ಕಾಟ್ ಬಸಲೆ(ಕಾಡ ಬಸಲೆ)

ಕಾಟ್ ಬಸಲೆ (ಕಾಡ್ ಬಸಲೆ) ಸಾದಿ ಬರಿಟ್ ಬುಳೆಪುನ ಒಂಜಿ ದೈಯಿ. ಇರೆತ್ತ ಬರಿಟ್ ಇಪ್ಪುನ ಗಚ್ಚಿದ ನಡೂಡ್‌ದು ಪೊಸ ದೈ ಪುಟ್ಟುದು ಬರ್ಪುನ ಈ ದಯಿತ್ತ ಇಸೇಸ. ಶಾಲೆಗ್ ಪೋಪುನ ಜೋಕುಲು ಈ ದಯಿತ್ತ ಇರೆನ್ ಬೂಕುದ ಉಲಾಯಿ ದೀದ್ ಕಿನ್ನಿ(ಪೊಸ ದಯಿ) ದೀಪುಂಡು ಪಂಡ್‌ದ್ ನಂಬುವೆರ್. ನೀರ್‌ದ ಪಸೆ ಎಚ್ಚ ಇಪ್ಪುನ ಕಡೆಟ್ ಧಾರಾಳವಾದ್ ಬುಲೆಪುಂಡು. ಕ್ರಾಸ್ಸುಲೇಸಿಯೆ(Crassulaceae) ಕುಟುಮೊದ ಉಲಾಯಿ ಬರ್ಪುನ ಈ ದಯಿತ್ತ ಸಸ್ಯಶಾಸ್ತ್ರೀಯ ಪುದರ್ ಬ್ರಿಯೋಫಿಲ್ಲಮ್ ಪಿನ್ನಾಟಮ್(Briyophyllum Pinnatum).

ಮಣ್ಣ್‌ದ ಕುಂಡೊಡು ನಡ್ತಿನ ಕಾಡ್ ಬಸಲೆದ ದಯಿ

ಬೇತೆ ಬಾಸೆಲೆಡ್ ಪುದರ್

ಕಾಡ್ ಬಸಲೆದ ಇರೆ

ಕಾಡ್ ಬಸಲೆದ ಪೂ

• ಕನ್ನಡ-ಪತ್ರಜೀವ, ಎಲೆಚಿಗರಿ, ಪಟ್‌ಪಟೆ ಎಲೆ, ಕಾಡುಬಸಳೆ, ದಡಬಡಕಿ
• ಸಂಸ್ಕೃತ-ಅಸ್ಥಿಭಕ್ಷ, ಪತ್ರಬೀಜ
• ಹಿಂದಿ-ಘಾಯಮಾರಿ, ಪಥರ್‌ಚಟಾ
• ಇಂಗ್ಲಿಷ್- ಮಿರಾಕಲ್ ಪ್ಲಾಂಟ್, ಕ್ಯಾಥಿಡ್ರಿಲ್ ಬೆಲ್
• ಮಲಯಾಳಮ್-ಎಲಮೊಳಚ್ಚಿ

ಮೂಲ

ಈ ದಯಿತ್ತ ಮೂಲ ಮಡಗಾಸ್ಕರ್ ದ್ವೀಪ ಆಂಡಲಾ, ಭಾರತ, ಆಸ್ಟ್ರೇಲಿಯಾ ನ್ಯೂಜಿಲೆಂಡ್, ವೆಸ್ಟ್ ಇಂಡಿಸ್, ಫಿಲಿಪೈನ್ಸ್ ಈ ದೇಸೊಲೆಡ್‌ಲಾ ತೂವರ ತಿಕ್ಕುಂಡು.

ತೂವರ

ಸುಮಾರ್ ೧ ಮೀಟರ್‌ದಾತ್ ಎತ್ತರ ಬುಳೆವುನ ಈ ದೈಯಿತ ಇರೆ ದೀರ್ಘ ಅಂಡಾಕಾರಡ್(ಪಕ್ಕಿದ ತೆತಿದಲೆಕ) ದಪ್ಪ ಇಪ್ಪುಂಡು. ಇರೆ ಸುಮಾರ್ ೩೦ಸೆಮೀ. ಉದ್ದ. ಮುದೆಲ್ಡ್ ಎದುರುಬದುರಾದ್ ೪-೫ ಇರೆಕ್ಕುಲು ಇಪ್ಪುವಾ. ದಯಿತ್ತ ಮುದೆಲ್‌ ದಪ್ಪ ಆದ್ ತಿರ್ಲ್ ದಿಂಜಿದ್ ಇಪ್ಪುಂಡು. ಇರೆತ್ತ ಪಿದಯಿದ ಕೊಡಿ ಸಾಲ್‌ಡ್ ೫-೭ ಗಚ್ಚಿ ಇಪ್ಪುಂಡು. ಈ ಗಚ್ಚಿದ ನಡುಡ್ದು ಪೊಸ ದಯಿ ಪುಟ್ಟುನಿ ಕಾಡ್ ಬಸಲೆದ ಇಸೇಸ. ಇರೆ ಪರ್ಂದ್ ಆದ್ ನಿಲಕ್ ಬೂರಿಬೊಕ್ಕ ಗಚ್ಚಿಡ್ ಬತ್ತಿನ ತಿರಿ ಮಲ್ಲೆ ಆದ್ ಪೊಸ ದಯಿ ಪುಟ್ಟುಂಡು.

ಈ ದಯಿತ್ತ ಪೂ ತೂವರ ಕಂಕಣೆ ಪಾಡ್ದಿನ ತುತ್ತೂರಿದ ಲೆಕ ತೋಜುಂಡು. ಪೂ ಸುಮಾರ್ ೫ ಸೆಮೀ ಉದ್ದ ಮುದೆಲ್ಡ್ ಹದ ಗುಲಾಬಿ ಬಣ್ಣೊಡು ಇಪ್ಪುಂಡು.

ಗಲಸುನಿ

ಪಿರಾಕ್‌ಡ್ ಅತ್ತಂದೆ ಹಳ್ಳಿಲೆಡ್ ಈ ದಯಿತ್ತ ಇರೆನ್ ಮರ್ದ್‌ಗ್ ಗಲಸುವೆರ್. ಮೂತ್ರಪಿಂಡೊಡು ಕಲ್ಲ್ ಇತ್ತಿನಕುಲೆಗ್ ಕಲ್ಲ್ ಕರಾದ್ ಪೋವರ, ಕಾಟ್ ಬಸಲೆದ ಇರೆ ತಿನರ ಪನ್ಪೆರ್. ಕಫ ಅಸ್ತಮಾ ಇತ್ತಿನಕುಲು ಈ ದಯಿತ್ತ ಇರೆನ್ ಕಲ್ಲ್‌ಸಕ್ಕರೆದೊಟ್ಟುಗು ದೆತೊಂಡ ಗುಣ ಆಪುಂಡು. ಅತ್ತಂದೆ ಈ ದಯಿನ್ ಅಧಿಕ ರಕ್ತ ಒತ್ತಡ, ಜ್ವರ, ಮಲಬದ್ಧತೆ ಸೀಕ್‍ಲೆನ್ ಗುಣ ಮಲ್ಪರ ಗಲಸುವೆರ್.