ್ಯೊ ಪಾತ್ರೊ. ದ್ರೋಣೆ ಪುಟ್‍ದಿನ ಕರಟಾಂಡಲಾ ಅಯಿತ ಬಗೆಟ್ ಸರಿಯಾಯಿನ ಮಾಹಿತಿ ಇದ್ದಿ. ಸಂಸ್ಕೃತೊಡು ದ್ರೋಣಗ್ ಕುಂಬೋದ್ಭವ ಪಂಡ್‍ದ್ ಲೆಪ್ಪುವೆರ್.

ಪುಟ್ಟು

• ಭರದ್ವಾಜ ರುಸಿ ಆಯನ ಜತೆತಕ್ಲೆನೊಟ್ಟುಗೆ ಗಂಗಾ ಸುದೆಕ್ ಪೋಪೆ. ಅಲ್ಪ ಮೀಯೆರೆ ಬತ್ತ್‌ನ ಘೃತಾಚಿ ಪನ್ಪುನ ಪೊರ್ಲುದ ಅಪ್ಸರೆಲಾ ಅವ್ವೇ ಸುದೆಟ್ ಮೀದ್ ಬರ್ಪುನ ಆಲೆನ ಪೊರ್ಲುನು ಆಯೆ ತೂಯೆ. ರುಸಿನ ಕಾಮೋದ್ರೇಕಡ್ದ್ ಆಲೆನ ಪೊರ್ಲುಡ್ದು ಕಾಮೊ ಪಿದಯಿ ಬರ್ಪುಂಡು. ಭರದ್ವಾಜ ರುಸಿ ಈ ಕಾಮೊನು ದ್ರೋಣ (ದ್ರೋಣ ಪಂಡ ಸಂಸ್ಕೃತೊಡು ಸೊನ್ನೆ) ಪನ್ಪುನ ದೊನ್ನೆಡ್ ದೆತ್ತ್‌ದೀಡೊಂಡೆ. ಬುಕ್ಕೊ ಅಯಿನ್ ಕರಟ್ ದೀಡಿಯೆ. ದ್ರೋಣಾಚಾರ್ಯೆ ಇಂಚ ಸೊಂತ ದೆತ್ತ್ ‌ದೀಡ್‌ನ ಕಾಮೊಡ್ದು ಪುಟ್‌ದ್ ಬತ್ತೆ.

ದ್ರೋಣ ದ್ರುಪದೆರೆ ಜೋಸ್ತಿ

ದ್ರೋಣ - ದ್ರುಪದನ ಜೋಸ್ತಿ - ಕೋಪೊದ ಕತೆ ಆಯಿನವು ವಿಸೇಸೊ ಆದುಂಡು. ಎಲ್ಯೆಡ್ದ್ ಜತೆಯಾದ್ ಬುಲೆಯಿನ ಇರ್ವೆರ್ ಜೂವೊದ ಜೋಸ್ತಿಲು ಮುಕುಲು. ಅಪಗ ಯುವರಾಜೆ ಆದಿತ್ತಿನ ದ್ರುಪದೆ, ಬಡಪತ್ತ್‌ದ ದ್ರೋಣಗ್ ತಾನ್ ದುಂಬು ರಾಜೆ ಆಂಡ ನಿಕ್ಕ್‌ಲಾ ಅರ್ದೊ ರಾಜ್ಯೊನು ಕೊರ್ಪೆಂದ್ ಪಾತೆರೊ ಕೊರ್ದಿಪ್ಪುವೆ. ಅಂಚನೆ ಕಾಲೊ ಕರಿನಗ ದ್ರುಪದೆ ರಾಜೆ ಆಪೆ. ದ್ರೋಣಗ್ ಕೃಪಾಚಾರ್ಯನ ತಂಗಡಿ ಕೃಪಿನೊಟ್ಟುಗೆ ಮದಿಮೆಯಾದ್ ಅಶ್ವತ್ಥಾಮ ಪುದರ್‍ದ ಮಗೆ ಪುಟ್ಟುಬೆ. ಅಪಗ ದಿಂಜ ಬಡಪತ್ತ್‌ದ ಕಾರಣೊ ಇಲ್ಲಡೆಡ್ ಬಾಲೆಗ್ ಕೊರಿಯರ ಪೇರ್ ಇದ್ಯಾಂತೆ ಕೃಪಿ ಮಗಕ್ಕ್ ಅರಿತ ಪೊಡಿನ್ ನೀರ್‍ಡ್ ಕಲಡದ್ ಅಯಿನೆ ಪೇರ್ಂದ್ ಕೊರ್ಪಲ್. ಒಂಜಿ ದಿನೊ ನಿರೆಕರೆತ ಜೋಕ್ಲು ಇಂದೆನ್ ತೂದು ಅಶ್ವತ್ಥಾಮನ್ ಮಸ್ಕಿರಿ ಮಲ್ಪುವೆರ್. ಆಪಗ ಬೇಜಾರೊ ಆಯಿನ ದ್ರೋಣೆ, ದ್ರುಪದನ ಕೈತಲ್ ಪೋದ್ ದುಂಬು ಕೊರ್‍ನ ಪಾತೆರೊನು ನೆಂಪು ಮಲ್ಪುವೆ. ಆಂಡ ಅದಿಕಾರೊದ ಆಂಕಾರೊಡು ದ್ರುಪದೆ, ಜೋಸ್ತಿನ ನೆಂಪುನು ಮರತ್‌ದ್ ದ್ರೋಣನ್ ಡೋಂಗಿ ಮಲ್ತ್‌ದ್ ಮರ್ಯಾದಿ ದೆಪ್ಪುವೆ. ಆ ಕೋಪೊಡು ದ್ರೋನೆ ನಾನೊಂಜಿ ದಿನೊ ನಿನ್ನ ತರೆ ಎನ್ನ ಕಾರ ಬರಿಟ್ ಬೂರುನಂಚ ಮಲ್ಪುವೆಂದ್ ಶಪಥ ಮಲ್ಪುವೆ. ದುಂಬುಗು ಆಯನ ಮೋಕೆದ ಶಿಷ್ಯೆ ಅರ್ಜುನಡ್ದ್ ಆಯನ ಪ್ರತಿಜ್ಞೆನ್ ಕೈಕೊನುವೆ.