ಪೆಲಕಾಯಿ ಬೆರಟಿ

ಪೆಲಕಾಯಿ ಬೆರಟಿ ಪಂಡ ಒಂಜಿ ತೆನಸ್ಸ್. ಉಂದು ಜಾಸ್ತಿಯಾದ್ ಆಟಿದ ತಿಂಗೊಳುಗಾದ್ ದಾಸ್ತಾನ್ ಮಲ್ತ್ ದೀಪಿನ ತೆನಸ್ಸ್. ಆಟಿಟ್ ಜೋರು ಬರ್ಸದ ಪೊರ್ತುಡು ಪೆಲಕಾಯಿ ತಿಕ್ಕುನು ಕಮ್ಮಿ. ತಿಕ್ಕ್ಂಡಲ ಆಟಿದ ಪೆಲಕಾಯಿ ಆತ್ ಎಡ್ಡೆ ಅತ್ತ್. ಬರ್ಸದ ನೀರ್ ಒಯ್ಯಿತ್‌ದ್ ಸೀಕ್ ಬರ್ಪುನ ಸಾಧ್ಯತೆ ಜಾಸ್ತಿ. ಅಯಿಕಾದ್ ಪೆಲಕಾಯಿ ತಿಕ್ಕುನ ಪೊರ್ತುಡು ಅವೆನ್ ದಾಸ್ತಾನ್ ಮಲ್ತ್ ದೀಪುನ ಒಂಜಿ ಕ್ರಮೊಕು ಬೆರಟಿ ಮಲ್ಪುನೆ ಪನ್ಪೆರ್.

ಪೆಲಕಾಯಿಡುಪ್ಪುನ ಪೋಷಕಾಂಶ

ಪೆಲಕಾಯಿಡ್ ಸಕ್ಕರೆದ ಅಂಶೊ, ಅನ್ನಾಂಗ, ಸಾರಜನಕ, ಪಿಷ್ಟ, ಖನಿಜಾಂಶ ಉಂಡು. ಉಂದು ಪಿತ್ತನಾಶಕ, ಬಲವರ್ಧಕ ಆದುಂಡು. ನೆಟ್ಟ್ ಉಪ್ಪುನ 'ಸಿ' ಸತ್ವ ವೈರಲ್- ಬ್ಯಾಕ್ಟೀರಿಯಾ ಸೋಂಕುಡ್ದು ರಕ್ಷಣೆ ಮಲ್ಪುಂಡು. ನರಮಾನಿಲೆಗ್ ಒವ್ವೇ ಕುತ್ತೊ(ಸೀಕ್) ಬರಂದಿಲೆಕ ತೂಪಿನ ಸಗ್ತಿಲಾ ಪೆಲಕಾಯಿಗ್ ಉಂಡು. ಕ್ಯಾನ್ಸರ್‌ಗ್ ಎದುರುಲಾ ಕೆಲಸ ಮಲ್ಪುನ ಸಗ್ತಿ ನೆಟ್ಟುಂಡು. ನೆಟ್ಟ್ ಇತ್ತಿನ ನಾರ್‌ದ ಅಂಶೊಡ್ದಾವರ ಜೀರ್ಣ ಸಗ್ತಿ ಎಚ್ಚಾದ್ ಬಂಜಿದ ಪುಡಿ- ಅಲ್ಸರ್ ಆವಂದಿಲೆಕ ತೂಪುಂಡು. ಇಂದೆಟುಪ್ಪುನ 'ಎ' ಸತ್ವ ಕಣ್ಣ್, ಚರ್ಮೊಗು ಎಡ್ಡೆ. ಪೆಲಕಾಯಿಡ್ ಉಪ್ಪುನ ಸುಕ್ರೋಸ್ ಬೊಕ್ಕ ಪ್ರೊಕ್ಟೋಸ್ ಪನ್ಪಿನ ಸಕ್ಕರೆ ಅಂಶೊಲು ತ್ರಾಣ ಕೊರ್ಪುಂಡು. ಪೆಲತ ಮರತ ಬೇರ್‌ಡ್ ಮಲ್ದಿನ ಕಸಾಯ ಉಬ್ಬಸ ಸೋಂಕುಗು ರಾಮಬಾಣ ಪನ್ಪೆರ್. ಪೆಲಕಾಯಿಡುಪ್ಪುನ ತಾಮ್ರದ ಅಂಶೊ ಥೈರಾಯಿಡ್ ಬರಂದಿಲೆಕ ತೂಪುಂಡು.

ಬೆರಟಿ ಮಲ್ಪುನ ವಿಧಾನೊ

ಪರ್ಂದ್ ಪೆಲಕಾಯಿನ್ ಮೂರ್ದ್ ಪಚ್ಚಿಲ್ ಲಕ್ಕಾದ್ ಅವೆತ ಕನ್ನಿ, ಪೆಲತ್ತರಿ ,ಪೋಂಡಿ ಮಾತ ದೆತ್ತ್‌ದ್ ಪಚ್ಚಿಲ್‌ನ್ ಸೋಕುಡೆ ಸಣ್ಣ ಕೊಚ್ಚೊಡು ಅವೆಡ್ದ್ ಬೊಕ್ಕ ದಿಕ್ಕೆಲ್‌ಡ್ ಒಂಜಿ ಬಣಲೆ ದೀದ್ ಅಯಿಕ್ ಚೂರು ನೈಯಿ ಪಾಡ್ದ್ ಮೂರ್ದ್(ಕೊಚ್ಚಿದ್) ದೀನ ಪಚ್ಚಿಲ್ ಪಾಡ್ದ್ ಎಡ್ಡೆ ಬೆಯಿಪಾವೊಡು ಅವ್ವು ಬೆಯಿತ್‌ದ್ ಎಡ್ಡೆ ಗಟ್ಟಿಯಾದ್ ಮಣ್ಣಿದ ಲೆಕ್ಕಾನಗ ಅವೆನ್ ದಿಕ್ಕೆಲ್‌ಡ್ದ್ ಜಾದ್ ಚವುಲಿ ಅಯೆರೆ ಬುಡೊಡು ಚವುಲಿ ಆಯಿ ಬೊಕ್ಕ ಭರಣಿಡ್ ದಿಂಜಾದ್ ದೀವೊಡು ಪೆಲಕಾಯಿ ಇಜ್ಜಾಂದೆ ಉಪ್ಪುನಗ ಬೋಡಾನಗ ದೆತ್ತ್‌ದ್ ಉಪಯೋಗ ಮಲ್ಪೊಲಿ.

ಬೆರಟಿದ ಉಪಯೋಗ

ಪಾಯಸೊ ಮಲ್ಪುನಗ ಈ ಬೆರಟಿನ್ ಸೇರಾದ್ ಪಾಯಸ ಮಲ್ತ್ಂಡ ಪೆಲಕಾಯಿದ ಪಾಯಸ ಮಲ್ತಿಲೆಕ್ಕ ಆಪುಂಡು
ಅರಿ ಕಡೆನಗ ಬೆರಟಿ ಸೆರಾದ್ ಕಡೆದ್ ಬಾರೆದ ಇರೆಟ್ ಮಡಿತ್ ದೀದ್ ತಂದೊರುಡು ಬೆಯಿಪಾಂಡ ಪೆಲಕಾಯಿದ ಅಡ್ಯೆ ಮಲ್ತಿ ಲೆಕ್ಕಾಪುಂಡು
ಅರಿ ಕಡೆನಗ ಬೆರಟಿ ಸೆರಾದ್ ಕಡೆದ್ ಅಪ್ಪದ ಕಾವೆಲಿಡ್ ಮಯಿತ್‌ದ್ ಬೆಯಿಪಾಂಡ ಅಪ್ಪದಡ್ಯೆ ಆಪುಂಡು