ಕುಪ್ಪೆಟ್ಟು ಪಂಜುರ್ಲಿ
ಕುಪ್ಪೆಟ್ಟು ಪಂಜುರ್ಲಿ:ಕೈಲಾಸ ಗಿರಿಟ್ ಈಸರ ಬೊಕ್ಕ ಪಾರ್ವತಿ ದೇವೆರ್ ಇತ್ತೆರ್. ಅಕ್ಲೆನ ಬೇಲೆದಕುಲು, ನಾಲ್ ಜನ ಗಣಕೊಲು, ಅಕುಲು ಧರ್ಮದೇವತೆಲು. ಒರಿ ಗಣಮಣಿ. ಆ ಸಂದರ್ಬೊಡು ನಾರದೆರ್ ಬೂಲೋಕೊರ್ದು ಕೈಲಾಸೊಗು ಬತ್ತೆರ್‌. ನಾರದೆರ್ ಈಸರ ದೇವೆರೆಡ ಪನ್ಪೆರ್ ತಿರ್ತ್ ಬೂಲೋಕೊಡು ಜನೊಕ್ಲೆಡ ದರ್ಮ ಇಜ್ಜಿ. ಅದರ್ಮ ತಾಂಡವ ಆವೊಂದುಂಡು. ನೆಕ್ಕ್‌ ಈರ್ ದಾದಾಂಡಲಾ ಸಾದಿ ನಾಡೊಡು ದೇವೆರೆಂದ್‌ ಪನ್ಪೆರ್.ಈಸರ ದೇವೆರ್ ನಾರದೆರೆನ್‌ ಬ್ರಹ್ಮೆ ಇತ್ತಿನಡೆ ಕಡಪುಡುವೆರ್.
ಬ್ರಹ್ಮೆ ಇತ್ತಿನಡೆ ಬನ್ನಗ ಬ್ರಹ್ಮೆಲಾ ಸರಸ್ವತಿ ದೇವೆರ್ಲಾ ಕುಸಾಲ್‌ ಗೊಬ್ಬೊಂದುಪ್ಪುವೆರ್‌. ಉಂದೆನ್‌ ತೂದು ನಾರದೆರ್ ಈರ್ ಬೂಲೋಕೊಡು ನರಮಾನಿಲೆನ್‌ ಸೃಷ್ಟಿಮಲ್ತ್‌ದರ್‌. ಆಂಡ ಅಕ್ಲೆಗ್‌ ಒಂಚೂರುಲಾ ನರಮಾನ್ಯನ ಗುರ್ತ ಇಜ್ಜಿ. ಒಂಜಿ ಇಲ್ಲಡ್‌ ಒಂಜಿ ತಕ್ಕನ ನೀರ್‌ ಪರಿಯೆರೆ ಕೇಂಡೆ. ಅಯಿಕ್‌ ಅಕ್ಲು ನಾರದೆರೇ ಈರ್ ಒಯಿಟೆ ಬತ್ತಿನಿದ್‌ ಕೇಂಡೆರ್‌.
ಯಾನ್ ಸುದೆ ಕಡತ್‌ದ್‌ ಬತ್ತಿನಿಂದ್‌ ಪಂಡೆ. ಅಪಂಡ ಇರೆಗ್‌ ಸುದೆತ್ತ ನೀರ್‌ ಪರಿಯೆರೆ ಆಯಿಜಾ. ಮೂಲು ಇರೆಗ್‌ ನೀರ್‌ ತಿಕ್ಕಂದ್‌ ಪಂಡೆರ್. ಆ ಪೊರ್ತುಗು ಬ್ರಹ್ಮೆ ಪಂಡೆರ್ ಎಂಕ್ ದಾಲಾ ಮಲ್ಪೆರಾಪುಜಿ ನಾರದೆರೆ, ಈರ್ ವೈಕುಂಟೊಗು ಪೋಲೆ. ಅವುಲು ವಿಷ್ಣು ದೇವೆರ್ ಉಲ್ಲೆರ್ಂದ್ ಅಡೆ ಕಡಪುಡುವೆರ್. ನಾರದೆರ್ ವೈಕುಂಟೊಗು ಬನ್ನಗ, ಎಷ್ಟುಲ ಲಕ್ಷಿ ಒಲ ಒಟ್ಟಿಗೆ ಕುಸಾಲ್‌ ಗೊಬ್ಬೊಂದುಲ್ದೆರ್‌. ಅಲ್ಪ ನಾರದೆರ್ ಬೂಲೋಕುಡು ನಡೆತಿನ ವಿಚಾರೊನ್ ಪನ್ನಗ ವಿಷ್ಣು ಬುಕ್ಕ ಲಕ್ಷ್ಮಿ ದೇವೆರ್ಲಾ ಎಂಕ್ಲೆರ್ದ್ ದಾಲ ಸಾದ್ಯ ಇಜ್ಜಿ ಪಂಡ್ದ್ ನಾರದನ್ ಕೈಲಾಸೊಗ್ ಪೋರೆ ಪನ್ಪೆರ್.
ನಾರದೆರ್ ಕೈಲಾಸೊಗು ಬರ್ಪೆರ್. ಅವ್ಲು ಈಸರ ದೇವೆರ್ ಬುಕ್ಕ ಪಾರ್ವತಿ ದೇವೆರ್ಲಾ ಇಪ್ಪುವೆರ್, ನಾರದೆ ಬತ್ತ್‌ದ್‌ ಪನ್ಪೆರ್ ಈಸರ ದೇವೆರೇ, ಈರ್ ಮೂಜಿ ಕಣ್ಣ್‌ದಾರ್‌, ಬ್ರಹ್ಮೆ ವಿಷ್ಣು ನಿಕುಲು ತ್ರಿಮೂರ್ತಿಲು ಮೂಜಿ ಜನ ಇತ್ದ್ಲಾ ಬೂಲೋಕೊಡು ದರ್ಮ ಇಜ್ಜಿ, ಯಾನ್ ದರ್ಮ ಶೋದನೆಗ್‌ ಬತ್ತಿನಿಂದ್‌ ಪನ್ಪೆರ್. ಆ ಪೊರ್ತುಗು ಈಸರ ದೇವರ್, ಮೂಜಿ ಕಣ್ಣ್‌ದಾರ್‌ ದರ್ಮದೇವತೆಲೆನ್‌ ನಾಲ್ ಜನೊಕ್ಲೆನ್ ಲೆತ್ತ್‌ದ್‌ ಪನ್ಪೆರ್ , ನಿಕುಲು ಇತ್ತೆನೇ ಬೂಲೋಕೊಗು ಪೋವೊಡು. ಬೂಲೋಕೊಡು ದರ್ಮ ಇಜ್ಜಿಂದಾಂಡ ಬೂಲೋಕೊಗು ತೂ ಕೊರ್ದು ಪೊತ್ತಾವೊಡು ಪಂಡ್ಡ್‌ ಶಿವನ ಅಪ್ಪಣೆ ಆಪುಂಡು. ದರ್ಮ ದೇವತೆಲು ಬೂಲೋಕೊಗು ಪೋಪೆರ್. ಶಿವನ ಕೈತಲ್‌ ಗಣ ಮಣಿ ಒರಿ ಉಲ್ಲೆ. ಆಯೆ ಶಿವನ ಮೋಕೆದ ಬಂಟೆ. ಗಣಮಣಿ ಶಿವಡ ಪನ್ಪೆ ಸಾಮೀ..ಅಕ್ಲೆನ್ ನಾಲ್ ಜನೊನು ಬೂಲೋಕೊಗು ಕಡಪುಡಿಯರ್‌. ಎಂಕ್‌ಲಾ ಅಪ್ಪಣೆ ಕೊರ್ಯರ್ಂಡ ಯಾನ್ಲಾ ಬೂಲೋಕೊಗು ಪೋಪೆಂದ್ ಪಂಡೆ. ಈಸರ ದೇವೆರ್ ಆಸೀರ್ವಾದೊರ್ನ್ ಕೊರ್ದು ಆಯೆನ್ಲಾ ಬೂಲೋಕೊಗ್ ಕಡಪುಡುವೆರ್.
ಗಣಮಣಿ ಬೂಲೋಕೊಗು ಬತ್ತ್ ಬತ್ತ್‌ದ ಗಟ್ಟೊದ ಮಿತ್ತ್‌ ಬರ್ಪೆ. ಗಟ್ಟಡ್‌ ಗೌಡೆರ್ನವುಲು "ಅನ್ನ ಕೊಡಿ ಅಪ್ಪಾ, ಅನ್ನ ಕೊಡಿ ಅಮ್ಮಾ" ಪಂಡ್ದ್ ನಟ್ಟುವೆ. ಗೌಡೆರ್ನಕ್ಲೆ ಪೊಂಜೋವು ಕೆಲವುದಕ್ಲ್ ತಂಞಣ, ಪುಳಿಗಂಜಿ ಕೊರೈರ್‌. ಒಂಜಿ ಗೌಡೆರ್‌, ಅನ್ನ ಕೊಡಿ ಅಪ್ಪಾಂದ್‌ ಕೇಂಡಿನೈಕ್‌ ಇಂಬ್ಯಗ್‌ 'ಅಣ್ಣಪ್ಪ' ಪಂಡ್ಧ್ ಪುರಪ್ಪು ದೀಯೆರ್‌. ಆ ಗೌಡೆರ್‌ ಆರೆನ ಇಲ್ಲಲ್‌ ಮೂಜಿ ತಿಂಗೊಲು ಬೆನ್ಪಾಯೆರ್. ಎನ್ನ ಬೆಂದಿನ ಸಂಬಲ ಕೊರ್ಲೇಂದ್‌ ಕೇಂಡಿನೈಕ್‌ ನಿಕ್ಕ್ ಸಂಬಲ ಕೊರಯೆಂದ್‌ ಕಂಟೆಲ್‍ಗ್ ಕೈಪಾಡ್ದ್ ನೂಕುವೆರ್.[೧]
ದರ್ಮಸ್ತಲೊಡ್ ಅಣ್ಣಪ್ಪ ಪಂಜುರ್ಲಿಯಾದ್ ನಿಲೆ ಆಯಿನ ಕತೆ
ಸಂಪೊಲಿಪುಲೆಆ ಪೊರ್ತುಗು ಅಣ್ಣಪ್ಪೆ ಬುಲಿತೊಂದು ಗಟ್ಟ ಜತೊಂದು ಬತ್ತೆ. ಚಾರ್ಮಾಡಿ ಗಟ್ಟ ಜತ್ತೊಂದು ಬನ್ನಗ,ತುಲುನಾಡ್ದ ಸತ್ಯ ದರ್ಮೊಲು ನಿಲೆ ಆಯಿನ 'ಕುಡುಮದ ಮಣ್ಣ್' ಗ್ ಕಾರ್ ದೀಯೆ. ಕುಡುಮಡ್ ಅಮ್ಮು ಪೆರ್ಗಡ್ತಿ, ಅಜಿಲ ಕಂಬೊಲಿಯಾಲ್, ಮುಜೂರು ಪೆರ್ಗಡ್ರ್, ಜಿನರಾಜ ಪೆರ್ಗಡೆ ಉಲ್ಲೆರ್. ಆ ಪೊರ್ತುಗು ಅಮ್ಮು ಪೆರ್ಗಡ್ದಿನ ಕಂಡನಿ ಜಿನರಾ-
ಪೆರ್ಗಡೆಗ್‌ ಪಕ್ಷಿಪಾತ ಆದ್ ಇತ್ತ್ಂಡ್.
ಉಂದೆಕ್ಕ್‌ ಶಾಂತಿಗ್‌ ಬೋಡಾದ್‌ ಅಮ್ಮು ಪೆರ್ಗಡ್ತಿ ಅರೆನ ಮಗೆ ಕುಮಾರಾಯನ್‌ ಲೆತ್ತೊಂದು ಬಸ್ತಿಗ್‌ ಬರ್ಪೆರ್. ಇಂದ್ರರೆಡ್ ಶಾಂತಿ ಮಲ್ಪಾಯೆರ್.ಶಾಂತಿ ಮಲ್ತ್ದ್ ಒಂಜಿ ಗಡಿ ತಾರಾಯಿ, ಐನ್‌ ಪರ್ಂದ್, ಗಂದಪ್ರಸಾದ, ತೀರ್ತನ್ ಇಂದ್ರೆರ್ ಕೊರಿಯೆರ್. ಸಾದಿಡ್ ಪೋಪುನಕ್ಲೆಗ್ ಈ ಪ್ರಸಶದೊನ್ ಕೊರಿಯರೆ ಬಲ್ಲಿಂದ್ ಇಂದ್ರೆರ್ ಪಂಡ್ ದಿಪ್ಪುವೆರ್. ಬಸ್ತಿಡ್ದ್ ಪಿರ ಬನ್ನಗ ಸಾದಿಡ್ ಅಣ್ಣಪ್ಪೆ ಬಡಾಪು ಬಾಜೆಲ್ಂದ್ ಅಡ್ಡ ಬೂರುದು ಇತ್ತೆ. "ಅಮ್ಮಾ ಎಂಕ್ ಬಡಾವು ಆಪುಂಡು. ಎಂಕ್ ಬಾಜೆಲ್‌ ಆಪುಂಡು. ಲಕ್ಕರೆ ಆಪುಜಿ ಅಮ್ಮಾ" ಪಂಡೆ. ಅಮ್ಮುದೇವಿ ಕೈಟ್ ಇತ್ತಿನ ಒಂಜಿ ಪರ್ಂದ್, ಹಣ್ಣ್‌ ಕಾಯಿದ ಒಂಜಿ ತುಂಡು ತಾರಾಯಿ, ತೀರ್, ಗಂದಪ್ರಸಾದ ಕೊರ್ಯೆರ್. ಅವೆನ್ ತಿಂದ್‌ದ್‌ ಅಣ್ಣಪ್ಪೆ ಪನ್ಪೆ "ಎನ್ನ ಬಡಾವು ದಿಂಜಿಂಡ್‌ ಅಮ್ಮಾ" ಅಯಿಕ್‌ ಅಮ್ಮು ಪೆರ್ಗಡ್ತಿ ಪನ್ಪೆರ್ "ಈ ಒಂಜಿ ಪಂರ್ದ್‌ಡ್‌ ಬಂಜಿ ದಿಜಿಂಡಾ, ಕುಸಾಲ್‌ ಮಲ್ಪೊಡ್ಚಿ ಬಾಲೆ" ಪಂಡೆರ್. ಈ ಬೂಡುಗು ಬಲಾ ಪಂದ್‌ ಬೂಡುಗು ಲೆತೊಂದು ಪೋಯೆರ್. ಬಂಗ ಬಾರೆದ ಇರೆ ಕನತ್‌ದ್‌ ನುಪ್ಪು, ಸಾರ್‌, ಪಾಯಸ, ಭಕ್ಷ್ಯಲೆನ್‌ ಮಾತಾ ಕೊರ್ಯೆರ್.
ಬಂಜಾರ ವನಸ್ ಮಲ್ತೆ ಅಣ್ಣಪ್ಪೆ. ನನ ಯಾನ್ ಬರ್ಪೆಮ್ಮಾ ಪಂಡೆ. ಇಂಬ್ಯನ್ ತೂನಗ ಅಮ್ಮು ದೇವಿ ಪನ್ಪೆರ್ ಎಂಕ್ ಅಂಜೋವೆಡ ಪಾತೆರುನ ಅಬ್ಯಾಸ ಕಮ್ಮಿ ಆಂಡಾ.. ನಿನನ್ ತೂನಗ ಪಾತೆರುಗಂದ್ ಆಪುಂಡು . ನಿನ್ನ ಅಪ್ಪೆ ಯೇರ್ ಬಾಲೆ. ನಿನ್ನ ಅಮ್ಮೆರ್ ಯೇರ್ಂದ್ ಕೇನುವೆರ್. ಎನ್ನ ಅಮ್ಮೆರ್ ಬೊಳ್ಳಿಗುಡ್ಡೆಡಿತ್ತಿನ ಶಿವೆ. ಎನ್ನ ಅಪ್ಪೆ ಪಾರ್ವತಿದೇವಿ. ಅಕ್ಲೆನ ಯಾನ್ ಮೋಕೆದ ಮಗೆ. ಯಾನ್ ನನ ಬರ್ಪೆಮ್ಮಾಂದ್ ಪಿದಡ್ನಗ ಉಲಾಯಿಡ್ದ್ ನರಕ್ಕುನ, ಮುನ್ಕುನ ಕೇನುಂಡು. ಅವು ಯೇರಮ್ಮ ನರಕ್ಕುನುಂದು ಕೇನುವೆ. ಅವು ಎನ್ನ ನಿತ್ಯ ಮದಿಮಾಯೆ. ಅರೆಗ್ ಪಕ್ಷಿಪಾತ ಆದ್ ಲಕ್ಕರೆ ಆಪುಜಿ. ಅಣ್ಣಪ್ಪೆ ಕೇನುವೆ. ಅಮ್ಮಾ.. ಯಾನೊರ ಅರೆನ ಮೋನೆ ತೂವೊಲಿಯಾಂದ್ ಕೇಂಡೆ. ಅಣ್ಣಪ್ಪಾ.. ಎಂಕ್ಲು ಪೆರ್ಗಡೆನಕ್ಲು ಕೇನಂದೆ, ಪತ್ತಂದೆ ಏರ್ಲಾ ಉಲಾಯಿ ಬರ್ಪುನ ಕ್ರಮ ಇಜ್ಜಿ. ಈ ಮೂಲು ಉಂತು , ಯಾನ್ ಎನ್ನ ಮದಿಮಾಯಡ ಕೇಂದ್ ಬರ್ಪೆಂದ್ ಉಲಾಯಿ ಪೋದು ಕಂಡನಿಯನಡ ಕೇನುವೆರ್. ಸ್ವಾಮಿಲೇ, ಒರಿ ಅಣ್ಣಪ್ಪೆ ಪನ್ಪುನಾಯೆ ನಮ್ಮ ಬೂಡುಗು ಬೈದೆ. ಆಯಗೊರು ಇರೆನ್ ತೂವೊಡುಗೆ ಪನ್ಪೆರ್. ಪೆರ್ಗಡೆ ಪಜೆ ಪತ್ತಿನಾರ್ ಪಂಡೆರ್ ಅಮ್ಮೂ.. ಆಯನ್ ಉಲಾಯಿ ಲೆತೊಂದ್ ಬಲ. ಉಲಾಯಿ ಪೋದು ಪೆರ್ಗಡೆನ್ ತೂಯೆ. ಅಯ್ಯೋ ಸ್ವಾಮಿ ಇಂಚಿನ ದುಸ್ತಿತಿ ದಾನೆಂದ್ ಕೇಂಡೆ. ಎಂಕ್ ಪದ್ರಾಡ್ ಒರ್ಸ ಆಂಡ್ ಈ ಸೀಕ್ ಸುರು ಆದ್. ಏತ್ ಮರ್ದ್ ಮಲ್ತ್ಂಡಲಾ ಸುಮಾರ್ ಆಪುಜಿ. ಯಾನ್ ಮಂಚಾವುಗು ಅಂಟೊಂದೇ ಉಲ್ಲೆಂದ್ ಕಣ್ಣೀರ್ ಪಾಡ್ವೆರ್. ಅಣ್ಣಪ್ಪ ಕೇನುವೆ ನಿಕುಲು ಸೋಂಕು ಕಳೆಯಿಜರಾ? ನೂಲು ಕಟ್ಟಾಯಿಜರಾ? ಅವು ದಾಲ ಎಂಕುಲು ಮಲ್ತಿಜ. ಕೆಲವು ಪಂಡಿತೆರ್ನ ಮರ್ದ್ ಆಂಡ್. ದಾಲ ಗುಣಮುಖ ತೋಜುಜಿ. ಸ್ವಾಮಿಲೇ, ಯಾನೊಂಜಿ ಮರ್ದ್ ಕೊರೊಡೇ ಕೇಂಡೆ. ಅಮ್ಮು ದೇವಿ ಈ ದಾನೆ ಪಂಡಿತೆನಾ ಮರ್ದ್ ಕೊರಿಯೆರ್ಂದ್ ಪಂಡೆರ್. ಅಂಚ ದಾಲ ಇಜ್ಜಿ, ಕೆಲವು ಮರ್ದ್‌ದ ಗುರ್ತು ಎಂಕುಂಡು ಪನ್ಪೆ ಅಣ್ಣಪ್ಪೆ. ಅಂಚಾಂಡ ನಿನ್ನ ಮರ್ದ್ ಕೊರುಂದು ಅಮ್ಮು ದೇವಿ ಪನ್ಪೆರ್. ತಿರ್ತ್ ಜಾಲ್‍ಗ್ ಜತ್ತ್ ದ್ ಸಾಂಬಾರ ಬಳ್ಳಿದ ಮುದೆಲ್‍ಗ್ ಪೋದು ಕೆಲವು ದಯಿರ್ದ್ ಇರೆ ದೆತ್ತೆ. ಶಿವನ ಪುರಪ್ಪು ದೆತ್ತೆ. ಒರುಂಬ ಕೊಡಿ ಇರೆನ್ ಅಂಗೈಡ್ ಪಾಡ್ದ್ ತಿಕ್ಕ್ ದ್ ,ಪೂಂಟುದು, ಒಂಜಿ ತಕ್ಕನ ರಸ ದೆತ್ತ್ ದ್, ಅಮ್ಮು ದೇವಿಡ ಪಂಡೆ.
ಆ ರಸೊನು ಪರ್ದ್ ಒಂಜಿ ಗಳಿಗೆ ಆನಗ ಪೆರ್ಗಡೆರ್ ಸಮ ಆಯೆರ್. ಬೆತ್ತ ಪತ್ತಂದೆ ನಡಪರಾಂಡ್. ಅಣ್ನಪ್ಪಾರ್ದ್ ಇಂಚ ಆಯಿನೈರದಾತ್ರ ನನ ಈ ಮುಲ್ತು ಪೋರೆ ಬಲ್ಲಿ ಪಂಡ್ದ್ ಪೆರ್ಗಡೆರ್ ಅಣ್ಣಪ್ಪಾಡ ಪಂಡೆರ್.ಪೆರ್ಗಡೆನಲಾ ಅಮ್ಮುದೇವಿನ ಚಾಕ್ರಿ ಮಲ್ತೊಂದು ಅಣ್ಣಪ್ಪಾ ಕೆಲವು ಸಮಯ ಅವ್ಲೇ ಕುಲ್ಲಿಯೆ.
ಈಸರ ದೇವೆರ್ ಜೋಗಿ ಪುರುಸೆ ಆದ್ ಬೂಮಿಗ್ ಜತ್ತಿನ ಕತೆ
ಸಂಪೊಲಿಪುಲೆಅಮ್ಮು ದೇವಿನ ಕುಟುಮದ ಇಲ್ಲ್ ಬೆದ್ರ. ಅಮ್ಮುದೇವಿ ಕುಮಾರನ್ ಲೆತೊಂದು ಬೆದ್ರಗ್‌ ಪೋಪೆರ್. ಪೋನಗ ಅಣ್ಣಪನ್‌ ಪೆರ್ಗಡೆನ ಚಾಕ್ರಿ ಮಲ್ಪರೆ ಪಂಡ್ದ್ ಪೋಪೆರ್. ಆತಾನಗ ಕೈಲಾಸೊಡ್ದು ಈಸರ ದೇವೆರ್ ಜೋಗಿ ಸನ್ಯಾಸಿನ ಒರು ಆವೊಂದು ಜೋಳಿಗ ಪಾಡೊಂದು ಕುಡುಮಗ್ ಬರ್ಪೆರ್. ನೇತ್ರಾವತಿ ತುದೆತ್ತ ಈಯೆರೆಡ್‌ ಕುಲ್ಲಿಯೆರ್‌. ಆರ್ ಪನ್ಪೆರ್, ಕುಡುಮಗ್ ಪೋವೊಡುಂದು ಆಸೆ ಉಂಡು. ಆಂಡ ಎನನ್‌ ಏರ್‌ ಲೆತೊಂದು ಪೋಪೆರ್ಂದ್ ಪನ್ಪೆರ್. ಕುಡುಮಡ್ ಬಿರ್ಮಣ ಪೆರ್ಗಡೆಗ್‌ ಚಾಮದ(ಪುಲ್ಯ ನಾಲ್ ಗಂಟೆರ್ದ್ ದುಂಬು) ಪೊರ್ತು ಕನ ಕಟ್ಟುಂಡು. ಜೋಗಿ ಪುರುಸೆರ್ ಬೈದೆರ್‌ಗೆ, ಅರೆಗ್ ಕುಡುಮಗ್ ಬರೊಡುಂದು ಆಸ ಉಂಡುಗೆ.
ಬಿರ್ಮಣ ಪೆರ್ಗಡೆಗ್‌ ಕನ ಕಟ್ಟಿನ ಪ್ರಕಾರ ಪತ್ತ್ ಸಮಸ್ತೆರೆನ್ ಕೂಡಾವೊಂದು, ಕೊಂಬು, ತಂಬಡ, ಆನೆ ಪಲ್ಲೆಂಕಿ, ಒಯಿನತ್ತ ಬೆಡಿ ಪತೊಂದ್ ನೇತ್ರಾವತಿ ಸುದೆತ್ತಡೆ ಬತ್‍ದ್ ಸರ್ವ ಬಿರ್ದ್ ಡ್ ಜೋಗಿ ಪುರುಸೆರೆನ್ಲೆತೊಂದು ಬೂಡುಗು ಬತ್ತ್ ದ್ ಬಂಗಾರ್ದ ಆಸನೊಡು ಕುಲ್ಲಾದ್, ಬಂಗಾರ್ ದ ಹರಿಯಾಣೊಡು, ಬಂಗಾರ್ದ ತಾರಾಯಿ, ಬಂಗಾರ್ದ ಬಜ್ಜಯಿ - ಬಚ್ಚಿರೆ, ಬಂಗಾರ್ದ ಅರಿ ಜೋಗಿ ಪುರುಸೆರೆಗ್ ಕಪ್ಪಕಾಣಿಕೆ ಕೊರ್ಪೆರ್. ಆ ಪೊರ್ತುಗು ಈಸರ ದೇವೆರೆನ ಒರು ಆಯಿನ ಜೋಗಿ ಪುರುಸೆರ್ ಎಂಕ್ ಈ ಕಪ್ಪಕಾಣಿಕೆ ದೆತೊನುನ ಪದ್ದತಿ ಇಜ್ಜಿ. ಯಾನ್ ದೆತೊನೊಡಾಂಡ ಶಿವಲಿಂಗ ಬೋಡು, ಶಿವಲಿಂಗ ಇತ್ತ್ಂಡ ಮಾತ್ರ ಈರ್ ಕೊರಿನ ಕಾಣಿಕೆ ಸ್ವೀಕಾರ ಮಲ್ಪುವೆಂದ್ ಪನ್ಪೆರ್. ಈ ಇಸಯೊನ್ ಕೇಂದ್ ಪೆರ್ಗಡೆ ತರೆ ತಿರ್ಗ್ದ್ ಬೂರುವೆರ್. ಬೇಲೆ ಮಲ್ತೊಂದಿತ್ತಿನ ಅಣ್ಣಪ್ಪೆ ಬತ್‍ದ್ ಪೆರ್ಗಡೆರೆಡ ಇಸಯೊನ್ ಪನ್ಪೆರ್. ಅವೆಕ್ಕ್ ಅಣ್ಣಪ್ಪೆ ಈರ್ ದೇವಸ್ತಾನ ಕಟ್ಟಾಲೆ, ಶಿವಲಿಂಗ ಯಾನ್ ಕನಪೆಂದ್ ಪನ್ಪೆ.
ಕದ್ರಿರ್ದ್ ಅಣ್ಣಪ್ಪೆ ಶಿವಲಿಂಗೊನು ಕನತಿನ ಕತೆ
ಸಂಪೊಲಿಪುಲೆಅಣ್ಣಪ್ಪೆ ಶಿವಲಿಂಗೊನು ಕನಪೆಂದ್ ಪನ್ನಗ ಪೆರ್ಗಡೆರೆಗ್ ಮಸ್ತ್ ಕುಸಿ ಆಂಡ್. ಕೊಂಬು, ತಂಬಡ, ಪಕ್ಕಿ ನಿರ್ಸಾನಿ, ಆನೆ ಪಲ್ಲೆಂಕಿ, ಒಯಿನತ್ತ ಬೆಡಿ ಪತೊಂದ್ ನಿಕುಲು ಕಂಚಿಮಾರ ಕಟ್ಟೆಗ್ ಬತ್ ದ್ ಉಂತುಲೆ ಪಂಡ್ದ್ ಅಣ್ಣಪ್ಪೆ ಕುಡುಮರ್ದ್ ಕದ್ರಿಗ್ ಪೋಯೆ. ಕದಿರೆದ ಮಂಜುನಾಥ ದೇವೆರೆನ ದೆವಸ್ತಾನೊಗು ಪೊಗ್ಗುವೆ. ಮಂಜುನಾಥ ದೇವೆರ್ ಪ್ರತ್ಯಕ್ಷ ಆಯೆರ್. ದೇವೆರೆಗ್ ಅಡ್ಡ ಬೂರುದು ಎಂಕ್ ಶಿವಲಿಂಗ ಬೋಡು, ಯಾನ್ ಅವೆನ್ ಕುಡುಮೊಗು ಕೊನೊವೊಡುಂದು ಕೇನುವೆ. ಅವೆಕ್ಕ್ ದೇವೆರ್ ಅಣ್ಣಪ್ಪಾ ಈ ಎನ್ನ ಮೋಕೆದ ಗಣಮಣಿ. ಆಂಡಾ ನಿಕ್ಕ್ ಮಂಗ್ಳೂರು ಸಾರಾಳ ಸೀಮೆದ ಅಷ್ಟಬ್ರಹ್ಮಕಲಶ ಆಯಿನ ಶಿವಲಿಂಗೊನು ಮುಟ್ಟುನ ಅದಿಕಾರ ಇಜ್ಜಿ. ಎನ್ನ ಜ್ಯೋತಿಕೆರೆಟ್ ಎಡ್ಡೆ ಕಾರ್ನಿಕದ ಶಿವಲಿಂಗ ಉಂಡು. ಅವೆನ್ ನೀರ್ಡ್ ಮುರ್ಕುದು ಪತೊಂದ್ ಬಲಂದ್ ಪನ್ಪೆರ್. ಅಣ್ಣಪ್ಪೆ ಶಿವಲಿಂಗೊನು ದೆತ್ತ್ ದ್ ಪುಗೆಲ್‍ಡ್ ದೀವೊಂದ್ ಬರ್ಪೆರ್.
ಆತಾನಗ ಕುಕ್ಕಿನಂತಾಯೆ, ಜುಮಾದಿ, ಬಂಟೆ, ಜಾರಂದಾಯೆ, ನಾಲ್ ಜನ ಸತ್ಯೊಲು, ಸಿವಲಿಂಗ ಓಡೆ ಕೊನೊಪಂದ್ ಲಡಾಯಿಗ್ ಬರ್ಪೆರ್. ಅಣ್ಣಪ್ಪೆ ನಾಲ್ ಜನಕ್ ಒಮಜೇ ಕೈಟ್ ನೊಪುನಗ ಈಸರ ದೇವೆರ್ ಪ್ರತ್ಯಕ್ಷ ಆದ್ ನಾಲ್ ಜನ ಸತ್ಯೊಲೆನ್ ಲೆತ್‍ದ್ ನಿಕುಲು ಬಾರೀ ಮಲ್ಲ ಯನ್ನ ಬಕ್ತೆರ್ ಆಂಡ ನಿಕ್ಲೆರ್ದ್ಲಾ ಮಲ್ಲ ಎನ್ನ ಮೋಕೆದ ಬಕುತೆ ಅನ್ಣಪ್ಪೆ. ಎನ್ನ ಶಿವಲಿಂಗೊನು ಪತೊಂದ್ ಆಯೆ ಕುಡುಮಗ್ ಪೋವಡ್. ಅಪಗ ನಾಲ್ ಜನಲಾ ಅಣ್ಣಪ್ಪಡ ಮಾಪು ನಟ್ಟುವೆರ್. ಅಣ್ಣಪ್ಪೆ ಶಿವಲಿಂಗೊನ್ ಪತೊಂದ್ ಕುಡುಮಗ್ ಬರ್ಪೆ.[೨]
ಸಾದಿಯೆ ಬನ್ನಗ, 'ಪಡ್ಡೇರಿಬೊಟ್ಟು' ಕೊಡಮಣಿತ್ತಾಯ ಸಾನ ತಿಕ್ಕುಂಡು. ಎನ್ನ ಸ್ವಾಮಿನ್ ಒಡೆ ಕೊನೊಪಂದ್ ಕೊಡಮಣಿತ್ತಾಯೆ ಉಂತಾದ್ ದೀಪೆ. ಅಣ್ಣಪ್ಪಾಗ್ಲಾ ಕೊಡಮಣಿತ್ತಾಯಗ್ಲಾ ಲಡಾಯಿ ಪೆಟ್ಟ್ ಆಪುಂಡು. ಸೋಲು, ಗೇಲ್ ಏರೆಗ್ಲಾ ಆಯಿಜಿ. ರಡ್ಡ್ ಜನಲಾ ಒಂಜಿ ಒಪ್ಪಂದಗ್ ಬರ್ಪೆರ್. ಧರ್ಮಸ್ಥಳತ್ತ ಪರಕೆ ಬಕುತೆರೆಗ್ ಬರ್ರೆ ಆಯಿಜಿಂಡ, ಮೂಲೇ ಸಂದಾವಡ್. ಯಾನ್ ಪೆರ್ಗಡೆಡ ಪಂಡ್ದ್ ಈ ಜಾಗೆಗ್ ಕೊಡಮಣಿತ್ತಾಯಗ್ ಕಂಚಿದ ಮಂಚಾವು, ಕಂಚಿದ ಉಜ್ಜಾಲ್ ಸಂದಾವರೆ ಪನ್ಪೆ. ಶಿವಲಿಂಗೊನ್ ಪತೊಂದ್ ಅಣ್ಣಪ್ಪೆ ಕಂಚಿಮಾರ ಕಟ್ಟೆಗ್ ಪೋಯೆ. ಪೋದಾನಗ ಒರುಂಬ ಸುತ್ತು ಬಲಿ ಆದ್ ಶಿವಲಿಂಗೊನು ದೇವಸ್ತಾನೊಡು ಸ್ತಾಪನೆ ಮಲ್ತೆರ್.
ಶಿವಜೋಗಿಲು ಜಳಕ ಆದ ದೇವಸ್ತಾನೊದ ಗರ್ಬಗುಡಿಕ್ಕ್ ಪೋಯೆರ್. ಪೋಯಿನಾರ್ ಪಿರ ಬತ್ತಿಜೆರ್. ಆರ್ ಮಾಯಕ ಆಯೆರ್. ಪೆರ್ಗಡಾಲ್ ಅಪಗ ಅಣ್ಣಪ್ಪಡ ಈ ಏರ್ಂದ್ ಸತ್ಯೊನ್ ಪನ್ಲಾಂದ್ ಪನ್ಪುಜೆರ್ ಕುಲದೇವೆರೆನ ಆಜೊನ್ ಪಾರ್ದ್ ಕೇಂಡಲಾ ಯಾನ್ ಅಣ್ಣಪ್ಪಾಂದ್ ಪನ್ಪೆ . ಈ ಪನ್ಪುಜನಾಂದ್ ಮೂಜಿ ಸರ್ತಿ ಕೇನುವೆರ್. ಪನ್ಪುಜಾಂಡ ಯನ್ನ ನಾಲಾಯುಇ ಕುತ್ತೊನುವೆಂದ್ ಬಿಸತ್ತಿ ದೆಪ್ಪುವೆರ್.
ಆತ್ ಆನಗ ಅಣ್ಣಪ್ಪೆ ಸತ್ಯೊನ್ ಪನ್ಪೆ. ಯಾನ್ ಈಸರ ದೇವೆರೆನ ಕೈತಲಿತ್ತಿನ ಗಣಮಣಿ. ಯಾನ್ ದರ್ಮಶೊದನೆಗ್ ಈ ಕುಡುಮದ ಮಣ್ಣ್ ಗ್ ಬತ್ ದೆ. ಜಿನರಾಯ ಪೆರ್ಗಡೆ, ಇನಿ ಮುಟ್ಟು ಕುಡುಮ, ನನೊರ್ದ್ ಬೊಕ್ಕ 'ಧರ್ಮಸ್ಥಳ' ಆವಡ್. ಅನ್ನದಾನ, ವಸ್ತ್ರದಾನ, ಎಣ್ಣೆದಾನ, ವಿದ್ಯಾದಾನ, ದುಡ್ಡುದಾನ ಕೊರೊಂದು ಬಲೆ. ಎಂಕ್ ಕೊರಿ ತಾರಾಯಿದ ನಂಬೆಪತ್ತರೆ (ಪಂಡ ನಂಬೊಲಿಗೆ ಪತ್ತರೆ) ದಂಬೆಕಲ್ಲ್ ಬೋಡು. ತೂಟೆ, ಒರಸರಿ ಪೋವರೆ 'ಗೌರತ್ತಿಮಾರ್' ಬೋಡು. ಆ ಪೊರ್ತುಗು ಸತ್ಯ ನಿತ್ಯೊಗ್ ಕಂಚಿಮಾರ ಕಟ್ಟೆ ಬೋಡು ಪನ್ಪೆ. ಎತ್ತರೊಡು ತೂನಗ, ದರ್ಮದೇವತೆಲು, ಕುದ್ರೆಮುಕೊಟು ಮಂಡಲ ಪಾಡ್ದ್, ಹವಣ ದಿದ್, ತೂ ಕೊರ್ನಗ, ಅಣ್ಣಪ್ಪೆ ಕುದ್ರೆಮುಕೊಗ್ ಪಾರ್ದ್ ಪೋಯೆ. ನಿಕ್ಲೆಗ್ ಧರ್ಮಸ್ತಳೊಡ್ ಪೆರ್ಗಡೆರೆಡ ಪಂಡ್ದ್, ಎತ್ತರೊದ ಜಾಗೆಡ್, ನಾಲ್ ದಿಕ್ಕ್ ಡ್ ಪ್ರತಿಸ್ತಾಪನೆ ಮಲ್ತ್ದ್, ದರ್ಮದೇವತೆಲೆಗ್ ಪೂಪೂಜೆ ಕೊರ್ಪಾವೆ. ದುಂಬುದ ಪೂಜೆ ನಿಕ್ಲೆಗ್, ಬೊಕ್ಕದ ಪೂಜೆ ಯಾನ್ ದೆತೊನುವೆ. ಪೆರ್ಗಡೇ "ಧರ್ಮಸ್ತಳೊಡ್ ದಾನ ದರ್ಮೊಗು ಕುಮದೆಲ್ ಆಂಡ, ಮುಡಾಯಿದ ಬಾಕಿಲ್ ಜಪ್ಪುಲೆ. ಯಾನ್ ಪೋಪೆಂದ್ " ಪಂಡೆ. ಪೆರಾರ ನೂತಲೆ ಪಟ್ಟೊಗು ಬತ್ತೆ. ಅಕ್ಕರಂದ ಪಾದೆಡ್ ಉಂತಿಯೆ. ಎಲ್ವೆರ್ ಸಿರಿಕ್ಲೆನ್ ವಂದನೆ ಮಲ್ತೆ. ಅಂಬಡಾಡಿ ಕಟ್ಟ್ ಯಾವುಂದು ಪಂಡೆ, ಯಾನ್ ಪೋಪೆಂದ್ ಪಂಡೆ.[೩]
ಉಲ್ಲೇಕೊಲು
ಸಂಪೊಲಿಪುಲೆ- ↑ uggappa poojary Books, Buy uggappa poojary Books Online at Best Prices In India - sapnaonline.com. ಉಗ್ಗಪ್ಪ ಪೂಜಾರಿ. Retrieved 3 February 2024.
- ↑ "Shri Dharmasthala Manjunatheshwara". Retrieved 3 February 2024.
- ↑ "ಶ್ರೀ ಕ್ಷೇತ್ರ ಧರ್ಮಸ್ಥಳ ಮಂಜುನಾಥನ ಬಗ್ಗೆ ನಿಮಗೆಷ್ಟು ಗೊತ್ತು..? ಇಲ್ಲಿದೆ 11 ವಿಸ್ಮಯಕಾರಿ ಸಂಗತಿ." Vijay Karnataka (in ಕನ್ನಡ). Retrieved 3 February 2024.