ಆಟಿ ಕೋಲ

"ಆಟಿ ಕೋಲ" ಆಟಿ ತಿಂಗೊಳು ಸುರು ಆನಗ ಆಟಿ ದೈವಾರಾಧನೆ ಸುರು ಆಪುಂಡು. ಈ ತಿಂಗೊಳುಡು ನರಮಾನಿಲು, ಪ್ರಾಣಿಲು, ಪಕ್ಕಿಲು, ಸಸ್ಯೊಲು ಕಾಯಿಲೆಗ್ ಒಳಗಾವೊಂದಿಪ್ಪುಂಡು. ಅಂಚ ಭೂಮಿದ ಕಷ್ಟೊಲೆನ್ ದೂರ ಮಲ್ಪೆರೆ ದೈವೊಲು ಭೇಟಿ ಕೊರ್ಪೆರ್ ಪನ್ಪಿನ ನಂಬಿಕೆ ಈ ತುಳುನಾಡುಡ್ ಉಂಡು. ಈ ವಿಶೇಷ ಕಾರ್ಯಕ್ರಮೊಡು ಶಾಶ್ವತವಾದ್ ಉಪ್ಪುನ ಅಡುರು ಭೂಮಿದ ಸಂಪ್ರದಾಯ, ಸಂಸ್ಕೃತಿ, ಕೃಪೆನ್ ಸಾರುಂಡು. ಕಾಸರಗೋಡು ಜಿಲ್ಲೆದ ಅಡೂರು ಕಲ್ಲುರ್ಟಿ-ಕಲ್ಕುಡ ದೈವದಲ್ಪ ಆಟಿ ತಿಂಗೋಳಿಡೀ ನಡಪುನ ದೈವದ ಕೋಲ ಒಂಜಿ ವಿಶಿಷ್ಟ ಅನುಭವ. ಆಟಿ ತಿಂಗೊಳು ಸುರು ಆನಗ ಕೇರಳ, ತುಳುನಾಡ್ದ ಮಾತ ಪ್ರದೇಶೊಡು ಆಟಿದ ದೈವಾರಾಧನೆ ಸುರು ಆಪುಂಡು. ಕಾಸರಗೋಡು ಜಿಲ್ಲೆದ ಆಡೂರು ಕಲ್ಲುರ್ಟಿ-ಕಲ್ಕುಡ ದೈವಸ್ಥಾನೊಡು ಮಾತ್ರ ಆಟಿ ಪೂರಾ ದೈವೊದ ಕೋಲ ನಡಪುಂಡು ಪನ್ಪಿನವು ವಿಶೇಷ. ಮುಲ್ಪ ನಡಪುನ ದೈವ ಕೋಲೊಡು ದೈವ ದೇವೆರೆನ ಕೃಪೆ ಕೋರೆರೆ ಸ್ಥಳೀಯೆರ್ ಬೊಕ್ಕ ಬಿನ್ನೆರ್ ಬರ್ಪೆರ್. ದೈವೊನು ಪೂ, ನೈವೇದ್ಯ, ದೀಪ, ವಾದ್ಯೊಲೆಡ್ ಆರಾಧನೆ ಮಲ್ಪುವೆರ್. ಈ ಕೋಲಗ್ ಬತ್ತಿನ ಪ್ರತಿಯೊರಿಲಾ ದೇವೆರೆನ ಕೃಪೆ ಪಡೆಪೆರ್ ಪನ್ಪಿನ ನಂಬಿಕೆಡ್ ಆಟಿ ಕೋಲ ಒಂಜಿ ಧಾರ್ಮಿಕ ಆಚರಣೆ ಮಾತ್ರ ಅತ್ತ್ ಶತಮಾನೊಲೆನ ಸಂಸ್ಕೃತಿನ್ ಒರಿಪಾವುನ ಒಂಜಿ ಅದ್ಭುತ ಪರಂಪರೆದ ತಾಣವಾದುಂಡು.

ದೇವೆರೆನ ಕೃಪೆದ ಪರಂಪರೆ

ಆಟಿ ತಿಂಗೊಳು ಸುರು ಆನಗ ದೈವಾರಾಧನೆ ಲಾ ಸುರು ಆಪುಂಡು. ಈ ಆರಾಧನೆಲೆಡ್ ವಿಶೇಷವಾದ್ ಕಾಸರಗೋಡು ಜಿಲ್ಲೆದ ಆಡೂರು ಕಲ್ಲುರ್ಟಿ-ಕಲ್ಕುಡ ದೈವೊದಲ್ಪ ಆಟಿ ತಿಂಗೊಳೀಡೀ ನಡಪುನ ದೈವದ ಕೋಲ ಆಕರ್ಷಕವಾಯಿನವು ಬೊಕ್ಕ ಮಸ್ತ್ ವಿಶೇಷವಾಯಿನವು.

ಇತಿಹಾಸ

ಸುಮಾರ್ 400 ವರ್ಸೊಗು ದುಂಬು ಘಟ್ಟಡ್ದ್ ಬತ್ತಿನ ಕಲ್ಲುರ್ಟಿ-ಕಲ್ಕುಡ ದೈವೊಲೆಗ್ ಅಡೂರು ಎಲ್ನಾಡುಗುತ್ತಿಡ್ ಆಶ್ರಯ ಕೊರ್ತೆರ್ ಪನ್ಪಿನ ನಂಬಿಕೆ ಉಂಡು. ಈ ದೈವೊಲು ಮುಲ್ಪ ನೆಲೆಯಾದ್ ಭಕ್ತೆರೆನ ಆಸೆನ್ ನಡಪಾವೊಂದುಲ್ಲೆರ್ ಪನ್ಪಿನ ದೃಢವಾದ್ ನಂಬುನಕುಲು. ಪಟೇಲ ನಾರಾಯಣ ಭಂಡಾರಿ ಮರಣ ಆಯಿ ಬೊಕ್ಕ ಅರೆನ ಮಗೆ ಎ.ಜಿ. ಪ್ರಕಾಶ ಭಂಡಾರಿ ಕೋಲೊಲೆನ ಉಸ್ತುವಾರಿಡ್ ಇತ್ತೆರ್. ಕರಿನ ರಡ್ಡ್ ವರ್ಸೊಡ್ದಿಂಚಿ ಗುತ್ತುದ ಹಿರಿಯೆರ್ ಅರವಿಂದ್ ರೈ ನ ಮೇಲ್ವಿಚಾರಣೆಡ್ ಕೋಲೊಲು ನಡತೊಂದುಂಡು.

ಆಟಿ ಕೋಲ ದ ಪೊರ್ತು

ಆಟಿಡ್ ದೈವೊಲೆನ ಕೋಲೊಲು ಸುರು ಆಪುಂಡು, ಬೊಕ್ಕ ದೈವೊಲೆನ ಕೋಲೊಲು ದುಂಬುದ ಸಂಕ್ರಮಣೊಗು ಮುಟ್ಟ ನಡಪುಂಡು. ಆಟಿ ೧ರ್ದ್ ಸಂಕ್ರಮಣ ಮುಟ್ಟ ಮುಲ್ಪ ನಡಪುನ ಮಾತಾ ಕೋಲೊಲು ``ಪರಕೆ ಕೋಲ ಪನ್ಪಿನ ಲಕ್ಷಣೊನು ಪಡೆಯೊಂದಿತ್ತುಂಡು. ಸೋಮವಾರ ದೈವೊಗು ಬಾರನೆ ಅರ್ಪಣೆ ಮಲ್ಪುನ ಸಂಪ್ರದಾಯ ಇಜ್ಜಿ ಪನ್ಪಿ ನಂಬೊಳಿಗೆಡ್ ಈ ದಿನ ಕೋಲ ಮಲ್ಪುಜೆರ್.

ಆಟಿ ಕೋಲ

ಸುರುತ ದಿನ ಆದೂರು ಗುತ್ತು ತರವಾಡಿ ಅಕಲೆಡ್ದು ಹುತ್ತರಿ ಕೋಲ ನಡಪುನು ವಾಡಿಕೆ. ಬಾಕಿದ ದಿನೊಟು ವರ್ಷೊಗು ದುಂಬೇ ಅಕಲೆನ ಪುದರ್ ಬರೆಪಾದಿನ ಭಕ್ತರೆಡ್ದು ಕ್ರಮಪ್ರಕಾರವಾದ್ ಪರಕೆದ ಕೋಲೊಲು ನಡಪುಂಡು. ಒಂಜಿ ವರ್ಷ ದುಂಬೇ ಪರಕೆದ ಕೋಲೊಲು ಬರೆಪಾದು ದೀಪಿನ ಕ್ರಮೊ ಮುಲ್ಪ ನಡಾಪುಂಡು.ಈ ಆಚರಣೆಲು ಕೇವಲ ಧಾರ್ಮಿಕ ಆಚರಣೆ ಮಾತ್ರ ಅತ್ತು, ಭಕ್ತರೆನ ಮನಸ್ಸುಡು ದೈವದ ಅನುಗ್ರಹೊದ ಪರಂಪರೆದ ಪ್ರತೀಕದ ಪ್ರತಿಬಿಂಬವಾದುಂಡು. ಇಂಚ ಆಟಿ ತಿಂಗಳೊದು ಕೇವಲ ಕಾಲಚಕ್ರೊದ ಒಂಜಿ ಹಂತ ಅತ್ತು; ಉಂದು ದೈವೊದ ಆರಾಧನೆ, ಭಕ್ತರೆನ ನಂಬಿಕೆ, ಬೊಕ್ಕ ಧಾರ್ಮಿಕೊ ಪರಂಪರೆದ ಉಂದು ಆರಾಧನೆ ಬೊಕ್ಕ ಭವಿಷ್ಯೊದ ಪೀಳಿಗೆಗ್ ಪ್ರಜ್ಞೆನ್ ಪ್ರೇರಣೆ ಮನ್ಪುಂಡು.