ಬಿಕರ್ಣಕಟ್ಟೆ

ಬಿಕರ್ಣಕಟ್ಟೆ ಪನ್ಪಿ ಊರು ಕುಡ್ಲ ದ ಕೇಂದ್ರ ಹಂಪನಕಟ್ಟೆ‌ರ್ದ್ ಸುಮಾರ್ 3 ಕಿ. ಮಿ. ದೂರ ಈಸಾನ್ಯೊ ದಿಕ್ಕುಡು ನಂತೂರ್ರ್ದ್ 1 ಕಿ. ಮೀ. ಅಂತೊರೊಡ್ ಉಂಡು. ಕುಡ್ಲರ್ದ್ ನಂತೂರು- ಕುಲಶೇಖರ ಆದ್ ಮೂಡಬಿದ್ರೆ-ಕಾರ್ಕಳ-ಶಿವಮೊಗ್ಗಗು (ರಾಷ್ಟ್ರೀಯ ಹೆದ್ದಾರಿ ಎನ್ ಎಚ್ ನಂಬ್ರ 169) ಪೋಪಿ ರಾಜಮಾರ್ಗೊಡು ತಿಕ್ಕುಂಡು.

ಬಿಕರ್ಣಕಟ್ಟೆ
ಕುಡ್ಲ(ಮಂಗಳೂರು)ದ ಈಸಾನ್ಯೊತ ನಗರೊ
ದೇಶ	ಭಾರತ
ರಾಜ್ಯ	ಕರ್ನಾಟಕ
ಜಿಲ್ಲೆ	ದಕ್ಷಿಣ ಕನ್ನಡ
ನಗರ	ಮಂಗಳೂರು
ಉಪನಗರೊ	ಬಿಕರ್ಣಕಟ್ಟೆ

ಭೀಕರ ರಣಕಟ್ಟೆ(ಬಿಕರ್ಣಕಟ್ಟೆ)

ಚರಿತ್ರೆ

ಚರಿತ್ರೆಡ್ ಬಿಕರ್ಣಕಟ್ಟೆ – ಒಂಜಿ ತ್ಯಾಗೊ-ಬಲಿದಾನದ ಮಹತ್ವೊ ಉಪ್ಪಿನ ಊರು. ಕುಡ್ಲದ ನಗರ ವ್ಯಾಪ್ತಿಡ್ ಬರ್ಪುನ ಬಿಕರ್ಣಕಟ್ಟೆ ಊರುದ ಪಿರವುಡು ಉಪ್ಪುಣ ತ್ಯಾಗೊ-ಬಲಿದಾನದ ಮಹತ್ವೊ ಹೆಚ್ಚಿನ ಜನಕ್ಲೆಕ್ ಗೊತ್ತಿಜ್ಜಿ. ಸುಮಾರ್ 2 ಶತಮಾನೊಗ್ ದುಂಬು ಉಂದು ಭೀಕರ ರಣಕಟ್ಟೆ ಯಾದಿತ್ತ್ಂಡ್. ದಕ್ಷಿಣಕನ್ನಡ ಜಿಲ್ಲೆದ ಸುರೂತ್ತ ಸ್ವಾತಂತ್ರ್ಯ ಹೋರಾಟೊಡ್ ನೆತ್ತೆರ್ ತೆತ್ತಿನ ಇತಿಹಾಸೊಗ್ ಉಂದು ಸಾಕ್ಷಿಯಾಯಿನ ಕಟ್ಟೆಯಾದಿತ್ತ್ಂಡ್. ಸ್ವಾತಂತ್ರ್ಯ ಹೋರಾಟಗಾರೆನ್ ಈ ಕಟ್ಟೆಡ್ ಗಲ್ಲಿಗೇರಿಸಾದ್ ಅಕ್ಲೆನ ಪುಣೊಲೆನ್ ಕಕ್ಕೆ-ಗಿಡಿಳೆಗ್ ತಿನೆರೆ ಬುರ್ದ್ ಬ್ರಿಟಿಷೆರ್ ಅಮಾನವೀಯ ಕ್ರೌರ್ಯೊನ್ ಸಾರಿನಂಚಿನ ಕಟ್ಟೆ. ಜಿಲ್ಲೆದ ರೈತ ಹೋರಾಟರೆನ ಮಾಜಂದಿನ ಪಜ್ಜೆಗುರುತುಳು ನೆತ್ತ ಪಿರವುದುಂಡು.

ಸುಮಾರ್ 200 ವರ್ಷದ ದುಂಬು ಖಾಲಿ ಗುಡ್ಡೆಯಾದಿತ್ತಿನ ಬಿಕರ್ಣಕಟ್ಟೆ ಇನಿ ಫ್ಲೈಓವರ್, ರಾಷ್ಟ್ರೀಯ ಹೆದ್ದಾರಿಯಾದ್ ಬದಲಾತ್ಂಡ್. ಆಂಡ ಹೆದ್ದಾರಿದ ಕೈತಲ್ ಅಶ್ವತ್ಥ ಮರ ಇಪ್ಪುನ ಕಟ್ಟೆನೇ ಭೀಕರ ರಣಕಟ್ಟೆ ಪಂದ್ ಪಣೊಂದುಪ್ಪುಣಿ. ಐತ್ತಮಿತ್ತ್ ಜಾಗೆದ ಪುದರ್ ಕೆತ್ತ್ ದಿನ ಕಲ್ಲ್ ಲಾ ಅಡೆ ಉಂಡು. ಈ ಕಟ್ಟೆದ ಮಿತ್ತ್ ಕುಲ್ಲೆರೆ ಇಜ್ಜಿ. ಐತ್ತ ಮಿತ್ತ್ ದ ಮರೊನ್ ಮಿತರೆರೆ ಇಜ್ಜಿ. ಕಟ್ಟೆದ ಮಿತ್ತ್ ದೇವರೆನ ಪಾಟೊನ್ ದೀಪುಲೆಕ್ಕ ಇಜ್ಜಿ. ಇಂಚಿದಿನ ವಾಡಿಕೆಲು ಮೂಲು ನಡೆತ್ತೊಂದು ಬೈದುಂಡು. 1799ಡು ಬ್ರಿಟಿಷೆರ್ ಒಟ್ಟುಗ್ ಆತಿನ ಯುದ್ದೊಡು ಟಿಪ್ಪುಸುಲ್ತಾನ್ ಜೀವ ಕಳೆಯೊನುವೆ. ಮೈಸೂರು ವಶೊಗು ತಿಕ್ಕಿನ ಬೊಕ್ಕ ಬ್ರಿಟಿಷೆರ್ ಉಪ್ಪು, ಬಚ್ಚಿರೆಗ್ ಸುಂಕ ಪಾಡಿಯೆರ್. ಉಳುಮೆದ ಗೇಣಿನ್ ಪಣೊತ ರೂಪೊಡ್ ಕೊರೊಡ್ ಪಣ್ಪಿನ ಕಟ್ಟಾಜ್ಞೆ ಪಾಡಿಯೆರ್. ಇಂದೆನ್ ವಿರೋಧಪಡಿಸಾದ್ 1837ಡ್ ಕೆಂದಬಾಡಿ ರಾಮಯ್ಯ ಬೊಕ್ಕ ನಂಜಯ್ಯ ನೇತೃತ್ವೊಡು 'ಅಮರ ಸುಳ್ಯ ರೈತ ದಂಗೆ' ಆದ್ ಪೋಂಡು. ಪುಟ್ಟ ಬಸಪ್ಪ ಮೆರೆಗ್ ರಾಜ ಪಟ್ಟ ಕಟ್ಟ್ ದ್ ಕಲ್ಯಾಣಸ್ವಾಮಿ ಪಣ್ಪಿ ಪುದರ್ ದೀದ್, ಬ್ರಿಟಿಷ್ ಪರ ಯುದ್ಧೊಗ್ ಪೋಯೆರ್. ಸುಳ್ಯರ್ದ್ ಪೋಯಿನ ಈ ರೈತ ಸೈನ್ಯ ಜನರೆನ್ ಸೇರಿಸಾದ್, ಬ್ರಿಟಿಷರೆನ್ ಸೋಲಿಸಾದ್ 1837ಡ್ ಎಪ್ರಿಲ್ 5ಕ್ಕ್ ಕುಡ್ಲ ಮುಟ್ಟಿಯೆರ್. ಕಲ್ಯಾಣಸ್ವಾಮಿಗ್ ಪಟ್ಟಾಭಿಷೇಕಲಾ ಮಲ್ತೆರ್. ರಡ್ಡ್ ವರ್ಷ ಸುಂಕ, ಗೇಣಿ ರದ್ದ್ ಮಲ್ಪುಣ ನಿರ್ಣಯೊನ್ ಮಲ್ತೆರ್.

ಅವಮಾನ ತಡೆವೆರೆ ಆವಂದಿನ ಬ್ರಿಟಿಷೆರ್ ರಡ್ಡೇ ವಾರೊಡ್ ಭಾರೀ ಸೈನ್ಯ, ಅಸ್ತ್ರೊನ್ ಗೆತೊಂದು ಯುದ್ಧ ಸಾರಿಯೆರ್. ಈ ಭೀಕರ ಯುದ್ಧೊಡ್ ಕೆದಂಬಾಡಿ ರಾಮಪ್ಪ, ಹುಲಿಕುಂದ ನಂಜಯ್ಯ ಹುತಾತ್ಮರಾಯೆರ್, ನಂದಾವರ ಬಂಗರಸುರೆನ್ 1837 ಮೇ 27ಡ್, ಕಲ್ಯಾಣಸ್ವಾಮಿ ಅಂಚನೇ ಉಪ್ಪಿನಂಗಡಿದ ಮಂಜಪ್ಪರೆನ್ ಜೂನ್ 19ಡ್ ಬೊಕ್ಕ ಗುಡ್ಡೆ ಮನೆ ಅಪ್ಪಯ್ಯ ಮೆರೆನ್ ಅಗೊಸ್ಟ್ 31ಡ್ ಬಿಕರ್ಣಕಟ್ಟೆಡ್ ಗಲ್ಲಿಗೇರಿಸಾಯೆರ್. ಬ್ರಿಟಿಷರೆನ ಪರ ಹೋರಾಟ ಮಲ್ಪೆರೆ ಜನ ದುಂಬು ಪೋಯೆರೆ ಬಲ್ಲಿ ಪಣ್ದ್ ಪೋಡಿಗೆ ಪುಟ್ಟಾವುನ ಉದ್ದೇಶೊಡ್ ಗಲ್ಲುಗೇರಿಸಾಯಿನ ದೇಹೊಳೆನ್ ಜೆಪ್ಡಾಯೆರೆ ಬುಡಂದೆ ಅವೆನ್ ಕಕ್ಕೆ-ರಣಗಿಡಿಳು ತಿನ್ಪಿಲೆಕ್ಕ ತೂವೊಂದಿತ್ತೆರ್, ಬ್ರಿಟಿಷರೆನ ಈ ಕ್ರೌರ್ಯೊಗ್ ಸಾಕ್ಷಿಯಾಯಿನ ಕಟ್ಟೆ ದುಂಬಗ್ ‘ಭೀಕರ ರಣಕಟ್ಟೆ’ ಪಣ್ದ್ ಇತ್ತೆಲಾ ಉಂಡು.

ಧಾರ್ಮಿಕ ಕ್ಷೇತ್ರೊಲು

1. ಅಹ್ಸನುಲ್ ಮಸೀದಿ, ಬಿಕರ್ಣಕಟ್ಟೆ
2. ಬಾಲೆಯೇಸುನ ಇಂಗ್ರೇಜಿ, ಬಿಕರ್ಣಕಟ್ಟೆ

ಶಿಕ್ಷಣಕ್ಷೇತ್ರೊಲು

1. ದಕ್ಷಿಣ ಕನ್ನಡ ಜಿಲ್ಲಾ ಪಂಚಾಯತ್ ಹಿರಿಯ ಪ್ರಾಥಮಿಕ ಶಾಲೆ (ಇಂಗ್ಲಿಷ್/ಕನ್ನಡ ಮಾಧ್ಯಮ), ಪದವು, ಬಿಕರ್ಣಕಟ್ಟೆ

• 
  ಕಟ್ಟೆದ ಮಿತ್ತ್ ಉಪ್ಪುನ ಕಲ್ಲ್ ದ ಕೆತ್ತನೆ
• 
  ದಕ್ಷಿಣ ಕನ್ನಡ ಜಿಲ್ಲಾ ಪಂಚಾಯತ್ ಹಿರಿಯ ಪ್ರಾಥಮಿಕ ಶಾಲೆ (ಇಂಗ್ಲಿಷ್-ಕನ್ನಡ ಮಾಧ್ಯಮೊ), ಪದವು, ಬಿಕರ್ಣಕಟ್ಟೆ
• 
  ಬಾಲೆ ಯೇಸು ಇಂಗ್ರೇಜಿ, ಬಿಕರ್ಣಕಟ್ಟೆ
• 
  ಅಹ್ಸನುಲ್ ಮಸೀದಿ, ಬಿಕರ್ಣಕಟ್ಟೆ

ಉಲ್ಲೇಕೊ

https://web.archive.org/web/20220725102125/https://kpepaper.asianetnews.com/c/68739307