ಬೇಡನ್
ಬೇಡನ್ ಪಂಡ ಒಂಜಿ ದೈವ ಕರ್ಕಾಟಕ(ಆಟಿ)ತಿಂಗೊಳುಡು ಕೇರಳದಂಚಿ ಇಲ್ಲ್ ಇಲ್ಲ್ ಬತ್ತ್‌ದ್ ಜನೊಕುಲೆನ ಕಷ್ಟ ಪರಿಹರಿಪುಂಡು ಪನ್ಪಿನವು ನಂಬಿಕೆ. ಈ ಬೇಡನ್ ದೈವೊನು ಮಲವೆರ್ ಪನ್ಪಿ ಒಂಜಿ ಜನಾಂಗೊದಕುಲು ಕಟ್ಟ್‌ದ್ ಇಲ್ಲ್ ಇಲ್ಲ್ ಬರ್ಪಿನ ಪದ್ದತಿ. ಮಲಯಾಲೊಡು ವೇದನ್ ಪಂದ್ ಲೆಪ್ಪುವೆರ್[೧]
ವೇಷ,ನಲಿಕೆ,ಕ್ರಮ
ಸಂಪೊಲಿಪುಲೆಈ ದೈವೊನು ಎಲ್ಯ ಜೋಕುಲು ಕಟ್ಟುವೆರ್. ಕಿರಾತ (ಬೇಟೆಗಾರ)ನ ಲೆಕ್ಕೊ ಎಲ್ಯ ಪ್ರಾಯೊದ ಆಣಗ್ ವೇಷ ಮಲ್ಪುವೆರ್. ಕೆಂಪು ಬಣ್ಣದ ಪಟ್ಟೆ(ರೇಷ್ಮೆದ)ಕುಂಟು ತುತ್ತಾದ್ ತರೆಕ್ ನಾಗನ ಚಿತ್ರೊದ ತರೆ ಪಟ್ಟಿ ಕಟ್ಟುವೆರ್. ಮೋನೆಗ್ ಕೆಂಪು ಮುಖ ವರ್ಣಿಕೆ ಪಾಡ್ದ್ ಕಿರಾತನ ರೂಪ ಮಲ್ಪುವೆರ್.
ಈ ದೈವೊ ದೇವಸ್ಥಾನ, ದೈವಸ್ಥಾನೊಡು ಕಟ್ಟುದ್ ನಲಿಪುನ ಬದಲ್ ಪ್ರತಿ ಇಲ್ಲಡೆ ಬತ್ತ್‌ದ್ ನಲಿಪುಂಡು.ಚೆಂಡೆ ವಾದ್ಯದಕುಲು ಪನ್ಪಿನ ಬೋಂಟೆದ ಪದೊಕು ಈ ದೈವ ನಲಿಪುಂಡು ಈ ದೈವೊ ಇಲ್ಲಡೆ ಬತ್ತ್ಂಡ ಐಶ್ವರ್ಯ ಬೊಕ್ಕ ಸಂಪತ್ತ್‌ದ ಅಧಿದೇವತೆಯಾಯಿನ ಲಕ್ಷ್ಮೀದೇವಿ ನೆಲೆ ಆಪಳ್ ಪನ್ಪಿನ ಸಾಮಾನ್ಯ ನಂಬಿಕೆ. ಬೇಡನ್ ದೈವೊ ಇಲ್ಲಡೆ ಬನ್ನಗ ದೀಪೊ ಪೊತ್ತಾದ್ ದೀವೊಡು ಅವೆಡ್ದ್ ಬೊಕ್ಕ ಚೆಂಡೆ ಬೊಟ್ಟುನಾರ್ ಇಲ್ಲ್‌ದಕುಲೆನ ಒಪ್ಪಿಗೆ ದೆತೊಂದು ಸಂಧಿ ಪನೊಂದು ಬೊಟ್ಟಿಯೆರೆ ಸುರು ಮಲ್ಪುನಗ ಬೇಡನ್ ದೈವೊ ಇಲ್ಲ್‌ದ ಎದುರು ದುಂಬು ಪಿರವು ಪೋವೊಂದು ನಲಿಪುಂಡು. ನಲಿತ್‌ದ್ ಆಯಿ ಬೊಕ್ಕ ಭಸ್ಮದ ಕುರ್ದಿ ಮಲ್ತ್‌ದ್ ಒಂಜಿ ಬತ್ತಿ ಪೊತ್ತಾವೊಂದು ಇಲ್ಲ್‌ದ ಯಜಮಾನ್ತಿ ಪಿದಯಿ ಜಾಲ್‌ಗ್ ಪತೊಂದು ಬತ್ತ್‌ದ್ ತೆನ್ಕಾಯಿಗ್ ಚೇತ್‌ದ್ ಬುಡ್ಪೆರ್. ಇಲ್ಲ್ ಬೊಕ್ಕ ಸುತ್ತು ಪರಿಸರ ಶುದ್ಧ ಆದ್ ದುಷ್ಟ ಶಕ್ತಿ ದೂರ ಆಪುಂಡು ಪನ್ಪಿ ನಂಬಿಕೆ. ದೈವೊ ಕಟ್ಟ್‌ದ್ ಇಲ್ಲಡೆ ಬತ್ತ್‌ದ್ ಪೋನಗ ಪಣವು, ಅರಿ, ಮರಿಯಲೊಗು ದೀದಿತ್ತ್‌ನ ಕಾಯಿ ಕಜಿಪು, ಧಾನ್ಯ, ಉಪ್ಪು ಇಂಚಿತ್ತಿ ವಸ್ತುಲೆನ್ ದಾನ ಕೊರ್ಪುನ ಕ್ರಮಲ ಉಂಡು
ಚರಿತ್ರೆ,ನಂಬಿಕೆ
ಸಂಪೊಲಿಪುಲೆಅರ್ಜುನೆ ವನವಾಸದ ಪೊರ್ತುಡು ಪಾಶುಪತಾಸ್ತ್ರನ್ ಪಡೆಯೆರೆಗೋಸ್ಕರ ಶಿವಗ್ ಪೂಜೆ ಮಲ್ಪೆರೆ ಸುರು ಮಲ್ಪುವೆ.ಶಿವೆ ಪಾರ್ವತಿನಕುಲು ಭಕ್ತನ ಭಕ್ತಿನ್ ಪರೀಕ್ಷೆ ಮಲ್ಪೆರೆ ಕಿರಾತನ ವೇಷೊಡು ಕಾಡ್‌ಗ್ ಬರ್ಪೆರ್. ಅರ್ಜುನೆ ತಪಸ್ಸ್‌ಡ್ ಉಪ್ಪುನಗ ಕಾಡ್ ಪಂಜಿ ಬರ್ಪುಂಡು ಆಯನ ಮನಸ್ಸ್ ಚಂಚಲ ಆದ್ ಅವೆನ್ ತೂದ್ ಅಯಿಕ್ ಬಾಣ ಬುಡ್ಪೆ ಅವ್ವೆ ಪೊರ್ತುಗು ಶಿವೆಲ ಆ ಪಂಜಿದ ತರೆಕ್ ಬಾಣ ಬುಡ್ಪೆ ಪಂಜಿ ಸಯಿಪುಂಡು. ಪಂಜಿ ಏರೆನ ಪಾಲ್‌ಗ್ ಸೇರ್ನ ಪನ್ಪಿ ವಿಷಯೊಡು ಅರ್ಜುನಗ್‌ಲ ಕಿರಾತಗ್‌ಲ ಚರ್ಚೆ ಆಪುಂಡು ಕಡೆಕ್ ಲಾಡಾಯಿ ಆಪುಂಡು. ಕಿರಾತನ ಬಾಣ ತಾಗ್‌ದ್ ಅರ್ಜುನೆ ಮತಿ ತಪ್ಪುವೆ. ಪಿರ ಮತಿ ಬನ್ನಗ ಅರ್ಜುನೆ ಕಿರಾತಗ್ ಬಾಣ ಬುಡ್ಪೆ ಆಂಡ ಕಿರಾತನ್ ಸೋಲ್ಪಾಯೆರೆ ಆಪುಜಿ. ಕಿರಾತನ್ ಸೋಲ್ಪಾಯೆರೆ ಶಕ್ತಿ (ವರ)ಪಡೆಯೆರೆ ಶಿವಲಿಂಗ ಮಲ್ತ್‌ದ್ ಪುರ್ಪ ಅರ್ಚನೆ ಮಲ್ಪುವೆ.ಶಿವಲಿಂಗದ ಮಿತ್ತ್ ಪಾಡ್ನ ಪೂ ಮಾತ ಕಿರಾತನ ತರೆ ಮಿತ್ತ್ ಬೂರುಂಡು ಅಪಗ ಶ್ರೀ ಪರಮೇಶ್ವರೆ ಎನನ್ ಪರೀಕ್ಷೆ ಮಲ್ಪೆರೆ ಕಿರಾತರೂಪೊಡು ಬತ್ತ್‌ದೆರ್ಂದ್ ತೆರಿದ್ ಅರ್ಜುನೆ ಉಮಾಮಹೇಶ್ವರನ ಪಾದೊಗು ಅಡ್ಡ ಬೂರುವೆ. ಅರ್ಜುನನ ಭಕ್ತಿಗ್ ಮೆಚ್ಚಿದ್ ಅರ್ಧನಾರೀಶ್ವರೆ ಪಾರ್ಥಗ್ ಪಾಶುಪತಾಸ್ತ್ರೊನು ಕೊರ್ದು ಕೈಲಾಸಗ್ ಪಿರ ಪೋಪೆರ್. ಮಹಾದೇವನ ಈ ರೂಪನೇ ಆಟಿ ತಿಂಗೊಲುಡು ಇಲ್ಲ್ ಇಲ್ಲ್ ಬತ್ತ್‌ದ್ ಜನೊಕುಲೆನ ಕಷ್ಟ ನಿವಾರಣೆ ಮಲ್ಪುಂಡು ಪನ್ಪಿ ನಂಬಿಕೆ.