ನಾಲಯಿ

ನಾಲಗೆ (ನಾಲಾಯಿ, ನಾಲಯಿ, ನಾಲಕೆ, tongue) ಬಾಯಿದ ಸ್ನಾಯುದ ಅಂಗ. ನಾಲಗೆ ತೆನಸ್ಸ್‌ನ್ ಅಗಿಪುನ ಕೆಲಸೊನು ನಿರ್ವಹಿಸವುನ, ಕಶೇರುಕೊಲೆನ ಬಾಯಿದ ತಿರ್ತ ಬರಿಟ್ ಉಪ್ಪುನ ಒಂಜಿ ಮಾಂಸಲ ಜಲಗ್ರಾಹಕ ಉಂದು ರುಚಿತ ಪ್ರಧಾನ ಅಂಗವಾದುಂಡು. ನಾಲಯಿದ ಮಿತ್ತ್ ದ ಭಾಗ ರುಚಿ ಮೊಗ್ಗುಲೆಡ್ದ್ ಬೊಕ್ಕ ಮಸ್ತ್ ಜಿಹ್ವಾ ತೊಟ್ಟುಲೆಡ್ದ್ ಮುಚ್ಚಿದುಪ್ಪುಂಡು .ತೆನಸ್ ತಿನ್ಪುನ ಪೊರ್ತುಡು ನಿಂಗುನ ಕ್ರಿಯೆಡ್ ನಾಲಗೆನ್ ಉಪಯೋಗ ಮನ್ಪುವ.ನರಮಾನಿಯನ ನಾಲಗೆನ್ ರಡ್ಡ್ ಭಾಗವಾದ್ ವಿಂಗಡನೆ ಮಲ್ಪೊಲಿ.ಎದುರುದ ಓರಲ್ ಭಾಗಂದ್ ಬೊಕ್ಕ ಪಿರವುದ ದನಿತ ಭಾಗಂದ್ ವಿಂಗಡನೆ ಮಲ್ಪೊಲಿ

ಚೀಪೆದ ಅಂಶೊನು ಗುರುತಿಸವುನಂಚಿನ ಜಾಗೆ

ಪುಳಿತ ಅಂಶೊನು ಗುರುತಿಸವುನಂಚಿನ ಜಾಗೆ

ಉಪ್ಪುದ ಅಂಶೊನು ಗುರುತಿಸವುನಂಚಿನ ಜಾಗೆ

ಕಯಿಪೆದ ಅಂಶೊನು ಗುರುತಿಸವುನಂಚಿನ ಜಾಗೆ

ನಾಲಗೆ ಪರೀಕ್ಷೆ

• ಹುಷಾರ್ ಇಜ್ಜಂದೆ ಉಪ್ಪುನಗ ಡಾಕ್ಟ್ರ ನಾಲಗೆ ತೋಜಲೆ ಪನ್ಪೆರ್. ರೋಗಿನ ನಾಲಗೆನ್ ಪರೀಕ್ಷೆ ಮಲ್ಪುನಗ ರೋಗ ಲಕ್ಷಣೊಲು ತೋಜಿದ್,ಎಂಚಿನ ಕಾಯಿಲೆಂದ್ ಸುಲಭೊಡೆ ತೆರಿಯೆರೆ ಸಾಧ್ಯ ಉಂಡು. ಅತ್ತಂದೆ ಸೀಕ್ ವ ಹಂತೊಡುಂಡು ಪನ್ಪಿನೆನ್ ತೆರಿಯೆರೆ ಸಾಧ್ಯ ಉಂಡು

ನಾಲಗೆದ ಬಣ್ಣ

• ಆರೋಗ್ಯವಂತ ನಾಲಗೆ ಗುಲಾಬಿ ಬಣ್ಣೊಡಿತ್ತ್ ದ್, ಕಿನ್ಯಕಿನ್ಯ ಗಂಟುಲು (ಪಾಪಿಲ್ಲೆ) ಉಪ್ಪುಂಡು. ನಾಲಗೆ ಬೇನೆ ಆದಿತ್ತ್ಂಡ, ಅಯಿತ ಬಣ್ಣ ಬದಲಾದಿತ್ತ್ಂಡ ಅವು ರೋಗದ ಸೂಚನೆ ಆದಿಪ್ಪುನ ಸಾಧ್ಯತೆ ಉಂಡು.

ಬೊಲ್ದು ನಾಲಗೆ

• ನಾಲಿಗೆ ಬೊಲ್ದ್ ಬಣ್ಣಡಿತ್ತ್ಂಡ ಬಾಯಿದುಲಯಿಡ್ ಯೀಸ್ಟ್ ಸೋಂಕು ಆತ್ಂಡ್ ಪಂದ್ ಅರ್ಥ. ಸಕ್ಕರೆ ಕಾಯಿಲೆ, ಶ್ವಾಸಕೋಶದ ಕಾಯಿಲೆ ಇತ್ತಿನಕುಲೆನ ನಾಲಗೆ ಬೊಲ್ದು ಬಣ್ಣೊಡುಪ್ಪುಂಡು. ಕೆಲವೊಂಜಿ ಸರ್ತಿ ಆ್ಯಂಟಿಬಯಾಟಿಕ್ ಸೇವನೆ ಮಲ್ತ್ಂಡ ನಾಲಗೆ ಬೊಲ್ದ್ ಬಣ್ಣೊಗು ತಿರ್ಗುಂಡು.

ಕೆಂಪು ನಾಲಗೆ

• ನಸು ಕೆಂಪು ಬಣ್ಣದ ನಾಲಗೆ ಆರೋಗ್ಯವಂತ ನಾಲಗೆದ ಸೂಚಕ.
• ನಾಲಗೆ ಜಾಸ್ತಿ ಕೆಂಪು ಬಣ್ಣೊಡಿತ್ತ್ಂಡ ಫೋಲಿಕ್ ಆ್ಯಸಿಡ್‌, ವಿಟಮಿನ್ ಬಿ–12 ದ ಕೊರತೆ ಉಂಡು ಪಂದ್ ಅರ್ಥ. ಕೆಲವು ಸರ್ತಿ ಜಾಸ್ತಿ ಜ್ವರ ಇತ್ತ್ಂಡ ನಾಲಗೆ ಕೆಂಪು ಬಣ್ಣೊಡು ಉಪ್ಪುಂಡು.

ನಸು ಕಪ್ಪು ನಾಲಗೆ

• ಬೀಡಿ, ಸಿಗರೇಟ್ ಒಯಿಪುನಕುಲೆನ ಅಂಚನೆ ಬಾಯಿನ್ ನಿರ್ಮಲ ದೀವಂದಿನಕುಲೆನ ನಾಲಗೆ ನಸು ಕಪ್ಪು ಬಣ್ಣೊಡು ಉಪ್ಪುಂಡು. ಉಂದು ಅನಾರೋಗ್ಯಕರ ಸ್ಥಿತಿತ ಲಕ್ಷಣ.

ಬಾಯಿದ ಆರೋಗ್ಯೊಡು ನಾಲಗೆದ ಪಾತ್ರ

• ಬಾಯಿದ ಆರೋಗ್ಯೊಡು ನಾಲಗೆದ ಪಾತ್ರ ಬಹು ಮುಖ್ಯ. ಕೂಳಿ, ನಿಜಿನ್ ನಿರ್ಮಲ ದೀಪುನೆದೊಟ್ಟುಗು ನಾಲಗೆನ್ ಸ್ವಚ್ಛ ದೀಪುನ ಮಸ್ತ್ ಅಗತ್ಯ. ನಾಲಯಿ ನಿರ್ಮಲ ದೀಜಿಂಡ ಬ್ಯಾಕ್ಟೀರಿಯೊಲು ಪುಟ್ಟ್‌ದ್, ಅವು ಬಾಯಿದ ಮುಖಾಂತರ ಬಂಜಿಗ್ ಪೋದು, ಇಡೀ ಸರಿರೊದ ಆರೋಗ್ಯ ವ್ಯವಸ್ಥೆನ್ ಹಾಳ್ ಮನ್ಪುನ ಸಾಧ್ಯತೆ ಉಂಡು.

ನಾಲಗೆದ ಆರೋಗ್ಯ ಬೊಕ್ಕ ನಿರ್ಮಲ

• ನಾಲಿಗೆಡ್ ಬೊಲ್ದು ಅಗ್ರ ಇತ್ತ್ಂಡ ನಾಲಗೆನ್ ಸ್ವಚ್ಛ ಮಲ್ಪೆರೆ ‘ಟಂಗ್ ಕ್ಲೀನರ್’ ಉಪಯೋಗ ಮಲ್ಪೊಡು .ಉಂದು ತೆಳುವಾದ್ ಮೆತ್ತೆನದ ನೂಲುದ ಲೆಕ್ಕ ಇತ್ತ್ಂಡ ಎಡ್ಡೆ. ನಾಲಗದ ಮಿತ್ತ್‌ದ ಮೈಯಿನ ಮೃದುವಾದ್ ಸ್ವಚ್ಚ ಮಲ್ಪುಂಡು. ನಾಲಗೆನ್ ಸ್ವಚ್ ಮಲ್ತಿ ಬೊಕ್ಕ ಟಂಗ್ ಕ್ಲೀನರ್‌ನ್ ಬೆಚ್ಚ ನೀರ್‌ಡ್ ದೆಕ್ಕೊಡು.
• ಕಾಂಡೆ ಕೂಳಿ ದೆಕ್ಕಿ ಬೊಕ್ಕ ನಾಲಗೆನ್ ಸ್ವಚ್ಛ ಮಲ್ಪೊಡು. ಅಂಚನೆ ರಾತ್ರೆ ಜೆಪ್ಪುನೆಗ್ ದುಂಬು ಬಾಯಿ ಬೊಕ್ಕ ನಾಲಗೆನ್ ಸ್ವಚ್ಛ ಮಲ್ತ್‌ದ್ ಜೆಪ್ಪುನವು ಆರೋಗ್ಯೊಗು ಎಡ್ಡೆ.
• ಬಾಯಿದ ಮುಖಾಂತರ ಬ್ಯಾಕ್ಟೀರಿಯಾ ಸರೀರೊಗು ಸೇರ್ದ್ ಶ್ವಾಸಕೋಶೊಲೆಗ್ ಸೋಂಕು ಉಂಡು ಮಲ್ಪುಂಡು. ಅವೆಡ್ದ್ ಶ್ವಾಸಕೋಶ ಬೊಕ್ಕ ಉಸಿರಾಟದ ಸಮಸ್ಯೆಲು ಸುರು ಆಪುಂದು.
• ಕೆಲವೆರೆಗ್ ಬಾಯಿಡ್ ಕಜ್ಜಿ, ಎಲರ್ಜಿ ಆಪುಂಡು.ಅವು ರಡ್ಡ್ ವಾರೊಡ್ದು ಜಾಸ್ತಿ ಕಾಲ ಬೇನೆ ಬೊಕ್ಕ ಕಜ್ಜಿ ಇತ್ತ್ಂಡ ಅವು ಬಾಯಿ ಕ್ಯಾನ್ಸರ್‌ದ ಲಕ್ಷಣವಾದಿಪ್ಪುನ ಸಾಧ್ಯತೆ ಉಂಡು
• ಬಾಯಿನ್ ನಿರ್ಮಲ ಮಲ್ತ್‌ಜ್ಜಿಂಡ ಹೃದಯ ಸಂಬಂಧಿ ಕಾಯಿಲೆಲು ಬರ್ಪುನ ಸಾಧ್ಯತೆ ಜಾಸ್ತಿ .
• ಬಾಯಿ ಬೊಕ್ಕ ನಿಜಿಟ್ ಸೋಂಕು ಇತ್ತಿನ ಪೊಂಜೊಲೆಗ್ ಅವಧಿಪೂರ್ವ ಬಾಲೆ ಪುಟ್ಟುನ ಸಾಧ್ಯತೆ ಜಾಸ್ತಿ ಉಂಡು ಪನ್ಪಿನವು ಅದ್ಯಯನೊಡ್ದು ತಿರಿದ್ ಬತ್ತಿನ ವಿಷಯ.