ಅಸೀಮಾ ಚಟರ್ಜಿ

ಭಾರತ ದೇಶಟ್ ವಿಜ್ಞಾನಿ ಆತ್  ಡಾಕ್ಟರೇಟು ಪದವಿನ್ (ಡಾಕ್ಟರ್‍ ಆಫ್ ಸಾಯನ್ಸ - Doctor of Science)   ಪಡೆಯಿನ ಸುರುತ ಮಹಿಳೆ ಪದ್ಮ ಭೂಷಣ ಡಾ| ಅಸೀಮಾ ಚಟರ್ಜಿ.  ಉಂಬೆರ್‍ ನಮ್ಮ ದೇಶ ಬ್ರಿಟಿಷೆರೆನ ಆದಿಪತ್ಯೊಡು ಉಪ್ಪುನ ಕಾಲೊಡು ದಿನಾಂಕ ೨೩ ಸಪ್ಟೆಂಬರ್ ೧೯೧೭‍  ದಾನಿ   ಬಂಗಾಲದ  ಕೊಲ್ಕತ್ತೊಡು (ಇತ್ತೆದ ಪಶ್ಚಿಮ ಬಂಗಾಲ)  ಪುಟಿಯೆರ್.  ರಸಾಯನ ಶಾಸ್ತ್ರೊಡು ಅಂಚನೆ ಸಸ್ಯ ಮೂಲತ ಮರ್ದುಲೆನ ಮಿತ್ತ್ ದಿಂಜ ಸಂಶೋಧನೆ ಮಲ್ತಿನ ಮೇರ್‍ ಅಪಸ್ಮಾರ ಮಲೇರಿಯಾ ದಂಚಿನ ಸೀಕುಲೆಗು ಉಪಯೋಗವಾಪಿನ ಸಸ್ಯ ಮೂಲದ ಮರ್ದುಲೆನ ಪರಿಚಯ ಮಲ್ತು ಕೊರಿಯೆರು.‍ ಸದಾಪುಷ್ಪ (ಮಡಗಾಸ್ಕರ್‍ ಪೆರಿವಿಂಕಲ್) ಇನ್ಪಿನ ಪೂಬುಡುಪಿನ ಸಸ್ಯೊಡು ಉಪ್ಪುನ ಕ್ಷಾರರೂಪಿ ರಾಸಾಯನಿಕ ಅಂಸೊಲೆನ ಮಿತ್ತು  ದಿಂಜ ಶೋಧನೆ ಮಲ್ತುದು ಕ್ಯಾನ್ಸರ್‍ ರೋಗದ ಕಣಕುಲು ಬುಳೆಪಿನೆನ್ ನಿಯಂತ್ರಣ ಮಲ್ಪುನ ಮರ್ದುಲೆನ ಮಿತ್ತು ದಿಂಜ ಅಧ್ಯಯನ ಮಲ್ತುದೆರು. ಕಡೆಕ್ ಆರ್ ತನ್ನ ೮೯ನೆಯ ಪ್ರಾಯೊಡು ಕೊಲ್ಕತ್ತಾ ನಗರೊಡು ದಿನಾಂಕ ೨೨ ನವೆಂಬರ್ ೨೦೦೬ ದಾನಿ ತೀರುದು ಪೋಯೆರು.

ಡಾ. ಅಸೀಮಾ ಚಟರ್ಜಿ(೧೯೧೭-೨೦೦೬)

ಅರೆನ ಜನ್ಮ ದಿನತ ಶತಾಬ್ಧಿ ಆಚರಣೆದ ದಿನೊ ೨೩ ಸಪ್ಟೆಂಬರ್ ೨೦೧೭‍ ದಾನಿ ವಿಶ್ವ ಪ್ರಸಿದ್ಧ ಜಾಲತಾನ ಗೂಗಲ್ ಅರೆನ ಗೌರವೊಗು ತನ್ನ ಆರಂಭಪುಟೊತ  ಡೂಡಲ್ ಚಿತ್ರೊಡು ಅರೆನ ಚಿತ್ರ ಛಾಪಿಸಾದ್ ನಂಕ್ ಮಾತೆರುಗುಲಾ ಅರೆನ ಸಾಧನೆಲೆನ ನೆಂಪು ಮಲ್ತು ಕೊರುಂಡು.

ಸದಾಪುಷ್ಪ (ಮಡಗಾಸ್ಕರ್‍ ಪೆರಿವಿಂಕಲ್)

ಬಾಲ್ಯ

ಮಧ್ಯಮ ವರ್ಗೊಗು ಸೇರಿನ ಬಂಗಾಲಿ ಕುಟುಮೊಡು ಪುಟಿನ ಅಸೀಮಾ ವಿದ್ಯೆ ಕಲ್ಪುನೆಟ್ಟು ದಿಂಜ ಆಸಕ್ತಿ ಇತ್ತಿನ ತೂದು ಅರೆನ ಅಪ್ಪೆಅಮ್ಮೆರು ಅರೆಗು ಕಲ್ಪರೆ ಉತ್ತೇಜನ ಕೊರಿಯೆರು. ಅರೆನ ಅಮ್ಮೆರೆಗು ಸಸ್ಯೊಲೆನ (ಗಿಡ-ಮರ) ಮಿತ್ತು ಆಸಕ್ತಿ ಇತ್ತಿನ ಗುಣ ಮಗಲೆಗುಲಾ ಬತ್ತುಂಡು. ಅದಗದ ಭಾರತೊಡು ಪೊಣ್ಣುಲು ವಿದ್ಯೆ ಕಲ್ಪುನವು ಒಂಜಿ ಅಪರೂಪದ ಸಂಗತಿ ಆದಿತ್ತುಂಡು. ಆಂಡ, ಛಲವಾದಿಯಾಯಿನ ಅಸೀಮಾ ವಿದ್ಯೆಗು ಪ್ರಾಮುಖ್ಯತೆ ಕೊರುದು,  ೧೯೩೬ ಇಸವಿಡು ಕೊಲ್ಕತ್ತಾ ವಿಶ್ವವಿದ್ಯಾಲಯದ ಸ್ಕೊಟಿಶ್ ಚರ್ಚು ಕಾಲೆಜಿಡು ಕಲ್ತುದು ರಸಾಯನ ಶಾಸ್ತ್ರೊಡು (ಕೆಮಿಸ್ಟ್ರಿ) ಸ್ನಾತಕ (ಗೌರವ-ಆನರ್ಸ್) ಪದವಿ ಪಡೆಯೆರು.

ವಿದ್ಯಾರ್ಜನೆ

ದುಂಬು ಓದುದು ೧೯೩೮ ಡು ಕೊಲ್ಕತ್ತಾ ವಿಶ್ವ ವಿದ್ಯಾಲಯೊಡುದು ಸೇಂದ್ರೀಯ ರಸಾಯನಶಾಸ್ತ್ರೊಡು  ಸ್ನಾತಕೋತ್ತರ ಪದವಿ ಪಡೆಯೆರು. ೧೯೪೪ಡು  ಸೇಂದ್ರೀಯ ರಸಾಯನಶಾಸ್ತ್ರೊಡು  ಸಸ್ಯಜನ್ಯ ಕ್ಷಾರರೂಪಿ (ಅಲ್ಕಾಲೋಯಿಡ್ಸ) ಘಟಕೊಲೆನ  ಮರ್ದುದ ಗುಣೊಕುಲೆನ  ಮಿತ್ತು ಅಂಚನೆ ಕೃತಕ  ಸೇಂದ್ರೀಯ ರಸಾಯನಿಕೊಲೆನ ಮಿತ್ತು ಸುದೀರ್ಘ ಅಧ್ಯಯನ ಮಲ್ತುದು ಅವೇ  ಕೊಲ್ಕತ್ತಾ ವಿಶ್ವವಿದ್ಯಾಲಯೊಡುದು  ಡಾಕ್ಟರೇಟು ( ಪಿ.ಎಚ್.ಡಿ) ಪದವಿ ಪಡೆಯೆರು. ಅಪಸ್ಮಾರ, ಮಲೇರಿಯಾ ಬೊಕ ಕ್ಯಾನ್ಸರ್‍- ಇಂಚಿನ  ರೋಗೊಲೆನ  ಗುಣ ಮಲ್ಪರೆ ಚಿಕಿತ್ಸೆಗು ಉಪಯೋಗವಾಪಿನ ಮರ್ದುದ ಅಂಶೊಲೆನ್ ನಾಡುದು ಪತ್ತಿಯೆರು.  

ವಿದ್ಯಾಜೀವನ – ಸಾಧನೆ

ಸದಾಪುಷ್ಪ (ಮಡಗಾಸ್ಕರ್‍ ಪೆರಿವಿಂಕಲ್) ಇನ್ಪಿನ ಒಂಜಿ ಸಾಮಾನ್ಯವಾದ್ ತೋಜಿದ್ ಬರ್ಪಿನ ಪೂ ಬುಡುಪಿನ ಗಿಡ. ಉಂದೆಕ್ ದುಂಬು ವಿಂಕಾ ರೋಸಾ (Vinca Rosa) ಇನ್ಪಿನ ಸಸ್ಯ ವಿಜ್ಞಾನದ ಪುದರ ಇತ್ತ್ಂಡ್. ಇಂಚೊಗು ಕ್ಯಾತರಾಂತಸ್ ರೋಸಿಯಸ್ (Catharanthus roseus) ಇಂದ್ ವೈಜ್ಞಾನಿಕ ಪುದರ ಬದಲಾವಣೆ ಮಲ್ತದೆರು. ಈ ಸಸ್ಯೊಡು ಉಪ್ಪುನ ಕೆಲವು ವಿಶೇಷ ಕ್ಷಾರರೂಪೊಲು ಕ್ಯಾನ್ಸರ್ರೋಗದ ಕಣಕುಲೆನ ನಿಯಂತ್ರಣ ಬೊಕ್ಕ ಚಿಕಿತ್ಸೆಗುಲಾ ಉಪಯೋಗವಾಪುಂಡು ಇನ್ಪಿನ ವಿಷಯೊನು ಸಂಶೋಧನೆಲೆನ ಮೂಲಕ ತೋಜಾಯೆರು. ಅಂಚನೆ ಅಪಸ್ಮಾರ ಮಲೇರಿಯಾ ಇಂಚಿನ ಸೀಕುಲೆಗು ಗುಣ ಮಲ್ಪರೆ ಬೊಡಾಯಿನ ಬೇತೆ ಬೇತೆ ಮರ್ದುಲೆನು ತಯಾರು ಮಲ್ಪರೆ ಸಹಕಾರಿಯಾಪಿನ ಸಸ್ಯೊಲೆನ ಮಿತ್ತ್ ದಿಂಜ ಸಂಶೋಧನೆ ಮಲ್ತ್ ದೆರು.

ವೃತ್ತಿ ಜೀವನ

ಡಾಕ್ಟರೇಟ್ ಪದವಿ ಗೆತೊಣಿನೆರ್ದ್ ಬೊಕ್ಕ ಆರ್ ಕೊಲ್ಕತ್ತಾದ ಲೇಡಿ ಬ್ರಬೋರ್ನ್ ಕಾಲೇಜ್‌ಡ್ ಅಧ್ಯಾಪಕಿಯಾದ್ ಸೇರೊಂಡೆರ್. ಅಯಿಡುದು ಬೊಕ್ಕ ೧೯೫೪ ಇಸವಿಡ್ ಆರ್ ಕೊಲ್ಕತ್ತಾ ವಿಶ್ವವಿದ್ಯಾಲಯದ ಸಾಯನ್ಸ್ ಕಾಲೇಜಿಡ್ ಪ್ರವಾಚಕಿ (ರೀಡರ್)‍ ಆದ್ ಸೇರಿಯೆರ್.

 ಪ್ರಶಸ್ತಿಲು-ಸಾಮ್ಮಾನೊಲು

ಪದ್ಮಭೂಷಣ ಪದಕ

ಅರೆನ ವಿದ್ಯಾಜೀವನದ ಸಾಧನೆಲೆನ ಸಾರಾಂಶ ಈ ತಿರುತು ಕೊರುತುಂಡು:

• ೧೯೬೦..  ಭಾರತೀಯ ರಾಷ್ಟ್ರೀಯ ವಿಜ್ಞಾನ ಅಕಾಡೆಮಿ (ಇಂಡಿಯನ್ ನೇಶನಲ್ ಸಾಯನ್ಸ ಅಕಾಡೆಮಿ) ದ ಫೆಲೋ(ಸದಸ್ಯೆ) ಆದ್ ಆಯ್ಕೆ ಆಯೆರ್.
• ೧೯೬೧.. ರಸಾಯನ ವಿಜ್ಞಾನೊಡು ಶಾಂತಿ ಸ್ವರೂಪ್ ಭಟ್ನಾಗರ್‍ ಪ್ರಶಸ್ತಿ ಪಡೆಯಿನ ಸುರುತ ಪೊಂಜೊವು.
• ೧೯೬೨..೧೯೬೪.. ಕೊಲ್ಕತ್ತಾ ವಿಶ್ವವಿದ್ಯಾಲಯದ ರಸಾಯನಶಾಸ್ತ್ರ ವಿಭಾಗದ  ಪ್ರಥಮ ಮಹಿಳಾ ಖೈರಾ ಪ್ರಾಧ್ಯಾಪಕಿ ಆಯೆರ್.
• ೧೯೭೫.. ಭಾರತ ಸರ್ಕಾರ ಅರೆಗು ಪದ್ಮ ಭೂಷಣ ಪ್ರಶಸ್ತಿ ಕೊರುದು ಸಮ್ಮಾನ ಮಲ್ತುಂಡು.
• ೧೯೭೫.. ಭಾರತ ವಿಜ್ಞಾನ ಸಮ್ಮೇಳನ ಸಂಘದ (ಇಂಡಿಯನ್ ಸಾಯನ್ಸ ಕಾಂಗ್ರೆಸ್ ಅಸೊಸಿಯೇಶನ್) ನವದೆಹಲಿದ ಪ್ರಥಮ ಮಹಿಳಾ ಅಧ್ಯಕ್ಷೆ ಆಯೆರ್.
• ೧೯೮೨.. ಭಾರತದ ಪಾರ್ಲಿಮೆಂಟುದ ರಾಜ್ಯಸಭೆತ ಸದಸ್ಯೆಯಾದ್ ಆಯ್ಕೆ ಆಯೆರ್.

ಉಂದೆನುಲಾ ತೂಲೆ

ಡಾ.ಅಸೀಮಾ ಚಟರ್ಜಿ (ಇಂಗ್ಲೀಷು).