ಸೊರಗೆದ ಪೂ

ಸುರಗೆಗ್ ಸುರಹೊನ್ನೆ, ಸುರಂಗಿ, ಸ್ವರ್ಗದ ಪೂ ಪಂದ್ ಲೆಪ್ಪುವೆರ್. ಮಮೀಯಾ ಸುರಿಗಾ ಪಂದ್ ಉಂದೆತ್ತ ಸಸ್ಯಶಾಸ್ತ್ರೀಯ ಪುದರ್. ರ್ಕ್ಯಾಲೊಫಿಲೇಸಿಯಾ ಕುಟಂಬದ ದೈ ಉಂದು. ಪಶ್ಚಿಮಗಟ್ಟದ ಕಾಡ್‌ಡ್ ಎಚ್ಚಾದ್ ತೋಜಿದ್ ಬರ್ಪುಂಡು. ರೆಂಜಿರ್ ಪೂತ್ತ ದೈತ್ತಂಚನೆ ಅಳಿದ್ ಪೋಪಿನ ಪೂತ್ತ ದೈಕುಲೆನ ಸಾಲ್‌ಡ್ ಸುರಗೆ ಪೂ ಸೇರ್ದುಂಡು.

ವಿಸೇಸೊ

ಸುರಗೆ ಪೂ ಪಂಡ ಕಮ್ಮೆನ ಇಪ್ಪುನ ಪೂ, ಮುಗುರು ಆನಗನೇ ಕಮ್ಮೆನ ಸುರು ಆಪುಂಡು. ಅರಳಿನ ಬೊಕ್ಕ ನನಲಾತ್ ಪರಿಮಳ ಬರ್ಪುಂಡು. ಅವೆನ್ ನುಂಗಾದ್ ಮಸ್ತು ದಿನ ದಿಂಡಲ ಅಂಚನೆ ಇಪ್ಪುಂಡು. ಸುರಗೆದ ಪೂತ್ತ ವಿಸೇಸೊ ಪಂಡ ಅವು ಬೇತೆ ಪೂರ್ತಿ ಲೆಕ್ಕ ಇರೆತ್ತ ಕೊಡಿಟ್ ಅರಳುನು ಅತ್. ದೈತ್ತ ಗೆಲ್ಲುದ ನಡುಟೈ ಪೂ ಬುಡ್ಪುಂಡು.

ತೂಯಾರ

ಅರಳ್ನಗ ಬೊಲ್ಲುದ ನಾಲ್ ಎಸಳ್ ಬೊಕ್ಕ ತೆಲ್ಪು ಮಂಜೋಲು ರಂಗ್‌ದ ಪರಾಗದ ಗೊಂಚಿಲ್ ಇತ್ದ್ ತೂವರೆ ಬಾರಿ ಪೋರ್ಲು ತೋಜುಂಡು.

ಬಗೆಕುಲು

ಸುರಗೆಡ್ ಆಣ್ ಮರ , ಪೊಣ್ಣು ಮರ ಪಂದ್ ರಡ್ಡ್ ವಿಧ ಉಪ್ಪುಂಡು. ಆಣ್ ಮರಟ್ಸ್ ಎಚ್ಚ ಪೂ ಆಪ್ಪುಜಿ. ಮರ ಬೊಕ್ಕ ಅಯಿತ ತೆಕ್ಕೆ ಗಟ್ಟಿ, ದಪ್ಪ. ಅಂಚೆನೆ ಪೊಣ್ಣು ಮರ ಮತ್ತೆ ಆಪುಜಿ. ಅರಳಿನ ಸೂಕ್ಕುಲೆಡ್ಲ ಆಣ್ ಪೂ, ಪೊಣ್ಣು ಪೂ ಪನ್ನಿನ ವ್ಯತ್ಯಾಸಿ ಉಂಡು, ಆಣ್ ಮರತ್ತ ಹೂ ಅರಳ್ಂಡ ನಡುತ್ತ ಗುಂಡು ಅರಳುಜಿ. ಪೊಣ್ಣು ಮರತ್ತ ದೈ ಆಂಡ ಪೂರ ಅರಳದ್ ನಿಲಿಕೆ ಕೇಸರಿ ದಿಂಜಿದುಪ್ಪುಂಡು.

ನಂಬೊಳಿಕೆ

ಸುರಗೆದ ಪೂನು ಪೊರ್ತು ಮೂಡೊಡ್ಡ ದುಂಬೆ ಕೊಯ್ದು ಕನವೊಡು, ಮುಕ್ಕೆ ಅರಳಿ ಬೊಕ್ಕ ಮಾಲೆ ಮಲ್ಪರೆ ಆಪುಜಿ. ಸುರಗೆದ ಮುಕ್ಕೆನ್ ಬಲ್ಡ್ ಕಟ್ಟರೆ ಆಪುಜಿ. ಅಯಿಕ್ ಒಂತೆ ಉದ್ದ ತೊಟ್ಟು ಸಮೇತ ಕೊಯ್ ಸೂಜಿಡ್ ನೈದ್ ಮಾಲೆ ಮಲ್ಪೊಡು. ಸುರಗೆದ ಪೂ ಈಶ್ವರ ದೇವೆರೆಗ್ ಅಂಚೆನೆ ದೇವಿಗ್ ಇಷ್ಟ ಪಂದ್ ಜಾನಪದ ಕತೆ ಪನುಂಡು. ಸುರೆಗದ ಮಾಲೆನ್ ಶಿವರಾತ್ರೆದಾನಿ ಈಶ್ವರ ದೇವೆರೆಗ್ ಸಮರ್ಪಣೆ ಮಲ್ತ್‌ದ್ ಪೊಂಜೊವುಲು ತರೆಕ್ಸ್ ದೀಂಡ ಭೂಮಿದೇವಿನ್ ದಿನೋಲೆ ಮೈಪುಡು ಅಡ್ಪುನೆತ್ತ ಪಾಪ ಪರಿಹಾರ ಆಪುಂಡು ಪನ್ನಿನವು ಜಾನಪದ ನಂಬೊಲಿಗೆ. ಯುಗಾದಿದ ಪೊರ್ತುಡು ದೇವೆರ್ ದೀಪಿನ ಶಾಸ್ರೊಡು ಸುರಗೆದ ಪೂಕ್ಕು ಬಾರಿ ಮಹತ್ವ ಉಂಡು, ಪೊಂಜೊವುಲು ಯುಗಾದಿದ ದುಂಬುನಾನಿ ರಾತ್ರೆಡ್ ದೇವರ ಎದುರು ಅರಿಯಾಣೋಡು ಬೋಳಂತೆ ಅರಿ, ಕೆರ್ಚಿದ ತಾರಾಯಿ, ತೌತೆ, ಗೋಂಕುದ ಬೀಜ ಇಂಚಿನೆನ್ ಮಾತಾ ಪ್ರೊಸ ಫಲತ್ತ ಸಂಕೇತವಾದ್ ದೀದ್ ಅಯಿತ ಎದುರು ಕನ್ನಡಿ ದೀದ್ ಸುರಗೆದ ಮಾಲೆ ಪಾಡ್ದ್ ಪಾಡ್ದ್ ದೀದ್ ಮನದಾನಿ ಇಲ್ಲದ ಪೊಂಜೋವುಲು ಬೇಗ ಲಕ್ದ್ ಮೀದ್ ದೇವೆರೆಗ್ ದೀಪ ದೀದ್, ಶಂಖ ಉರ್ತುದು ಅಯಿಟ್ ದೀತಿನ ಕನ್ನಡಿಡ್ ಮೋನೆ ತೂದು ದೇವೆರೆಗ್ ನಮಸ್ಕಾರ ಮಲ್ಲೊಡು. ಅಂಚೆನೆ ಬೊಕ್ಕ ಇಲ್ಲದಕುಲು ತೂಂಡ ಮಸ್ ಎಡ್ಡೆ ಪಲ್ಪಿನ ನಂಬೊಲಿಗೆ ನಮ್ಮ ತುಳುನಾಡ್, ಮಲೆನಾಡ್‍ಡ್ ಉಂಡು. ಬಂಜಿನಲೆಗ್ ಬಯಕೆ ಪಾಡ್ನಗ ಐನ್ ಬಗೆತ್ತ ಪರ್ಮಲ ಬರ್ಪಿನ ಪೂಕ್ಕೂಲೆನ್ ಮುಡಿಪುನ ಉಂಡು. ಅಯಿಟ್ ಸುರಗೆ ಪೂಲಾ ಉಪ್ಪುಂಡು. ಸುರಗೆ ಎಚ್ಚಾದ್ ಇಲ್ಲ ಬಾಕಿಲ್ಡ್ ಆಪಿನಿ ಬಾರೀ ಕಮ್ಮಿ. ತೋಟೊಡ್, ಕಾಡ್ ತೋಡುದ ಬರಿಟ್ಸ್ ಎಚ್ಚಾದ್ ಸುರಗೆದ ದೈಕುಲು ಬುಳೆವುಂಡು. ನಾಗ ಬನ, ಪಂಚ ಇಂಚಿನ ಮಾತ ಜಾಗೆಡ್ ಸುರಗೆದ ದೈಕುಲು ಉಪ್ಪುಂಡು. ದಾಯೆ ಪಂಡ ನಾಗ ದೇವೆರೆಗ್ಲ ಈ ಪೂತ್ತ ಪರಿಮಳ ಇಷ್ಟ, ವಿಶೇಷ ಪಂಡ ಸುರಗೆದ ಪೂ ಅರಳುನು ವರ್ಸೊಡು 15-20 ದಿನ ಮುಟ್ಟ ಮಾತ್ರ ಬೊಕ್ಕ ಪೂ ಅರಳುಜಿ. ಅವುಲ ಫೆಬ್ರವರಿ ಕಡೆತ್ತ ದಿನೊರ್ದು ಮಾರ್ಚ್‌ದ ಸುರೂತ್ತ ರಡ್ಡ ವಾರ ಮುಟ್ಟ ಮಾತ್ರ ಅರಳುಂಡು. ಆಂಡ ಎಪ್ರಿಲ್‌ಗ್ ಯುಗಾದಿ ಬರ್ಪಿನೆರ್ದಾವರ ಸುರಗದ ಪೂಕ್ಕುಲೆನ್ ಒಟ್ಟು ಮದ್ ನುಂಗಾದ್ ದೀವೊಲಿ.