ಸರ್ಪಕೋಲ

ಸರ್ಪಕೋಲ ಅತ್ತ್ಂಡ ನಾಗಕೋಲ ಪನ್ಪಿನ ಆರಾದನೆ ಸುದ್ದ ಜನಪದ ರುಪ ಆಯಿನವು. ಉಂದು ತುಳುನಾಡ್ದ ಸುಮಾರ್ ಕಡೆಟ್ಟ್ ನಡತೊಂದಿತ್ತ್ಂಡ್. ಕಾಸರಗೋಡು ಬಾಗೊದ ಬೈಲ ಬಾಕುಡೆರ್ ಉಂದೆನ್ ಆರಾದನೆ ಮಲ್ತೊಂದಿತ್ತೆರ್ ಅಂಚನೆ ನಲಿಕೆ ಜನಾಂಗದಕುಲು ಕೋಲ ಕಟ್ಟೊಂದಿತತೆರ್. ಈ ಕೋಲ ಸುಮಾರ್ ಕಡೆಟ್ ಪೂಕರೆತ್ತ ಸಮಯೊಡ್ ನಡತೊಂದಿತ್ತ್ಂಡ್. ಮೈಕ್ ಪೂರ ಮಂಜಲ್ ಪೂಜಿದ್ ಮಂಡೆಗ್ ಬುಕ್ಕ ಕೈಕ್ ಜಿಡೆ ಆಕಾರೊದ ನಾಗನ ರೂಪೊನು ಪಾರ್ದ್ ಕಂಡೊಡ್ ಕೋಲ ಕಟ್ಟೊಂದಿತ್ತೆರ್.

ಸರ್ಪಕೋಲ

ಪಶ್ಚಿಮ ಗಟ್ಟೊದ ಸಮುದ್ರೊದ ನಡುಟು ಇಪ್ಪುನವು ತುಳುನಾಡು, ತುಳುನಾಡ್‍ಡ್ ನಾಗಾರಾದನೆ ಬುಕ್ಕ ಬೂತಾರಾದನೆ ಪ್ರಸಿದ್ದ. ಮುಲ್ಪ ಇಪ್ಪುನ ಬಾಕುಡ ನಾಗಾರಾದನೆ ಪದ್ದತಿದ ಬಗ್ಗೆ ನನಲಾ ಏರೆಗ್ಲಾ ತೆರಿದಿಜಿ. ಬಾಕುಡೆರ್ ತುಳುನಾಡ್ದ ನಿವಾಸಿಲು. ಅಕುಲೆನ್ ದಿರಡೇರ್ ಪಂದ್ಲಾ ಲೆಪ್ಪುವೆರ್. ಈ ಮಣ್ಣ್ ದ ಹಕ್ಕುದಾರೆರ್ ನಮ ಪಂದ್ಲಾ ಅಕುಲು ಪನ್ಪೆರ್. ದಿರಡೇರ್ ಪನ್ಪಿನವು ದ್ರಾವಿಡ ಸಬ್ದೊದ ರೋಪೊ. ಬೈಲ್ ದ ಬರಿಟ್ ಇಲ್ಲ್ ಕಟ್‍ದ್ ಬೇಸಾಯ ಮಲ್ಪುನ ಮೊಕುಲೆನ್ ಬೈಲ ಬಾಕುಡೆರ್ ಪಂದ್ಲಾ ಲೆಪ್ಪುವೆರ್. ಬಾಕುಡೆರ್ ನಾಗನ್ ಆರಾದನೆ ಮಲ್ಪುನಕುಲು. ನಾಗ ಮೊಕುಲೆಗ್ ಕುಲ ದೈವ. ಕಾಸರಗೋಡು ಜಿಲ್ಲೆದ ಇಚಲಂಗೋಡುರ್ದ್ ಸುರು ಆಂಡ ದಕ್ಷಿಣ ಕನ್ನಡ ಜಿಲ್ಲೆದ ತಲಪಾಡಿ ಮುಟ್ಟ ಮೊಕುಲೆನ ಪದಿನೆಡ್ಮ ಜಾಗೆಲು ಉಲ್ಲ. ಮುಲ್ಪ ಮೊಕುಲು ನಾಗ ದೇವೆರೆಗ್ ಪೂಜೆ ಮಲ್ಪುವೆರ್. ಕೊಡೆಂಚಿರ್‌ ಡ್ ನಾಗನ ಉದ್ಭವ ಆತ್ಂಡ್, ಅಂಚಾದ್ ಕೊಡೆಂಚಿರ್ ಸುರೂತ ಜಾಗೆ ಪಂಡ್‍ದ್ ಪರಿಗನಿಸಾದೆರ್. ಅಡ್ಕ ಕಡೇತ ಜಾಗೆ.

ನಾಗಾರಾದನೆ ಪದ್ದತಿಲು

ತುಳುನಾಡ್‍ಡ್ ಸುಮಾರ್ ರೀತಿಡ್ ನಾಗ ದೇವೆರೆನ್ ಆರಾದನೆ ಮಲ್ಪುವೆರ್. ಸರ್ಪಸಂಸ್ಕಾರ, ನಾಗ ಪ್ರತಿಷ್ಠಾಪನೆ, ಬ್ರಹ್ಮ ಸಮಾರಾಧನೆ, ಸುಬ್ರಹ್ಮಣ್ಯ ಆರಾದನೆ, ಬ್ರಹ್ಮಚಾರಿ ಆರಾದನೆ ಇಂಚ ಸುಮಾರ್ ರೀತಿಡ್ ಆರಾದನೆ ಮಲ್ಪುವೆರ್. ಅಂಚನೇ ನಾಗಮಂಡಲ, ಡಕ್ಕೆ ಬಲಿ, ಆಶ್ಲೇಷ ಬಲಿ, ನಾಗದರ್ಶನ, ತಂಬಿಲ, ಪೇರ್ ದೀದ್ ಸೇವೆ ಉಂದು ತಾಂತ್ರಿಕ ಮೂಲ ಪದ್ದತಿಗಲು. ಪೇರ್ ಮಯ್ಪುನ, ಕಂಚಿಲು ಸೇವೆ, ಕಾಡ್ಯನಾಟೊ, ಪಾಣರಾಟ, ಬೆರ್ಮರೆ ಸೇವೆ, ಮಡೆಸ್ನಾನ, ಬೆರ್ಮರೆ ಕೋಲ, ಮೂರಿಲು ಆರಾದನೆ, ಸರ್ಪಕೋಲ, ನಾಗಕೋಲೊಲು ಜನಪದ ಮೂಲ ಆರಾದನಾ ಪದ್ದತಿಲು. ಸೀದ ನಾಗ ದೇವೆರೆನೇ ಉದ್ದೇಶಿಸಾದ್ ತುಳುನಾಡ್‍ದ ದೈವದ ನೆಲಟ್ಟ್ ಕೋಲ ಕೊರ್ದು ಆರಾದನೆ ಮಲ್ಪುನಕುಲು ಬಾಕುಡನಕುಲು. ಉಂದೆನ್ ಸರ್ಪಕೋಲ, ನಾಗನಲಿಕೆ, ಬೆರ್ಮರ್ ನಲಿಕೆ ಪಂಡ್‍ದ್ಲಾ ಲೆಪ್ಪುವೆರ್. ಪ್ರಾಚೀನ ಕಾಲೊಡ್ ಸರ್ಪೊನು ಮಾತ್ರ ಈ ಸಮುದಾಯ ಆರಾದನೆ ಮಲ್ತೊಂದಿತ್ತ್ಂಡ್.

ಬಾಕುಡೆರೆನ ಸರ್ಪಕೋಲ

ಕೋಲದ ದಿನ ಇಲ್ಲದಕುಲು ತಾರೆದ ಪಜ್ಜಿ ಮಡಲ್ಡ್ ಜೆಪ್ಪುನ ಸಂಪ್ರದಾಯ ಉಂಡು. ಪಂಡ ಬಾಕುಡೆರ್ ಪಜ್ಜಿ ಮಡಲ್ ಡ್ ಜೆತ್ತೊಂದಿತ್ತಿನ ಸಮಯೊರ್ದೇ ಸರ್ಪಾರಾದನೆ ಮಲ್ತೊಂದಿತ್ತೆರ್ ಪಂಡ್‍ದ್ ತೆರಿಯೊಲಿ. ಕೋಲೊಡ್ ಐನ್ ಶಕ್ತಿಲೆನ್ ಆರಾದಿಸಾವೆರ್: ಎಲ್ಯಕ್ಕೇರ್(ಎಲ್ಯ ಉಳ್ಳಾಲ್ತಿ), ನೇಲ್ಯಕ್ಕೇರ್ (ಮಲ್ಲ ಉಳ್ಳಾಲ್ತಿ), ಎಲ್ಯಣ್ಣೆರ್ (ಬೊಲುದು ಸಂಕಪಾಲ), ನೇಲ್ಯಣ್ಣೆರ್(ಕರಿಯ ಸಂಕಪಾಲ), ಕೃಷ್ಣಸರ್ಪ ಎಲ್ಯಕ್ಕೇರ್ ಬುಕ್ಕ ನೇಲ್ಯಕ್ಕೇರ್ ನಾಗ ಯಕ್ಷಿಲು. ಬೊಲುದುದ ಸಂಕಪಾಲ ಬುಕ್ಕ ಕರಿಯ ಸಂಕಪಾಲ ನಾಗ ಸ್ವರೂಪೊಲು ಆದಿತ್ತಿನಕುಲು 30-40 ಅಡಿ ಎತ್ತರೊದ ನಾಗಮುಡಿ ಪತ್ತುವೆರ್. ತ್ರಿಶಂಕು ಆಕಾರೊಡುಪ್ಪುನ ಉಂದು ಮಸ್ತ್ ದುನ್ನ ಇಪ್ಪುಂಡು. ಉಂದೆನ್ ಸಾರ ಪಾಲೆನ್ ಒಟ್ಟು ಮಲ್ತ್‍ದ್ ಮಲ್ಪುವೆರ್. ಮುಡಿಟ್ಟ್ ನೂದೆರ್ದಲಾ ಮಿತ್ತ್ ನಾಗನ ಜಿಡೆತ್ತ ಚಿತ್ರ ಇಪ್ಪುಂಡು. ಪಾತ್ರಿನ ಆಮೆಟ್ ಈ ಮೆಟ್ ರಡ್ಡ್ ಕಡೆಟ್ಲಾ ರಡ್ಡ್ ಜನ ಪತೊಂದುಪ್ಪುವೆರ್. ಬೊಲುದುದ ಸಂಕಪಾಲನೇ ನಾಗರಾಜ ಪಂದ್ ಬೂತೊಲೆನ ನಿಲೆಟ್ಟ್ ಆರಾದನೆ ಮಲ್ಪುವೆರ್. ನೆಲ್ಯಕ್ಕೇರ್ ನಾಗರಾಜೆರೆನ ಅಪ್ಪೆ, ಎಲ್ಯಕ್ಕೇರ್ ನಾಗರಾಜೆರೆನ ಸನ್ನಿದಿಗ್ ಸೇರ್ದ್ ದೈವತ್ವ ಪಡೆಯಿನ ಪಳ್ಳಿ ತೋಕುರು ಬಾಕುಡೆತಿ. ಈ ನಾಲ್ ಸರ್ಪರೂಪಿ ದೈವೊಲೆಗ್ ಕೋಲ ಕೊರ್ಪೆರ್. ನಲಿಕೆ ಜನಾಂಗದಕುಲು ಕೋಲ ಕಟ್ಟುವೆರ್.