ಮಹಿಳಾ ಪೊಲೀಸ್
ಮಹಿಳಾ ಪೊಲೀಸ್ ಪೊಲೀಸ್ ಇಲಾಖೆಡ್ ಮಹಿಳೆಯೆರ್‌ಲಾ ಇನಿ ಪುರುಷೆರೆಗ್ ಸಮನಾದ್ ದುಡಿಮೆ ಮಲ್ತೊಂಡು ಉಲ್ಲೆರ್. ಗಸ್ತು, ಬಂದೋಬಸ್ತ್, ಪಾಳಿ, ರೋಲ್ ಕಾಲ್, ಎಸ್ಕಾರ್ಟ್ ಇಂಚಿನ ಮಾತ ಕೆಲಸೊಲು ಇನಿ ಮಹಿಳೆಗ್‌ಲಾ ಸಲೀಸ್.
ಪರಿಚಯ
ಸಂಪೊಲಿಪುಲೆ- ಸಮಾಜೊಗು ಅತ್ಯಂತ ಕೈತಲಾಯಿನ ಸಾರ್ವಜನಿಕ ಸೇವಾ ಕ್ಶೇತ್ರ ಪಂಡ ಅವು ಪೊಲೀಸ್ ಇಲಾಖೆ. ಆಂಡ ಜನಕುಲೆಗಾದ್ ಏತೇ ಬೆಂದ್ಂಡಲಾ ಮಾನಸಿಕವಾದ್ ಜನಕುಲೆರ್ದ್ ದೂರನೇ ಉಪ್ಪೊಡಾಯಿನ ಪರಿಸರ ಪೊಲೀಸ್‌ದಕುಲೆನವು. ಕರ್ತವ್ಯ ಬೊಕ್ಕ ಮುಲಾಜ್ ಇಜ್ಜಂದೆ ನಿಭಾಯಿಸೊಡಾಯಿನ ಜವಾಬ್ದಾರಿದ ಕಾರಣೊರ್ದು ಎತೋ ಸರ್ತಿ ಪೋಲಿಸ್ "ಜನಸ್ನೇಹಿ ಅತ್ತ್' ಪಂದ್ ಪನೊಡಾಪುಂಡು.
- ಇಂಚಿನ ಸಂದರ್ಭೊಡು ಮಹಿಳೆಯೆರ್ ಪೋಲಿಸ್ ಅಂಡ ಪೋಲಿಸ್ ಕೆಲಸೊಗು ಅಂಟ್‌ದ್ ಉಪ್ಪುನ ಈ ಕುರೆನ್ ಸುಲಭವಾದ್ ದೆಕ್ಕೊಲಿ.'ಅಪರಾದ ಮುಕ್ತ ಸಮಾಜ ನಿರ್ಮಾಣ ಒಂಜಿ ಆದರ್ಶ.' ಈ ಪಾತೆರ ಪೊಲೀಸ್ ಇಲಾಖೆದ ದ್ಯೇಯ ಮಂತ್ರ. ಉಂದೆನ್ ಸಾರ್ವಜನಿಕೆರ್ ಪಾಲಿಸೊಡಾಯಿನವು ಧರ್ಮ.
- ಈ ಧರ್ಮ-ನ್ಯಾಯೊಲೆನ ನಡುಟ್ಟು ಉಂತ್‌ದ್ ಉಪ್ಪುನ ಕೋಟಿ ಕೋಟಿ ಜನಕುಲೆಗ್ ರಕ್ಶಣೆ, ಭದ್ರತೆ ಒದಗಿಸುನ ಈ ಪೋಲಿಸ್ ಇಲಾಖೆಡ್ ಮಹಿಳೆಯೆರ್ ಇನಿ ಪುರುಷೆರೆಗ್ ಸಮನಾದ್ ದುಡಿಮೆ ಮಲ್ತೊಂದು ಉಲ್ಲೆರ್. ಗಸ್ತು, ಬಂದೋಬಸ್ತ್, ಪಾಳಿ, ರೋಲ್ ಕಾಲ್, ಎಸ್ಕಾರ್ಟ್ ಈ ಮಾತ ಕೆಲಸೊಲು ಇನಿ ಮಹಿಳೆಗ್‌ಲಾ ಸಲೀಸ್ ಆದ್ ಪೋತ್ಂಡ್.
- ದುಂಬು ಪೂರ ಪೊಲೀಸ್ ಕೆಲಸ ಪಂಡ ಅವು ಪುರುಷೆರೆಗ್ ಮಾತ್ರ ಪನ್ಪುನ ಭಾವನೆ ಇತ್ತ್ಂಡ್. ಆಂಡ ಇತ್ತೆ ಹಲವು ಮಹಿಳಾ ಪೊಲೀಸ್ ಇಲಾಖೆಡ್ ಮಹಿಳೆಯೆರೆಗ್ ಶೇಕಡಾ ೩೩ದಾತ್‌ ಮೀಸಲಾತಿನ್ ಕೊರಿಯೆರೆ ಸರ್ಕಾರ ನಿರ್ದಾರ ಮಲ್ತ್ದ್ಂಡ್. ಅಯಿತ್ತ ಮೂಲಕ ಠಾಣೆಲೆನ್ ನನಲಾತ್ ಜನಸ್ನೇಹಿ ಆಪುನಂಚ ಮಲ್ಪುನವು, ಸಮಾಜೊಡು ಮಹಿಳೆಯೆರೆನ ಮನಸ್ಥೆರ್ಯೊನು ಎಚ್ಚ ಮಲ್ಪೊಲಿ.
ಅಪರಾಧ ತನಿಖೆ
ಸಂಪೊಲಿಪುಲೆ- ಬೊಲ್ಪುಗು ಲಕ್ಕ್‌ದ್ ಪತ್ರಿಕೆನ್ ಓದ್‌ನಗ ಅತ್ಯಾಚಾರ, ದೌರ್ಜನ್ಯದವೇ ಸುದ್ಡಿ. ಅಯಿಟ್‌ಲಾ ಬಹುತೇಕ ಮಾತ ದೌರ್ಜನ್ಯೊಲೆಗ್ ಗುರಿ ಅಪುನಕುಲು ಮಹಿಳೆನಕುಲೇ. ಟಿವಿ ಆನ್ ಮಲ್ತ್ಂಡ ಯಾವು, ಅಪರಾದ ಸುದ್ದಿಲೆನ ಸರಮಾಲೆ, ಅಲ್ಪಲಾ ವ್ಯವಸ್ಥೆದ ಬಲಿಪಶುಕುಲು ಮಹಿಳೆನಕುಲೇ. ಮಹಿಳೆಯೆರೆನ ಮಿತ್ತ್‌ದ ಈ ದೌರ್ಜನ್ಯೊಲೆನ್ ತಡೆಗಟ್ಟುನ ಸಾದಿ ದಾದ?
- ಮಹಿಳೆಯೆರ್ ಉಪ್ಪುನ ಪೊಲೀಸ್ ಠಾಣೆಲೆನ್ ಎಚ್ಚಾದ್ ಸುರು ಮಲ್ತ್ಂಡ ದಾದ ಆಂಡಲಾ ಸುದಾರಣೆ ಆಯೆರೆ ಸಾಧ್ಯ ಉಂಡ? ಪೊಲೀಸ್ ಪಡೆಟ್ಟ್ ಮಹಿಳೆಯೆರೇ ಎಚ್ಚಾದ್ ಇತ್ತ್ಂಡ ದೌರ್ಜನ್ಯದ ಪ್ರಕರಣೊಲು ಕಡಿಮೆ ಅಪುನ ಸಾಧ್ಯತೆ ಎಚ್ಚ ಉಪ್ಪು?
- ಪೊಲೀಸ್ ಇಲಾಖೆಗ್ ಪುರುಷರ್‌ ಆತೇ ಫಿಟ್ ಪನ್ಪುನವು ಪಿರಾಕ್‍ದ ಕಾಲದ ಪರಿಕಲ್ಪನೆ ಅತೇ .
- ಇನಿ ಸಾವಿರಾರ್ ಜನ ಮಹಿಳಾ ಪೋಲಿಸ್‌ನಕುಲು ಇಲಾಖೆದ ವಿವಿದ ಹಂತಲೆಡ್ ದುಡಿಮೆ ಮಲ್ತೊಂದು ಇತ್ತ್‌ದ್ ಕೊಲೆ, ದರೋಡೆ, ಅಪಘಾತ, ಅತ್ಯಾಚಾರೊಲೆದಂಚಿನ ಸಮಾಜಘಾತುಕ ಕೃತ್ಯೊಲು ನಡತ್ತ್‌ನಪಗ ಓವ್ವೇ ಸಮಯೊಡುಲಾ ದುಂಬು ಪಿರ ತೂವಂದೆ ನಿಭಾಯಿಸುನ ಛಾತಿನ್ ಪಡೆವೊಂದೆರ್.
- 'ಯುನಿಫಾರ್ಮ್‌‍ದ ಬಲನೇ ನಂಕ್ ಒಂಜಿ ರೀತಿದ ಧೈರ್ಯ ಕನಪುಂಡು.' ಪನ್ಪುನವು ಹಿರಿಯ ಮಹಿಳಾ ಪೋಲಿಸ ಅಧಿಕಾರಿ ಒರಿ ಪಂಡ್‌ನ ಪಾತೆರ. ಎಂಚಿನ ಸಂದರ್ಭೊಡುಲಾ ಎದೆಗುಂದಂದೆ 'ಪರಿಸ್ಥಿತಿನ್ ನಿಯಂತ್ರಿಸುನ ಚಾಕಚಕ್ಯತೆ ಇನಿ ಪೊಲೀಸ್ ಇಲಾಖೆಡ್ ಕರ್ತವ್ಯ ನಿರ್ವಹಿಸುನ ಮಹಿಳೆನಕುಲೆಗ್ ಉಂಡು ಪನ್ಪುನೆನ್ ಧ್ವನಿಸವುಂಡು.
- ಕೆಲವು ಸಂದರ್ಭೊಡು ಮಹಿಳೆಯೆರೆನ ಸಂಕೋಚ ಸ್ವಭಾವ ಬೊಕ್ಕ ದೂರು ಕೊರ್ಂಡ ಓಲು ಮಾನ ಹರಾಜ್ ಆದ್ ಪೋವ ಪನ್ಪುನ ಪೋಡಿಗೆಡ್ ಇನಿ ಮಸ್ತ್ ಪ್ರಕರಣೊಲೆಡ್‍ ಮಹಿಳೆಯೆರ್ ಪೊಲೀಸ್ ಠಾಣೆ ಮುಟ್ಟ ಪೋಪುನೆನೇ ಇಜ್ಜಿ. ಲೈಂಗಿಕ ದೌರ್ಜನ್ಯ ಬೊಕ್ಕ ಹಿಂಸೆಗ್ ಒಳಗಾಯಿನ ಮಹಿಳೆಯೆರ್ ಅಯಿನ್‌ ಮೌನವಾದ್ ನುಂಗೊಂದು ಜೀವನ ನಡಪಾಪುನವು ಸತ್ಯ.
- ಮಹಿಳೆಯೆರೆನ ಇಂಚಿನ ಮನೋಭಾವೊನು ಬದಲಾಯಿಸಿಯೆರೆ ಇನಿ ಮಹಿಳಾ ಪೊಲೀಸ್ ಪಣ ಪತ್ತ್‌ದೆರ್. ರಾಜ್ಯೊಡು ಸದ್ಯೊಗು ಉಪ್ಪುನ ಪೊಲೀಸ್ ಪಡೆಟ್ಟ್ ಮಹಿಳೆಯೆರೆನ ಸಂಖ್ಯೆ ದಾಲಾ ಯಾವಂದ್. ಕೈತಲ್‌ದ ರಾಜ್ಯೊಲೆಡ್‍ ನಮರ್ದ್ ಹೆಚ್ಚಿನ ಸಂಖ್ಯೆಡ್ ಮಹಿಳಾ ಪೊಲೀಸ್‌ದಕುಲು ಉಲ್ಲೆರ್. ೩೦೦೦ ಮಹಿಳಾ ಪೊಲೀಸ್‌ದಕುಲೆನ್ ನೇಮಿಸಯೆರೆ ಇತ್ತೀಚಿಗ್ ರಾಜ್ಯ ಸರ್ಕಾರ ನಿರ್ಧಾರ ಮಲ್ತ್ದ್ಂಡ್.
- ಈ ನೇಮಕಾತಿ ಶೀಘ್ರವಾದ್ ನಡಪೊಡು. ಕೈತಲ್‌ದ ರಾಜ್ಯೊಲು ಮಹಿಳಾ ಪೊಲೀಸ್ ನೇಮಕಾತಿಡ್ ನಮರ್ದ್ ದುಂಬು ಉಂಡು. ಕರ್ನಾಟಕೊಡು ಸದ್ಯೊಗು ಒಟ್ಟು ೮೯೪೫ ಮಹಿಳಾ ಪೊಲೀಸ್‌ದಕುಲು ಉಲ್ಲೆರ್. ಆಂಡ ತಮಿಳುನಾಡ್‌ಡ್ ಮಹಿಳಾ ಪೊಲೀಸ್ದಕುಲೆನ ಸಂಖ್ಯೆ ೧೧೫೯೦ ಕಡತ್‌ದ್ಂಡ್. ದೆಹಲಿದಂಚಿನ ಎಲ್ಯ ರಾಜ್ಯೊಡುಲಾ ಒಟ್ಟು ೫೨೮೫ ಮಹಿಳಾ ಪೊಲೀಸ್‌ದಕುಲು ಉಲ್ಲೆರ್.
- ಮಹಾರಾಷ್ಟ್ರೊಡು ಮಹಿಳಾ ಪೊಲೀಸ್ದಕುಲೆನ ಸಂಖ್ಯೆ ೧೦೮೦೯ ಉಂಡು ಪಂದ್ ಅಂಕಿ ಅಂಶ ಪನ್ಪುಂಡು. ಅಂಚಾದ್ ಕರ್ನಾಟಕೊಡುಲಾ ಮಹಿಳಾ ಪೊಲೀಸ್ದಕುಲೆನ ಸಂಖ್ಯೆ ಹೆಚ್ಚಿಸವೊಡಾಯಿನ ಅಗತ್ಯ ಉಂಡು. ಆಂಡ ಉತ್ತರದ ಕೆಲವು ರಾಜ್ಯೊಲೆಗ್ ಹೋಲಿಸಾಮಡ ಕರ್ನಾಟಕೊಡು ಮಹಿಳಾ ಪೊಲೀಸ್ದಕುಲೆನ ಸಂಖ್ಯೆ ಎಚ್ಚ ಉಂಡು.
ಮಹಿಳೆಯೆರೆನ ಮಿತ್ತ್‌ದ ದೌರ್ಜನ್ಯ
ಸಂಪೊಲಿಪುಲೆ- ಮಹಿಳೆಯೆರೆನ ಮಿತ್ತ್ ನಡಪುನ ದೌರ್ಜನ್ಯದ ಪ್ರಕರಣೊಲು ಎಚ್ಚಾಗದ್ ವರದಿ ಆವೊಂದು ಉಪ್ಪುನೆ ಬೆಂಗಳೂರುದಂಚಿನ ಮಹಾನಗರೊಡು. ಮಹಿಳಾ ಪೊಲೀಸ್ ಪ್ರಾತಿನಿದ್ಯ ಇತ್ತೆ ಕಡಿಮೆನೇ ಉಂಡು. ಬೆಂಗಳೂರುಡು ಇತ್ತೆ ಒಟ್ಟು ೬೯೯ ಪೊಲೀಸ್ ಸಬ್‌ ಇನ್ಸ್ಪೆಕ್ಟರ್ ಉಲ್ಲೆರ್, ಮಹಿಳಾ ಎಸ್ ಐನಕುಲೆನ ಸಂಖ್ಯೆ ಕೇವಲ ೩೪ ಮಾತ್ರ. ೩೩೮೦ ಫುರುಷ ಪೊಲೀಸ್ ಹೆಡ್ ಕಾನ್ಸ್ ಟೇಬಲ್ ನಕುಲು ಇತ್ತ್ಂಡ ಮಹಿಳಾ ಹೆಡ್ ಕಾನ್ಸ್ ಟೇಬಲ್ ಲೆನ ಸಂಖ್ಯೆ ೨೧೦ ಮಾತ್ರ.
- ೮೯೪೨ ಪುರುಷ ಕಾನ್ಸ್ ಟೇಬಲ್ ನಕುಲು ಇತ್ತ್ಂಡ, ಮಹಿಳಾ ಪೊಲೀಸ್‌ನಕುಲೆನ ಸಂಖ್ಯೆ ೭೫೫ ಮಾತ್ರ. ಈ ಸಂಖ್ಯೆ ಶೀಘ್ರವಾದ್ ಹೆಚ್ಚಾಂಡ ಮಾತ್ರ ಬೆಂಗಳೂರುಡು ಪೊಣ್ಣು ಜೋಕುಲೆನ ಮಿತ್ತ್ ನಡಪುನ ದೌರ್ಜನ್ಯೊಲೆನ ಸಂಖ್ಯೆ ಕಡಿಮೆ ಅವು. ಠಾಣೆಲೆಗ್ ಪೊಣ್ಣು ಜೋಕುಲ್ ಎಚ್ಚ ಧೈರ್ಯೊಡು ದೂರು ಕೊರಿಯೆರೆ ಬರೊಲಿ.