ತೂಟೆದಾರ

ತೂಟೆ ದಾರ

ತೂಟೆದಾರ ಕಟೀಲ್ದ ಶ್ರೀ ದುರ್ಗಾಪರಮೆಶ್ವರೀ ದೇವಿಗ್ ಸಂದಾವುನ ಒಂಜಿ ಪರಕೆ, ಅತ್ತಂದೆ ಸಾಂಕೇತಿಕವಾಯಿನ ಒಂಜಿ ನಮುನೆದ ಗೊಬ್ಬು. ಉಂದೆನ್ ಕಟೀಲ್ ತೇರ್‌ದ ಕಡೆತಾನಿ ಗೊಬ್ಬುವೆರ್. ರಡ್ಡ್ ಮಾಗಣೆ ಗ್ರಾಮೊಗು ಸೇರ್ದಿನ ಅತ್ತೂರು ಬೊಕ್ಕ ಕೊಡತ್ತೂರುದ ಜನಕುಲೆನ ನಡುಟು ನಡಪುನ ಅಗ್ನಿ ಗೊಬ್ಬು ತೂಟೆದಾರ ಸೇವೆ, ಸಾವಿರಾರ್ ಜನೊಕ್ಲೆನ್ ಅಚ್ಚರಿ ಮಲ್ಪುಂಡು.

ಗೊಬ್ಬುದ ಪೊರ್ತು

ಪ್ರತಿ ವರ್ಷ ಕಟೀಲು ದುರ್ಗಾಪರಮೇಶ್ವರಿ ದೇವಸ್ಥಾನೊದ ತೇರ್ ಮುಗಿ ಬೊಕ್ಕ ಪುಲ್ಯ ಕಾಂಡೆ ದೇವಿನ ಅವಭೃತ ಸ್ನಾನ ನಡಪುಂಡು. ಅವಭೃತ ಸ್ನಾನ ಅಯಿಬೊಕ್ಕ ಈ ತೂಟೆದಾರ ಗೊಬ್ಬುವೆರ್. ಸುರುಕಾದ್ ಅಜಾರುದಲ್ಪ ನಂದಿನಿ ತುದೆಟ್ ಜಲಕ ಉತ್ಸವ ಸುರು ಆಪುಂಡು, ಬೊಕ್ಕ ರಕ್ತೇಶ್ವರಿ ಗುಡ್ಡೆಡ್ ಅತ್ತೂರು-ಕೊಡೆತ್ತೂರುದ ಊರುದಕುಲು ಮಲ್ಪುನ ತೂಟೆದಾರ ನಡಪುಂಡು. ಅವೆರ್ದ್ ಬೊಕ್ಕ ಕಣ್ಣ ಸ್ನಾನ, ಪ್ರಸಾದ ವಿತರಣೆ ನಡಪುಂಡು.

ಪಾಲ್ ದೆತೊಂಬುನಕುಲು

ತೂಟೆದಾರ ತಾರೆತ ಮಡಲ್‌‍ನ್ ಸೂಟೆ ಮಾನ್ತ್‌ತ್, ಅಯಿಕ್ ತೂ ಕೊರ್ದು ವಿರುದ್ಧ ದಿಕ್ಕುಗು ದಕ್ಕ್‌ದ್ ಮಲ್ಪುನ ಹರಕೆ ಸೇವೆ. ಒಂಜಿ ಕಡೆಟ್ ಅತ್ತೂರುದಕುಲು ಬೊಕ್ಕ ಒಂಜಿ ಕಡೆ ಕೊಡೆತ್ತೂರುದಕುಲು ಉಪ್ಪುವೆರ್ ಪರಕೆ ಸಂದಾಯ ಮಲ್ಪುನ ಅವಕಾಶ ಕಟೀಲ್‌ದ ಕೈತಲ್ ಉಪ್ಪುನ ಅತ್ತೂರು ಬೊಕ್ಕ ಕೊಡತ್ತೂರು ಗ್ರಾಮದ ಜನಕುಲೆಗ್ ಮಾತ್ರ. ಬೇತೆ ಊರುದಕುಲೆಗ್ ಈ ಗೊಬ್ಬು ಅತ್ಂಡ ಪರಕೆಡ್ ಪಾಲ್ ಪಡೆಯೆರ ಅವಕಾಸೊ ಇಜ್ಜಿ.

ಗೊಬ್ಬುನ ಕ್ರಮ

ವರ್ಷಂಪ್ರತಿ, ಕಟೀಲ್ ಜಾತ್ರೆ. ಜಾತ್ರೆ ಎಣ್ಮ ದಿನ ನಡಪುಂಡು. ಪರಕೆ ಸಂದಾವುನ ರಡ್ಡ್ ಗ್ರಾಮೊದ ಗ್ರಾಮಸ್ತೆರ್ ಈ ಎಣ್ಮ ದಿನ ಉಪಾಸ ಕುಲ್ಲುವೆರ್. ಅತ್ತಂದೆ, ಆತ್ ದಿನ ಮಧು, ಮಾಸ ಸೇವನೆ ಬೊಕ್ಕ ದುರಭ್ಯಾಸೊಲೆನ್ ಬುಡ್ದು ಸಸ್ಯಾಹಾರದ ಒಣಸ್ ಮಾತ್ರ ಮಲ್ಪುವೆರ್. ತೇರ್‌ದ ಕಡೆತಾನಿ, ಕಟೀಲ್ದಪ್ಪೆನ ಅವಭೃತ ಮುಗಿಪೆಟ್‌ಗ್ ತೂಟೆದಾರದ ಪರಕೆ ಪಂಡಿನ ಭಕ್ತೆರ್ಲಾ ಮೀಪೆರ್. ಐಡ್ದ್ ಬೊಕ್ಕ ಕುಂಕುಮ ಪ್ರಸಾದ ವಿತರಿಸಾವೆರ್. ವಿತರಣೆ ಆಯಿನ ಕುಂಕುಮ ಪ್ರಸಾದೊನು ರಡ್ ಗ್ರಾಮದ ಭಕ್ತೆರ್ ಅಕಲ್ನ ಮೈ ಕೈಕ್ ಪೂಜೊನುಂಬೆರ್. ಪರಕೆ ಪಂಡಿನಕುಲು ತಾರೆದ ಮಡಲ್‌ದ ತೂಟೆನ್ ಅಕ್‍ಲಕ್‌ಲೆನ ಇಲ್ಲಡ್ ತಯಾರಿಸಾದ್ ಪತೊಂದು ಬರ್ಪೆರ್. ಲುಂಗಿ ಅತ್‌ಡ, ಮುಂಡು ತುತ್ತಿನ ರಡ್ ಗ್ರಾಮದ ಗ್ರಾಮಸ್ತೆರ್ ದೇವಸ್ಥಾನದ ಕೈತಲ್‌ದ ಗುಡ್ಡೆಡ್ ಸೇರ್ದ್ ಎದುರುಬದುರಾದ್ ಉಂತುವೆರ್. ವರ ಸೂಚನೆ ಸಿಕ್ಕಿಬೊಕ್ಕ, ಒಂಜಿ ಬರಿಟ್ ಉಂತುದಿನಕುಲು ನನೊಂಜಿ ಬರಿಟ್ ಉಂತುದಿನಕಲ್ನ ಮಿತ್ ತೂಟೆನ್ ಅಡಕೊಂಬೆರ್. ಈ ಗೊಬ್ಬು ಸುಮಾರ್ ಪೊರ್ತು ನಡಪುಂಡು. ಈ ಗೊಬ್ಬುಡು, ಎದುರುಬದುರು ಉಂತಿನಕುಲೆಡ್ ಏರ್ ಮೂಜಿ ಸರ್ತಿ ಪಿರ ಜಾರುವೆರಾ ಅಕುಲು ಸೋತಿಲೆಕ್ಕ. ಕೆಲವು ಸರ್ತಿ ಗೊಬ್ಬುನಗ ನಡುಟು ಲಡಾಯಿ ಆಪುನ ಸಾಧ್ಯತೆಲಾ ಉಂಡು. ದಾಯೆಗ್ ಪನ್ನಗ ತೂಟೆ ಅಡಕುನಕುಲು ಈ ಗೊಬ್ಬುಡು ಗೆಂದೊಡು ಪಂಡ್‌ದ್ ಮಸ್ತ್ ಕೋಪ, ಬೆಚ್ಚಡೇ ಅಡಕುವೆರ್. ಅಪಗ ಗ್ರಾಮದ ಹಿರಿಯಕುಲು ಬತ್‌ದ್, ಪರಿಸ್ಥಿತಿನ್ ನಿಯಂತ್ರಿಸಾವೆರ್. ದೇವಸ್ತಾನೊದ ಕೈತಲ್‌ದ ಗುಡ್ಡೆಡ್ ಸುರುತ ಸುತ್ತು ಗೊಬ್ಬುವೆರ್. ರಡ್ಡನೇ ಸುತ್ತುದ ಗೊಬ್ಬುನು ದೇವಸ್ಥಾನೊದ ಎದುರುದ ಜಾಗೆಡ್ ಗೊಬ್ಬುವೆರ್.

ಪುರಾಣ- ಇತಿಹಾಸ

ಈ ಗೊಬ್ಬುದ ಬಗ್ಗೆ ಒವ್ವೇ ಪುರಾಣೊಡ್ ಮಾಹಿತಿ ಇಜ್ಜಿ ಅಂಡ, ಮಸ್ತ್ ದುಂಬುದ ಕಾಲೊಡು, ದುಷ್ಟ ಶಕ್ತಿಲೆನ್ ಸಂಹಾರ ಮಲ್ತಿನ ದೇವಿನ್ ಸಮಾಧಾನ ಮಲ್ಪರ, ಬೊಕ್ಕ ದೇವಿನ ಕುಸಿಗಾದ್ ಈ ತೂಟೆದಾರ ಗೊಬ್ಬುದಿತ್ತೆರ್ ಪನ್ಪಿನ ಕಥೆ ಉಂಡು.

ತೂಟೆದಾರೊದ ಮುಕ್ತಾಯ

ಅತ್ತೂರು, ಕೊಡೆತ್ತೂರು ರಡ್ಡ್ ಊರುದ ಜನೊಕುಲು ಎದುರು ಎದುರು ಉಂತುದು ಜ್ವಾಲೆದ ದೀಪೊಲೆನ್ ಒರಿಯನ ಮಿತ್ತ್ ದಕ್ಕ್ವೆರ್. ಆಂಡಲಾ, ಇತಿಹಾಸೊಡು ಇತ್ತೆ ಮುಟ್ಟ ಈ ಅಗ್ನಿಶಾಮಕೊಡು ಏರೆಗ್ಲಾ ಗಾಯ ಆಯಿಜಿ. ಕನಿಷ್ಠ ಬಟ್ಟೆಲೆಗ್ ಬೆಂಕಿ ಬರ್ಪುಜಿ. ದೇವೆರೆನ ಅವಭೃತೊದ ಪಿರವು ಜಾತ್ರೆದ ಪೊರ್ತುಡು ಮಾತ್ರ ನಡಪುನ ಈ ಹರಕ ರೂಪೊದ ಯುದ್ಧೊಡು ಪಾಲ್ ಪಡೆಯಿನ ರಡ್ಡ್ ತಂಡೊಲೆಗ್ಲಾ ಪ್ರಸಾದ್ ಕೊರ್ಪೆರ್. ಭಕ್ತೆರ್ ದೇವಿನ ಕೇಸರಿನ್ ತನ್ಕುಲೆನ ಚರ್ಮದ ಮಿತ್ತ್ ಪೂಜುವೆರ್. ಅಡೆಗ್ ಈ ತೂಟೆದಾರದ ಪರಕೆ ಮುಗಿಯುಂಡು.

ಉಂದೆನ್‌ಲಾ ತೂಲೆ

• ಕಟೀಲು ದುರ್ಗಾಪರಮೇಶ್ವರಿ