ಪಿಲಿ ವೇಷ

ಪಿಲಿತವೇಷ (ಪಿಲಿ ಗೊಬ್ಬು) ತುಳುನಾಡು ದ ಭಾರಿ ಪೊರ್ಲು ದ ಬೊಕ್ಕ ಜನಪ್ರಿಯ ಆಯಿನ ಗೊಬ್ಬು.^[೧] ಮಾರ್ನೆಮಿ, ಚೌತಿ ಬೊಕ್ಕ ಮೊಸರು ಕುಡಿಕೆದ ಪೊರ್ತುಡು ನಮ ತುಳುನಾಡ್‌ಡ್ ಪಿಲಿ ನಲಿಕೆದ ಗೊಬ್ಬುನು ತೂವೊಲಿ. ಪಿಲಿತ ವೇಷದ ತಾಸೆ ಮಾರ್ಣೆಮಿದಪಾಗ ಸಾದಿಡ್ ಮಾಂತ ಕೇಣೊಂದ್ ಉಪ್ಪುಂಡು.

ಪಿಲಿನಲಿಕೆತ ಪಿರನಿಲೆ

ಪಿಲಿವೇಷನ್ ಪರಕೆಪಂಡ್ದ್ ಪಾಡುನ ಕ್ರಮ ಉಂಡು. ಪೆರ್ಚಾದ್ ಜೋಕುಳೆಗ್ ಕಾಯಿಲೆ ಬನ್ನಗ ದೇವೆರೆಟ ಪ್ರಾರ್ಥಿತ್‌ದ್ ಮಾರ್ನೆಮಿಗ್(ನವರಾತ್ರಿ)ಗ್ ಪಿಲಿವೇಶ ಪಾಡ್ಪವೆರ್. ಅವ್ ಅತ್ತಾಂದೆ ಮಧ್ಯಮ ವರ್ಗೊದ ಜನೊಕುಳು ಮಾರ್ನೆಮಿ, ಅಷ್ಟಮಿತ‌ ಕುದಿಟ್ಟ್ (ಅವಧಿಟ್) ವೇಶ ಪಾಡ್ದ್ ಒಂತೆ ಪಣವು ಸಂಪೊಲಿಪ್ಪುವೆರ್. ದುಂಬುತ ಕಾಲೊಟ್ ಒಂಜಿ ವಟಾರೊತ ಜವೆನೆರ್ ಒಂಜಾದ್ ವೇಷ ಪಾಡೊಂದು ಇತ್ತೆರ್.

ಪಿಲಿಗುಬ್ಬುದ ಬಗೆಕುಲು

ಪಿಲಿ ವೇಷ (ಪಿಲಿಯೇಸ ) ಉಡುಪಿ ಬೊಕ್ಕ ದಕ್ಶಿಣಕನ್ನಡ ಜಿಲ್ಲೆಡ್ ಹೆಚ್ಛಾದ್ ತೋಜಿದ್ ಬರ್ಪುಂಡು. ಮೂಲು ವೇಸ ದ ವಿಧಾನ ಬೇತೆ ಬೇತೆ ಉಂಡು. ಪಿಲಿತ ಕಚ್ಛೆ, ಚಡ್ಡಿ, ಮೈತ ರಂಗದ ಬಗೆಕುಲು, ಗೊಬ್ಬುನ ರೀತಿ, ತಾಸೆದ ಪೆಟ್ಟ್ ಪೂರ ವ್ಯತ್ಯಾಸ ಉಂಡು. ಪಿಲಿತ ಮೈಟ್ಟ್ ಮಂಜಲ್ ಬೊಕ್ಕ ಬೊಲ್ದುದ ರಂಗ್ ಉಡುಪಿದ ಬರಿತಟ್ ಹೆಚ್ಛಾದ್ ತೋಜಿದ್ ಬರ್ಪುಂಡು. ಅಯಿತ ಮೇಲ್ಗ್ ಪಟ್ಟೆ, ಚಿಟ್ಟೆ, ಮಾತಾ ಬರೆಪೆರ್. ಇಂಚಿನ ಬಣ್ನದ ಮಿತ್ತ್, ಪಿಲಿತ ಮೋನೆ, ಬೇತೆ ಚಿತ್ರಲುಲಾ ಕುಡ್ಲಡ್ ಬರೆಪೆರ್. ಕಪ್ಪು, ಪಚ್ಚೆ ರಂಗ್ ದ ಪಿಲಿಕುಲುಲಾ ಉಲ್ಲ. ಉಡುಪಿಡ್ ವೇಷಧಾರಿ ಆಯೆನ ಚಡ್ಡಿದ ಮಿತ್ತ್ ಹನುಮಾನ್ ಕಚ್ಛೆ ಪಾಡುವೆರ್.ಆಂಡ ಕುದ್ಲಡ್ ಇಂಗ್ಲಿಶ್ ದ 'V' ಅಕ್ಶರದ ಕಾಚಾ ಪಾಡುವೆರ್. ತರೆಕ್ ಕುರಿತ ರೋಮಡು ಮಲ್ತಿನ ರಂಗ್ ಪಾಡಿನ ಪೊರ್ಲುದ ಟೊಪ್ಪಿ ಪಾಡುವೆರ್. ಇಡೀ ಮೈಕ್ ರಂಗ್ ಪಾಡ್ದ್ ಒಂಜಿ ಅತಾಂದ ರಡ್ಡ್ ದಿನ ಗೊಬ್ಬುವೆರ್. ಕೈತ ರಟ್ಟೆಗ್ ಲಿಂಬೆ ಪುಲಿ ಬೊಕ್ಕ ನವಿಲ್ದ ಗರಿನ್ ಕಟ್ಟುನ ಕ್ರಮೊಲಾ ಕುಡ್ಲಡ್ ಉಂಡು. ಉಂದು ವೇಷಧಾರಿಗ್ ತೂಪುನಕುಲೆನ ದ್ರಿಸ್ಟಿ ತಾಗಿಯೆರೆ ಬಲ್ಲಿ ಪಂಡ್ ದ್ ಕಟ್ಟುನ ಕ್ರಮ. ಅಂಚನೆ ಬೇತೆ ಊರುಡುಲಾ ಪಿಲಿವೇಶ ಉಂಡು. ಕೇರಳ, ಓರಿಸ್ಸಾಡುಲಾ ಈ ಕಲೆ ಉಂಡು. ಆನುಲು ಮಾತ್ರೆ ಗೊಬ್ಬುನ ಕಲೆಟ್ಟ್ ಇತ್ತೆ ಪೊನ್ನುಲುಲಾ ಪಾಲ್ ಪಡೆಪೆರ್.^[೨]

ಪಿಲಿವೇಷದ ಗೊಬ್ಬು

ಪಿಲಿ ಗೊಬ್ಬುದ ಕಲಾವಿದೆರ್

ಪಿಲಿಗೊಬ್ಬುದ ಕಲಾವಿದೆರೆಗ್ ಬಾರೀ ಮರ್ಯಾದೆ ಉಂಡು. ಕುಡ್ಲದ ಬಜಿಲಿಕೇರಿದ ಕ್ರಷ್ನಪ್ಪ ಪನ್ಪುನಾರ್ ೯೫ ವರ್ಸ ಗು ದುಂಬು ಪಿಲಿತ ತಂಡ ಕಟ್ಟ್ದೆರ್. ಆರೆನ ಮಗೆ ಕಮಾಲಾಕ್ಶ ಪನ್ಪುನಾರೆನ ಇಲ್ಲದ ಮಾತಾ ಜನ ಪಿಲಿತ ವೇಷಡು ಪಾಲ್ ಪಡೆಪೆರ್. ಅಂಚನೆ ಉಡುಪಿದ ಅಶೊಕ್ ರಾಜ್ ಕಾಡೆಬೆಟ್ತು ಆರೆನ ಕುಟುಂಬಲಾ. ಕದ್ರಿದ ಗಂಗಾಧರ ದೇವಾಡಿಗೆರ್ ಕರಿನ ೫೦ ವರ್ಸೊಡು ವೇಷ ಪಾಡುವೆರ್. ಅಂಚನೆ ತಾಸೆಡ್ ಕಾರ್ಕಳದ ಆಣ್ಣೀಯಣ್ನ, ಡೋಲುಡು ಜನಾರ್ಧನ ಜೋಗಿಲು ಪುದರ್ ಪಡೆತೆರ್. ವಿಶ್ವನಾಥ ಪಾಂಡೆಶ್ವರ ಪಿಲಿ ಗೊಬ್ಬುದ ಗುರು ಆದ್ ಪುದರ್ ಪಡೆತೆರ್.

ಪಿಲಿವೇಷಡ್ ಅಯಿನ ಬದಲಾವಣೆಲು

ಶತಮಾನ ದ ಇತಿಹಾಸ ಇತ್ತಿನ ಈ ಕಲೆಟ್ ಬಾರೀ ಬದಲಾವನೆ ಆತ್ಂಡ್. 'ಪಿಲಿಗೊಬ್ಬು' ಪೋದು 'ಪಿಲಿನಲಿಕೆ' ಆತ್ಂಡ್. 'ರಂಗ್' ಪೋದು 'ಬಣ್ಣ' ಆತ್ಂಡ್. ಪಿಲಿಗಒಬ್ಬುದ ಜಾಗೆಗ್ ಗೊಬ್ಬುದ ಕಲ ಪನ್ಪೆರ್. ಚರ್ಮದ ಡೊಲು, ತಾಸೆ ಪೋದು ಪ್ಲಾಸ್ಟಿಕ್, ಫೈಬರ್ದ ಬತ್ತ್ಂಡ್. ಇಲ್ಲ್ ಇಲ್ಲ್ ಪೋದು ಗೊಬ್ಬುನ ಕಮ್ಮಿ ಆದ್ ಕೆಲವೇ ಇಲ್ಲಲ್ ಗೊಬ್ಬುನ ಶುರು ಆತಂಡ್. ಇತ್ತೆ ಬೇತೆ ಜನ ಪಿಲಿಗೊಬ್ಬುದ ಸ್ಪರ್ದೆ ಮಲ್ಪುವೆರ್^[೩]. ಬಾರೀ ಮಲ್ಲ ಇನಾಮುದ ದುಡ್ಡುಲಾ ಕೊರ್ಪೆರ್. ಸಾಂಪ್ರದಾಯಿಕ ಪೌಲೊದ ಗೊಬ್ಬು ಮಾಯ ಆದ್ ಸಿನಿಮಾದ ಡಾನ್ಸ್ ಬರೊಂದುಂಡು. ಪಿಲಿ ವೇಷನು ಇಂಚಿಪ್ಪ ಸಿನಿಮಾಡ್ ತೋಜಾದೆರ್. ಪಿಲಿಪರ್ಬ, ಪಿಲಿನಲಿಕೆ ಪನ್ಪಿನ ಸ್ಪರ್ಧೆಲೆಗ್ ಸಿನಿಮಾ ಕಾಲವಿದೆರ್ಲಾ ಬರ್ಪೆರ್.