ಶಕುಂತಲಾ ದೇವಿ

ಶಕುಂತಲಾ ದೇವಿ ಮಾನವ ಕಂಪ್ಯೂಟರ್ ಪಂದ್ ಪುಗರ್ಮೆ ಗಳಿಸಿದ್ ವಿಶ್ವವಿಖ್ಯಾತೆರಾಯಿನ ಭಾರತೀಯ ಗಣಿತಶಾಸ್ತ್ರಜ್ಞೆ. ಬಾಲಪ್ರತಿಭೆಯಾದ್ ಬೊಲ್ಪುಗ್ ಬಯಿದಿನ ಮೇರ್ ಜ್ಯೋತಿಷ್ಯಶಾಸ್ತ್ರೊಡುಲ ವಿದ್ವಾಂಸರಾದ್ ಇತ್ತೆರ್.

ಶಕುಂತಲಾ ದೇವಿ (ನವೆಂಬರ್ 4, 1929 - ಏಪ್ರಿಲ್ 21, 2013)

ಶಕುಂತಲಾ ದೇವಿ, 1929ರ ನವೆಂಬರ್, 4 ಕ್ ಬೆಂಗಳೂರುಡ್ ಜಗತ್ತ್ ದ ಬೊಲ್ಪು ತೂಯೆರ್. ಮೆರೆನ ಪೊಪ್ಪ 'ಸಿ.ವಿ.ಎಸ್.ರಾಜಾರಾವ್', ಬೊಕ್ಕ ಪೆದಿನ ಅಪ್ಪೆ ,'ಸುಂದರಮ್ಮ'. ಶಕುಂತಲಾ ದೇವಿ ಅರೆನ ಜನನದ ಇಸವಿ ವಿವಾದಾಸ್ಪದೊಡುಂಡು. ಕೆಲವ್ ಪತ್ರಿಕೆಲು 1929 ಬೊಕ ಕೆಲವ್ 1939 ಪಂದ್ ದಾಖಲಿಸಾದೇರ್. ಶಕುಂತಲಾ ದೇವಿನ ಪೊಪ್ಪ ಪುರೋಹಿತರಾದಿತ್ತೆರ್. ಕೆಲವು ಸಮಯ ಆರ್, ಸರ್ಕಸ್ ಡ್‌ಲ ಕೆಲಸೊಡು ಇತ್ತೆರ್.

ಶಕುಂತಲಾದೇವಿ ಅರೆನ ಬಾಲ್ಯ

ಶಕುಂತಲಾದೇವಿ, ಎಲ್ಯಾ ಪ್ರಾಯೊಡೆ ಗಣಿತೊಡು ಮಸ್ತ್ ಆಸಕ್ತಿ ಇತ್ತುಂಡು .ಆರ್ ಮಸ್ತ್ ಪ್ರತಿಭಾನ್ವಿತೆರ್ಲಾ ಆದ್ ಇತ್ತೆರ್.ಅವೇತೊ ಗಣಿತದ ಸಮಸ್ಯೆಲೆನ್ ಬುಡುಪಾವುನೇಟ್ ಯಶಸ್ವಿಯಾದಿತ್ತೆರ್. ಎಲ್ಯಾಡ್ದಿಂಚಿ ಶಕುಂತಲಾದೇವಿ ಅರೆನ ಪ್ರತಿಭೆ,ಸಾಮಾನ್ಯ ಜನಕಲೆಗೂ ಅರ್ಥ ಆಪಿನಾತ್ ಜನಜನಿತವಾದು ಇತ್ತುಂಡು. ಪಾರಂಪರಿಕವಾದ್ ಬೈದಿನ ಪೌರೋಹಿತ್ಯ ವೃತ್ತಿನ್ ಮನ್ಪರೆ ಒಪ್ಪಂದೆ, ಮೆರೆನ ಆಪ್ಪ ದೇವಸ್ಥಾನಡು ಪೂಜಾರಿ ಆಪಿನೇನ್ ವಿರೋಧ ಮಂತ್,ಸರ್ಕಸ್ ಕಂಪೆನಿಯೊಂಜೆಟ್ ಕೆಲಸಕ್ ಸೇರುದಿತ್ತೇರ್. ಮಗಳ್ಗ್ 'ಇಸ್ಪೀಟ್ ಇರೆ'ಟ್ ಮನ್ಪುನ ಕೆಲವು ಕೈಚಳಕಲೆನು ತರಬೇತು ಕೊರ್ದು ಇತ್ತೆರ್. ಆಪ್ಪನ ಈ ಪ್ರತಿಭೆ, ಎಲ್ಯಾ ಪೊಣ್ಣು ಬಾಲೆ ಆಯಿನ ಶಕುಂತಲಾರೆನ ಮಿತ್ತ್ ಅದ್ಭುತವಾಯಿನ ಪರಿಣಾಮ ಬೀರ್ ದ್ ಇತ್ತುಂಡು.‌ನೆಡುದ್ ಬೊಕ್ಕ, ಆ ಕಿನ್ಯ ವರುಷದ ಬಾಲೆದ ಪ್ರತಿಭೆ ನ್ ಅರ್ಥ ಮಂದಿನ ಮೆರೆನ ಪೊಪ್ಪ, ಮಗಳ್‌ನ ಇಷ್ಟದ ವಿಷಯೊದ ಬಗ್ಗೆನೇ ಹೆಚ್ಚಾದ್ ತರಬೇತಿ ಕೊರೊಂದು ಕಾಲ ಕಳೆಯುವೊಂದು ಇತ್ತೆರ್. ಶಕುಂತಲಾ ದೇವಿಗ್ ಐನ್ ವರ್ಷ ತುಂಬುನ ಕಾಲೋಗ್, ಅಂಕೆದೊಟ್ಟು ಗೊಬ್ಬುನ ಅಲೆನ ಸಾಮರ್ಥ್ಯ ನ್ ಅರ್ಥ ಮಂತಿನ ಅರೆನ ಅಮ್ಮೇರ್ ಸರ್ಕಸ್ ಕಂಪೆನಿ ಬುಡ್ದು, ಮಗಳ್ನ ಗಣಿತದ ಜ್ಞಾನ ಪ್ರದರ್ಶನದ ಮೇಳ ಪ್ರಾರಂಭ ಮಂತೇರ್.

ಮೈಸೂರು ವಿಶ್ವವಿದ್ಯಾಲಯೊದ ಪ್ರದರ್ಶನ

ಮೈಸೂರು ವಿಶ್ವವಿದ್ಯಾಲಯೊಡು ಮಾ ಮಲ್ಲ ಪ್ರದರ್ಶನ ನಡಪಾನಗ ಈ ನಮ್ಮ `ಮಾನವ ಕಂಪ್ಯೂಟರ್'ಗ್ ಖಾಲಿ ಆಜಿ ವರ್ಷ . ಸಂಖ್ಯೆದೊಟ್ಟು ಸರಸೊ ಗೊಬ್ಬುನ ಪಂಡ ಮೆರೆಗ್ ನೀರ್ ಪರ್ಪಿನಾತ್ ಸುಲಭ ಆದು ಇತ್ತುಂಡು. ಸಂಖ್ಯೆಲು ಶಕುಂತಲಾರೆಗ್ ಮಸ್ತ್ ಖುಷಿ ಕೊರೊಂದು ಇತ್ತುಂಡು. ಲೀಲಾ ಜಾಲವಾದ್ ಸಂಖ್ಯೆದೊಟ್ಟು ಗೊಬ್ಬೊಂದು ಇತ್ತಿನ ಮೆರೆಗ್, ಆಜಿನೆ ವರ್ಷ ಪ್ರಾಯೊಡು 'ಮೈಸೂರ್ ವಿಶ್ವವಿದ್ಯಾಲಯೊದ ಸಭಾಂಗಣಡ್ ಒಂಜಿ ಕಿನ್ಯ ಪ್ರದರ್ಶನ ಕೊರಿಯೆರ್. 13 ಡ್ದ್ 2೦೦ ಮುಟ್ಟ ಸಂಖ್ಯೆಲೆನ್ ದೀದ್ ಗುಣಾಕಾರ, ಭಾಗಾಕಾರ, ವರ್ಗಮೂಲ,ಘನಮೂಲ ಅಂಚಿನ ಮತ ಒವ್ವೆ ಗಣಿತದ ಸಮಸ್ಯೆಲೆನು ಬಾರೀ ಸರಳವಾದ್ ಬುಡುಪಾವೊಂದು ಇತ್ತಿನಿ ಅರೆನ ವಿಶೇಷ ಗುಣವಾದಿತ್ತುಂಡು.ಈತ್ ಎಲ್ಯ ಪೊಣ್ಣು ಬಾಲೆದ ಪಾಂಡಿತ್ಯನ್ ತೂದು ಜನಕುಲೆಗ್ ಆಶ್ಚರ್ಯವಾದಿತ್ತುಂಡು. ಇಂಚ ಕಾಲಕ್ರಮೊಟು ಮಸ್ತ್ ಎತ್ತರಗ್ ಪೋದು, ಅರೆನ ಲೆಕ್ಕದ ಕೀರ್ತಿ ಆಕ್ಕಸ ಮುಟ್ಟ ಮುಟ್ಟುಂಡು.

ಲಂಡನ್ ನಗರೊದ ಪ್ರದರ್ಶನ ಬೊಕ್ಕ ನರಮಾನಿ ಕಂಪ್ಯೂಟರ್ ಪನ್ದ್ ಪುಗರ್ತೆ

ಶಕುಂತಲಾದೇವಿನ 15 ವರ್ಷೊಡು, ಲಂಡನ್ ನಗರೊಡು ಕೊರಿನ ಪ್ರದರ್ಶನ, ಅಲ್ಪದ ಪಂಡಿತೆರ್ ಡ ಶಹಬ್ಬಾಸ್ ಪಡೇಯೆರ್. ಈ ಪ್ರದರ್ಶನ ಅರೆನ ಜೀವನೊಡು ಅತೀ ಮಹತ್ವ ಆದ್ ಇತ್ತುಂಡು. ಆ ಕೂಡಲೇ ಆರ್ ವಿಶ್ವವಿಖ್ಯಾತರಾದ್ ಪೋಯೆರ್. ತನ್ನ 3ನೇ ವರ್ಷೊಡುದಿಂಚಿ ಅರೆನ ಪೊಪ್ಪನೊಟ್ಟು ಸರ್ಕಸ್ ಬೇತೆ ಬೇತೆ ಅಭ್ಯಾಸ ಇತ್ತಿನೇಡ್ದಾತರ ಶಾಲೆ, ಕಾಲೇಜುಗ್ ಪೋಪಿನ ತೀವ್ರತೆನೇ ಇತ್ತುಜಿ. ಅವು ಏತೋ ಪದವಿಲೆನ್ ಗಳಿಸಿದಿನ ಪಂಡಿತೆರ್ಲಾ ಶಕುಂತಲಾ ದೇವಿನ ಎದುರು ಅಕಲೆನ ಸೋಲುನು ಒಪ್ಪುದು ಇತ್ತೆರ್. 1977 ಇಸವಿ ಡ್ ವಿಶ್ವದ ಮಾ ಮಲ್ಲ ವೇದಿಕೆ ಡ್ , ಪ್ರತಿಷ್ಠಿತ ಗಣಿತದ ಪಂಡಿತೆರ್ ನಕ್ಲನ ಸಮ್ಮುಖಡ್ 201 ಸಂಖ್ಯೆಲುನ ಅಂಕೆ ಒಂಜೆತ ವರ್ಗಮೂಲನ್ ಚಿಟಿಕೆ ಹಾಕೊಡು ದುಂಬು ನಾಡ್ ಪತ್ತುದು ಕಪ್ಪು ಪಲಾಯಿದ ಮಿತ್ತು ಬರೆದ್ ಅವೆನೊಂಜಿ ಐತಿಹಾಸಿಕ ಪ್ರದರ್ಶನ ಮಂತೆರ್. ಆ ಪ್ರದರ್ಶನ ಅರೆಗ್ ಮಸ್ತ್ ಮನ್ನಣೆ, ಗೌರವೊನು ಕಂತು ಕೊರುಂಡು.ಆದಗ ಉತ್ತರ ಕಂಡ್ ಪತ್ತರೆ ಆರ್ ದೆತ್ತೊನುನ ಸಮಯ ಕೇವಲ 50 ಸೆಕೆಂಡ್. ಅದಗದ ಪ್ರಬಲವಾಯಿನ ಕಂಪ್ಯೂಟರ್' ಅವ್ವೇ ಕೆಲಸಗ್ 62 ಸೆಕೆಂಡ್ ಕಾಲ ದೆತ್ತೊಂದು ಇತ್ತುಂಡು. ಕಂಪ್ಯೂಟರ್ ಡ್ ದುಲ ವೇಗವಾದ್ ಲೆಕ್ಕ ಮನ್ಪುನ ವ್ಯಕ್ತಿ ಪನ್ಪಿನ ಹೆಗ್ಗಳಿಕೆ ಅರೆಗ್ ಒದಗ್ ದ್ ಬತ್ತುಂಡು. ಆ ದಿನೊದ ಬೊಕ್ಕ ಅರೆನ್ 'ನರಮಾನಿ ಕಂಪ್ಯೂಟರ್ ಪಂದೇ, ಇತ್ತೆಗ್ ಲಾ ಸಂಬೋಧನೆ ಮನ್ಪುವೆರ್.

ಗಿನ್ನಿಸ್ ಬುಕ್ ಆಫ್ ರೆಕಾರ್ಡ್ಸ್

ಇಂಚೇನೇ ವರ್ಷಾನುಗಟ್ಟಲೆ ಈ ಹವ್ಯಾಸಲೆನ್ ಜಾರಿಡ್ ದೀದ್ ವಿಶ್ವದ ಅವೇತೋ ದೇಶದ ವಿಶ್ವವಿದ್ಯಾಲಯೊಡ್ ಆಹ್ವಾನ ದೆತ್ತೊಂದು ಪ್ರದರ್ಶನ ಕೊರಿಯೆರ್. ಇಂಚಾ ಶಕುಂತಲಾದೇವಿ, ಅರೆನ ಪ್ರದರ್ಶನಲೆನು ಕೊರೊಂದು ಮಸ್ತ್ ಪುಗರ್ಮೆ ಪಡೆಯೆರ್. 'ಗಿನ್ನಿಸ್ ಬುಕ್ ಆಫ್ ರೆಕಾರ್ಡ್ಸ್' ಡ್ ಆರ್ ಅರೆನ ದಾಖಲೆಯೊಂಜೆನ್ ಸಾಧಿಸಸಾದ್ , ದಾಖಲಿ ಬರೆಯೆರ್. ವಿಶ್ವದ ಅವೇತೋ ಪುಗರ್ಮೆದ ವಿಶ್ವವಿದ್ಯಾಲಯೊಡು ಅರೆನ ಪ್ರದರ್ಶನೊಲು ಸತತವಾದ್ ನಡ್ತೊಂದು ಇತ್ತುಂಡು. 1977ಡ್ ಡಲ್ಲಾಸ್‌‌ಡ್ 188132517 ವರ್ಗಮೂಲನ್ ಏತೋ ಬೇಗ ನಾಡ್ ಪತ್ತುದು, ಕಂಪ್ಯೂಟರ್‌ನ್ಲ ಪಿರ ಪಾಡ್ದ್ ಗೆ೦ದುದು ಇತ್ತೆರ್. ಕುಡೋರ ಅಮೇರಿಕಾದ ವಿಶ್ವವಿದ್ಯಾಲಯೊಡು ಅರೆಗ್ *Find the value of x (√x23 = ..) ‍x23 = 91674867692003915809866092758538016248310668014430862240712651642793465704086709659 3279205767480806790022783016354924852380335745316935111903596577547340075681688305 620821016129132845564805780158806771 ದ 23ನೇ ವರ್ಗಮೂಲ ನಾಡ್ ಪತ್ತರೆ ಪಂಡೆರ್. ಉಂದು ಆರ್ 50 ಸೆಕೆಂಡುಡ್ ಉತ್ತರಿಸಾದೇರ್. . ಅರೆನ ಉತ್ತರೊ 546372891(x=546372891) ನ್ ಧೃಡಪಡಿಸಲ್ UNIVAC 1108 ಕಂಪ್ಯೂಟರ್ ಒಂಜಿ ನಿಮಿಷ ಕಾಲಾವಕಾಶ ತೆದೆತುನುಂಡು (ಶಕುಂತಲಾ ದೇವಿಡ್ದ್ 10 ಸೆಕೆಂಡ್ ಜಾಸ್ತಿ

1980ರ ಜೂನ್ 18 ಆನಿ , ಲಂಡನ್ನಿನ ಇಂಪೀರಿಯಲ್ ಕಾಲೇಜಿಡ್ 7,686,369,774,870 ಸಂಖ್ಯೆಡ್ದ್ 2,465,099,745, 779 ಸಂಖ್ಯೆನ್ ಗುಣಿಸುನ ಸವಾಲುನ್ ಕೊರಿಯೆರ್. ಉಂದೆಕ್ 28 ಸೆಕೆಂಡುಡ್ 18,947,668,177,995,426,462,773,730 ಪಂದ್ ಶಕುಂತಲಾದೇವಿ ಉತ್ತರ ಕೊರಿಯೆರ್. ಈ ಸಂದರ್ಭನ್ ಗಿನ್ನೀಸ್ ಬುಕ್ ಆಫ್ ರೆಕಾರ್ಡ್ಸ್‌ಡ್ 1995ಟ್ ನಮೂದಿಸಾದೇರ್.

ಶಾಲೆಡ್ದ್ ಪಿದಾಯಿ ಪಾಡಿನ್ ಕತೆ

ಬಾಲ್ಯೊಡು ಬೆಂಗಳೂರ್ದ ಗವಿಪುರಂ ಗುಟ್ಟಹಳ್ಳಿದ ಕೊಳಚೆ ಪ್ರದೇಶೊಡು ವಾಸ ಮಂತೊಂದು ಇತ್ತೀನ ಅರೆನ ಬಡ ಪರಿವಾರ, ಅವೇತೋ ಕಷ್ಟ-ನಷ್ಟ ಅನುಭವಿಸಿದು ಇತ್ತುಂಡು. ಟೈಮ್ಸ್ ಆಫ್ ಇಂಡಿಯ' ಪತ್ರಿಗೆಗ್ ಕೊರ್ತಿನ ಸಂದರ್ಶನೊಡು ಶಕುಂತಲಾ ದೇವಿ ಅರೆನ ಪಾತೇರ ಕೆನಗ ಕರುಳು ಚುರುಕ್ ಪನ್ಪುಂಡು. ಅರೆಗ್ 10 ವರ್ಷ ಉಪ್ಪುನಗ ಅರೆನ ಪೊಪ್ಪ, ಶಕುಂತಲಾರೆನ್ , ಚಾಮರಾಜ ಪೇಟೆಡ್ ಇತ್ತಿನ 'ಸೇಂಟ್ ತೆರೇಸಾ ಕಾನ್ವೆಂಟ್ ಸ್ಕೂಲ್' ಗ್ ಒಂಜನೆ ತರಗತಿಗ್ ಸೇರಾಯೆರ್. ಪ್ರತಿ ತಿಂಗಳೂ 2 ರೂಪಾಯಿ ಫೀಸ್ ಕೊರ್ರೆ ಸಾಧ್ಯ ಆವಂದೆ, 3 ತಿಂಗಳೊದು ಬೊಕ್ಕ ಶಾಲೆಡ್ದ್ ಪಿದಾಯಿ ಪಾಡಿಯೇರ್ ಅಂಚಾ ಶಕುಂತಲಾದೇವಿಗ್ ಬಡವೆರ್ ಜೋಕುಲನ ಮಿತ್ತ್ ಮಸ್ತ್ ಅನುಕಂಪ ಇತ್ತುಂಡು. ಅರೆನ ಕೈಟ್ ಆಪೀನ ಸಹಾಯ ಮಂಪರೆ ಆರ್ ಎಪೋಲ ತಯಾರಾದಿತ್ತೆರ್. ಇಂಚ ಬಡತನದೊ ಬೇಗೆನ್ ಬಾಲ್ಯೊಡೇ ಅನುಭವಿಸಿದಿನ ಶಕುಂತಲಾದೇವಿ, ಬೊಕ್ಕ ಅರೆನ ಪರಿವಾರ ಹಣಕಾಸುದ ಬಗ್ಗೆ ಸಂತೃಪ್ತಿದ ಜೀವನ ಮಂತು ಇತ್ತೆರ್.

ಜ್ಯೋತಿಷ್ಯ ಶಾಸ್ತ್ರ ಬೊಕ್ಕ ಬರವಣಿಗೆ

ಜ್ಯೋತಿಷ್ಯ ಶಾಸ್ತ್ರ ಪಂಡ ಅರೆಗ್ ಮಸ್ತ್ ಪ್ರೀತಿದ ಕುಡ ಒಂಜಿ ವಿಷಯ. ಗಣಿತ, ಜ್ಯೋತಿಷ್ಯ ಶಾಸ್ತ್ರದೊಟ್ಟುದ ಜೊತೆ ಜೊತೆಗ್, ಅಟಿಲ್‌ಡ್‌ಲಾ ಮಸ್ತ್ ಇಷ್ಟ . ಬಗೆ ಬಗೆತ ಅಟಿಲು ದ ವಿಷಯದ ಬಗ್ಗೆ ಮಸ್ತ್ ಪುಸ್ತಕೊಲೆನ್ ಬರೆದ್ ಪ್ರಕಟ ಮಂದೇರ್. ಅವೇತೋ ಪೊಸ ಪೊಸ ಉಪಯೋಗ ಆಪಿನ ಮಾಹಿತಿಲೆನ್ ಆರ್ ಅರೆನ ಅಟಿಲುದ ಪುಸ್ತಕಗಲೆಡ್ ದಾಖಲಿಸಿದೇರ್. ಉಂದು ಅತ್ತಂದೆ,ಆರ್ 'ವ್ಯಕ್ತಿತ್ವೊ ವಿಕಸನ', 'ಜೋಕುಲೆನ ಬುದ್ಧಿ ಬೆಳವಣಿಗೆದ', ಬಗ್ಗೆ ಉಪನ್ಯಾಸಲೆನ್‌ಲಾ ಕೊರ್ತೆರು.

ಶಕುಂತಲಾ ದೇವಿ ಜ್ಯೋತಿಶಾಸ್ತ್ರಜ್ಞೆ‌ಲಾ ಆದಿತ್ತೇರ್, ಜನ್ಮದಿನ ಬೊಕ್ಕ ಪುಟ್ಟುದಿನ ಸಮಯ, ಪುಟ್ಟುದಿನ ಸ್ಥಳೊದ ಮಾಹಿತಿನ್ ದೆತ್ತೊಂದ್ ಜ್ಯೋತಿಷದ ಸಲಹೆ ಕೊರುಂದಿತ್ತೇರ್. ಖಗೋಳಶಾಸ್ತ್ರೊಡುಲ ಅರೆಗ್ ಸಿದ್ಧಿ ಇತ್ತುಂಡು. ಸ್ವಾದಿಷ್ಟವಾಯಿನ ಆಹಾರ ಖಾದ್ಯ ತಯಾರ್ ಮನ್ಪುನು ಅರೆನ ಖುಷಿದ ಹವ್ಯಾಸ ಆದಿತ್ತುಂಡು.

ಸ೦ಸಾರಿಕ ವಿಚಾರೊಲು

ಶಕುಂತಲಾ ದೇವಿ 1944ಡ್ 15 ವರ್ಷ ಉಪ್ಪುನಗ ಅರೆನ ಪೊಪ್ಪನೊಟ್ಟುಗ್ ಲಂಡನ್ಗ್ ಪೋದಿತ್ತೇರ್ . 1960ಕ್ ಭಾರತೊಗ್ ವಾಪಾಸ್ ಆಯೇರ್. ಆರ್ ಕೊಲ್ಕತ್ತಾದ ಐ.ಎ.ಎಸ್. ಆಫೀಸರಾಯಿನ ಪರಿತೋಷ ಬ್ಯಾನರ್ಜಿನ್ 1960ಡ್ ಮದ್ಮೆ ಆಯೇರ್ ಆಂಡಾ 1979 ಡ್ ವಿವಾಹ ವಿಶ್ಛೇದನ ದೆತ್ತೊಂದು ಬೆಂಗಳೂರುಗ್ ಪಿರ ಬತ್ತೆರ್. ಬೆಂಗಳೂರುಡು ಆರ್ ಜನಕುಲೆಗ್ ಬೊಕ್ಕ ಗಣ್ಯರೆಗು ಜ್ಯೋತಿಷದ ಸಲೆಹೆಗಾರರಾದ್ ಉದ್ಯೋಗ ಆರಂಭ ಮಂತೆರ್. ಅನುಪಮಾ ಅರೆನ ಒರ್ತಿಯೇ ಮಗಳ್, ಅರೆನ ಪೊಪ್ಪನ ಸಂಸ್ಥೆಡ್ ಡೈರೆಕ್ಟರಾದ್ ಉಲ್ಲೇರ್. ಶಕುಂತಲಾ ಅರೆನ ಕಂಡನಿ ಪರಿತೋಷ ಬ್ಯಾನರ್ಜೀ ಕೊಲ್ಕತ್ತಾಡ್ 2010ಡ್ ತೀರ್ ಪೋಯೇರ್. ಶಕುಂತಲಾದೇವಿ ಖಗೋಲ ಶಾಸ್ತ್ರ, ಜ್ಯೋತಿಷ ಶಾಸ್ತ್ರ , ಗಣಿತ ಶಾಸ್ತ್ರ ಉಂದೆತ ಪ್ರಸಾರಕ್ಕಾದ್ ವಿದ್ಯಾಫೌಂಡೇಶನ್ ಟ್ರಸ್ಟ್ ನ್ ಸ್ಥಾಪಿನೆ ಮಂದೆರ್. ಅರೆಗ್‌ ಜೀವಮಾನದ ಸಾಧನೆಗಾಗದ್ 2013 ಇಸವಿ ಮಾರ್ಚ್ಡ್ ಮುಂಬಯಿಡ್ ಮಾ‌ಮಲ್ಲ ಸನ್ಮಾನ ಮಂತೆರ್.

ಎಸ್.ಐ.ಐ.ಎಮ್.ಎಸ್ ಅಂಡ್ ಪಿಯು ಕಾಲೇಜ್‌ದ ಸ್ಥಾಪನೆ

ಬೆಂಗಳೂರಿದ ಎಚ್.ಎಸ್.ಆರ್.ಲೇಔಟ್‌ಡ್, 'ಶಕುಂತಲಾ ದೇವಿ ಇಂಟರ್ನಾಷನಲ್ ಇನ್‌ಸ್ಟಿ‌ಟ್ಯೂಟ್ ಆಫ್ ಮ್ಯಾನೇಜ್ಮೆಂಟ್ ಸೈನ್ಸ್ ಮತ್ತು ಪಿಯು ಕಾಲೇಜ್' ಪನ್ಪಿನ ಪ್ರತಿಷ್ಠಿತ ವಿದ್ಯಾ ಸಂಸ್ಥೆನ್ ಸ್ಥಾಪಿಸಾದ್ ನಡಪಾವೊಂದು ಇತ್ತೆರ್. ಈ ಸಂಸ್ಥೆ ಕೆಲವು ವಿಶೇಷ ಭಾರತದ ಮೌಲ್ಯಲೆನ್ ವಿದ್ಯಾರ್ಥಿಲೆಗ್ ಮನವರಿಕೆ ಮನ್ಪುನ ಕೆಲಸ ಮಂತೊಂದುಂಡು. ಮುಲ್ಪ 'ವೇದಿಕ್ ಮ್ಯಾಥೆಮ್ಯಾಟಿಕ್ಸ್' ಪನ್ಪಿನ ವಿಷಯೊದ ಬಗ್ಗೆ ಅವೆತೋ ಎಡ್ಡೆ ಕೆಲಸ ನಡದುಂಡು. 1969ಡ್ 'ಆ ವರ್ಷದ ಅತಿ ಮಹತ್ವದ ಮಹಿಳೆ' ಪನ್ಪಿನ ಪ್ರಶಸ್ತಿನ್ 'ಫಿಲಿಪೈನ್ಸ್ ವಿಶ್ವವಿದ್ಯಾಲಯ' ಪ್ರದಾನ ಮಲ್ತ್‌ದ್ಂಡ್. ಉಂದೆತ ಜತೆಗ್ 1988ಡ್ ಬ೦ಗಾರ್ ದ ಪದಕ ಸಹಿತ 'ರಾಮಾನುಜಮ್ ಮ್ಯಾಥೆಮೆಟಿಕಲ್ ಜೀನಿಯಸ್ ಪ್ರಶಸ್ತಿನ್ ಅಮೆರಿಕದ ವಾಶಿಂಗ್ಟನ್ ಡಿ.ಸಿ.ಡ್, ಅಪಗದ 'ಅಮೆರಿಕದಲ್ಲಿ ಭಾರತದ ರಾಯಭಾರಿನ ಕೈಟ್ ವಿತರಣೆ ಮಂತ್‌ದ್ ಇತ್ತೆರ್'.

ಮರೆಯಾಯಿನ ನರಮಾನಿ ಕಂಪ್ಯೂಟರ್

2005 ಟ್ ಅರೆಗ್ ತಿಗಲೆ ಬೇನೆ ತೋಜುದು ಬತ್ತುಂಡು,'ಹೃದಯೊದ ಆಪರೇಷನ್ ಮಂತೆರ್. ಆಪರೇಶನ್ ಆಯಿನ ಬೊಕ್ಕ, ವೈದ್ಯೊರೆನ ಸಲಹೆದ ಮೇರೆಗ್, ಪರ್ಯಟನೆ ಕಡಿಮೆ ಮಂತೆರ್. 'ಮಾನವ ಕಂಪ್ಯೂಟರ್' ಪಂದೇ ವಿಶ್ವಪ್ರಸಿದ್ಧರಾದು ಇತ್ತಿನ ಶಕುಂತಲಾದೇವೀ, ಏಪ್ರಿಲ್ 21, 2013ತ ರವಿವಾರ ಕಾಂಡೇ ಪೊಡ್ತು, 8:15ಕ್ ಹೃದಯಾಘಾತ ಆದ್ ಬೆಂಗಳೂರುದ ಆಸ್ಪತ್ರೆಡ್ ತೀರ್ ಪೋಯೆರ್.ಅರೆನ ಪಾರ್ಥಿವ ಶರೀರೊನು ಬಸವನಗುಡಿತ ಅರೆನ ನಿವಾಸಗ್ ಕಂತು, ಸಾರ್ವಜನಿಕ ದರ್ಶನಕ್ ದೀದು ಇತ್ತೆರ್. ಅವ್ವೆ ದಿನ ಸಾಯಂಕಾಲ 5:30ಕ್ ಸುಮಾರ್ ಗ್ ಬನಶಂಕರಿದ ಚಿತಾಗಾರೊಡು ಅರೆನ ಅಂತ್ಯ ಸಂಸ್ಕಾರ' ಆಂಡ್ .ಓರ್ತಿ ಮಗಳ್, ಮರ್ಮಯೆ. ರಡ್ಡ್ ಪೊಣ್ಣು ಪುಲ್ಲಿಲು ಸೇರುದು, ಅವೇತೋ ಅಪಾರ ಬಂಧು-ಬಳಗ, ಬೊಕ್ಕ ಶಿಷ್ಯ ವೃಂದದಕಲೆನ್ ಅರ್ ಬುಡ್ದು ಪೋತೆರ್.

ಗಣಿತದ ಲೊಖಡ್ ಶ್ರೀಮತಿ ಶಕುಂತಲಾ ದೇವಿನ ಪುದರ್ ಸೂರ್ಯ ಚಂದ್ರ ಉಪ್ಪುನ ಮುಟ್ಟ ಶಾಶ್ವತವಾದ್ ಉಪ್ಪುಂಡು.