ಕಂಚಿಲ್‌‍ದ ಬಾಲೆ

ಕಂಚಿಲ್ದ ಬಾಲೆ ಆಚರಣೆ ದೈವ ಬೊಕ್ಕ ನರಮಾನಿಲೆನ ನಡುತ ಅಪ್ಪೆ ಬಾಲೆದ ಸಮ್ಮಂದೊನು ತೆರಿಪಾವುಂಡು. ಜೋಕುಲು ಅವಂತಿನಕುಲು ಕೇಪು ಉಳ್ಳಾಲ್ದಿನ ಸನ್ನಿಧಿಡ್ ಬಾಲೆಲೆನ್ ಅಂಗಣಕೊಟ್ಟು ಪಾಡ್ಪಾದ್ ನಾಪೊಕ್ಲೆ ಆಶೀರ್ವಾದ ಜೋಕ್ಲೆಗ್ ಮಲ್ಪಾವುನೆಕ್ ಕಜಂಬು ಪಂಪೆರ್. ಬಡಕಾಯಿ ತುಳುನಾಡ್ ಬಾಗೊಡು ಉಲ್ಲಾಯಗ್, ಉಲ್ಲಾಲ್ದಿಗ್, ಬೆಮ್ಮೆರೆಗ್ ಇಜ್ಜಾ ರಾಜಂದೈವೊಲೆಗ್ ಪರಕೆ ಪಂಡ್ ದ್ ಜೋಕುಲಾಂಡ ದೈವೊಗು ಒಪ್ಪಿಪುನ ಪರಕೆನ್ ಕಂಚಿಲ್ದ ಬಾಲೆ ಒಪ್ಪಿಪುನು ಪನ್ಪೆರ್. ದುಂಬುದ ಕಾಲೊಡು ಒವ್ವೆ ರೀತಿಯಾಯಿನ ಸೀಕ್ ಸಂಕಟ ಬತ್ತುಂಡಲಾ ದೂರ ಮಲ್ಪರೆ ಇನಿತ್ತ ಲೆಕಂದಿನ ಮರ್ದ್ ದ ವ್ಯವಸ್ಥೆಲು ಇತುಜಿ. ಅಪಗ ಅಗುಲು ತನ್ಕ್ಲೆಗ್ ಬೈದಿನ ಕಷ್ಟ ಕಾರ್ಪಣ್ಶಲೆನ್ ದೂರ ಮಲ್ಪರೆಗಾದ್ ದೈವ ದೇವೆರೆಗ್ ಪರಕೆ ಕಟೊನೆದೆರ್. ಅಂಚಿತ್ತಿನ ಅವ್ವೆತೋ ಪರಕೆಲೆಡ್ ಒಂಜಿ 'ಕಂಚಿಲ್ದ ಸೇವೆ'. ಕಂಚಿಲ್ದ ಬಾಲೆ ಪರಕೆ ಬಾರಿ ಪುಗಾರ್ತೆನ್ ಪಡೆಯಿನವ್. ಮದಿಮೆ ಆದ್ ಸರಿಯಾಯಿನ ಪೊರ್ತುಡು ಜೋಕುಲು ಆಯಿಜಿಂಡ, ಪೆದ್ದುನ (ಗರ್ಬದಾರಣೆ) ಪೊರ್ತುಡು ದಾಲ ತೊಂದರೆ ಆವಂದೆ ಇಪ್ಪಡ್ ಪಂದ್, ಅತ್ತುಂಡ ಪುಟ್ಟಿನ ಬಾಲೆದ ಆರೋಗ್ಯಡ್ ದಾಲ ಏರ್ ಪೇರ್ ಇತ್ತುಂಡ ಅಪಗ ಕಂಚಿಲ್ದ ಬಾಲೆ ಪರಕೆ ಪನ್ಪೆರ್. ಪಿರಾಕುಡ್ ಆದಿ ಆಲಡೆಗ್ ಈ ಪರಕೆ ಪನೊಂದಿತ್ತೆರ್ ಕಾಲ ಕರಿಲೆಕ ಗರೋಡಿ ಕ್ಷೇತ್ರೊಲೆಡ್, ರಾಜನ್ ದೈವಸ್ಥಾನೊಡು ಈ ರೀತಿದ ಪರಕೆ ಸೇವೆದ ಕ್ರಮ ಬತ್ತುಂಡು. ಹೆಚ್ಚಾದ್ ನಾಗಬೆರ್ಮೆರ್-ಕೋಟಿ ಚೆನ್ನಯೆರ್ನ ಆರಾದನಾ ಗರೋಡಿಲೆಡ್ ಈ ಪರಕೆ ತೂವರೆ ತಿಕ್ಕುಂಡು.
ಮಾಸ್ತ್ಯಮ್ಮನ ಆರಾಧನೆಡ್ ಜೋಕ್ಲಾಂಡ ಮಾಸ್ತ್ಯಮ್ಮಗ್ ತೊಟ್ಟಿಲ್ ಪರಕೆ ಕೊರ್ಪೆರ್. ಕಂಚೆಲ್ ಪರಕೆಡ್ ಆಂಜೊಕ್ಲಾಂಡ ಮದಿಮಯಲೇಕ ಸಿಂಗಾರ, ಪೊಂಜೊಕ್ಲಾಂಡ ಮದ್ಮಲೆನ ಲೇಕೊ ಸಿಂಗಾರ ಮಲ್ಪುವೆರ್. ಈ ಆರಾಧನೆ ಗರೋಡಿಲೆಡ್, ಆಲಡೆಲೆಡ್ ಹೆಚ್ಚಾದ್ ಬೆಮ್ಮೆರೆಗ್ ಒಪ್ಪಿಪುನ ಸೇವೆ. ಸಿಕ್ ಸಂಕಡ ಜೋಕ್ಲೆಗ್ ಬನ್ನಗಲ ಕಂಚಿಲ್ದ ಪರಕೆ ಪನ್ಪೆರ್. ಪೊಣ್ಣಗ್ ಜೋಕುಲಾಯಿಜಿಂಡ ಅಪಗ ಫಲವಂತಿಗೆಗಾದ್ ಆಲ್ ದೈವೊಲೆಗ್ ಪಟ್ಟ ಪರಕೆ ಪಂಡ್ ದ್ ಅಲೆಗ್ ಜೋಕ್ಲೆ ಭಾಗ್ಯ ತಿಕ್ಕೊಂದಿತ್ತ್ಂಡ್ . ಕಂಚಿಲ್ದ ಪರಕೆ ಎಚ್ಚಾದ್ ಇರ್ಲ್ ಡೇ ಆವೊಂದಿತ್ತ . ಕೊಂಡಾಣದ್ ಕೊಡಿ ಏರ್ನ ಪಗೆಲ್ಡ್ ಕಂಚಿಲ್ ಸೇವೆ ನಡಪುಂಡು .

ಪರಕೆ

ಪೊಣ್ಣು ಪೋದು ಪೊಂಜೊವಾಯಿಜಿಂಡ ಹಿರಿಯೆರ್ ಪೊಂಜೊವಾದ್ ಆನ್ ಬಾಲೆ ಪೆದ್ಯಾಲ್ದ ಕಂಚೆಲ್ ಪಾಡಾವೆ, ಪುಂಡಿ ಪಣವು ಪಾಡಾವೆ, ಪೊಣ್ಣು ಬಾಲೆ ಪೆದ್ಯಾಲ್‌ಂಡ ಬೊಳ್ಳಿದ ತೊಟ್ಟಿಲ್, ಬಂಗಾರದ ಬಾಲೆ ಒಪ್ಪಿಪುವೆ, ಅಂಗಣ ಅಡಿಪು ವೆಂದ್ ಪರಕೆ ಪನೊಂತೆರ್ಗೆ. ಈ ಇಚಾರೊ ಕೋಟಿ ಚೆನ್ನಯೆರೆ ಪಾರ್ದನದ ಕೆಮ್ಮಲಜೆ ನಾಗ ಬೆರ್ಮೆರೆ ಪಾರ್ದನದ ಭಾಗದ ಕಂಚಿ ಕಡಗಿನದ ಎರಂತಿಲ್ಲದ ಏಕಸಾಲೆರ್ನ ಬೊಡೆದಿ ದೆಯ್ಯಾರ್ನ ಬಗ್ಗೆ ಬನ್ನಗ ಬರ್ಪುಂಡು. ಮೂಲು ಬಾಲ್ಯ ವಿವಾಹದ ಚಿತ್ರಣ ತೋಜುಂಡು. ಪೊಣ್ಣು ಪೋದು ಪೊಂಜೊವಾಪುನ ದುಂಬೇ ಮದಿಮೆ ಮಲ್ತಿ ಇಚಾರೊ ತೆರಿಯುಂಡು . ಕೆಲವು ಕುಟುಮೊಲೆಡ್ ದುಂಬುಗು ಕುಟುಮೊಡು ಓಲು ಬಾಲೆ ಪುಟ್ಟನ್ ಡಲ ಕಂಚೆಲ್ ಪರಕೆ ಕೊರ್ಪಾನ್ಡ್ ಪಂಡ್ದ್ ಉಪ್ಪುವೆರ್ . ಅಕ್ಲೆ ಕುಟುಮೊಡು ಓಲು ವಾ ಬಾಲೆ ಪುಟ್ಟನ್ ಡಲ ಕಂಚೆಲ್ ಪರಕೆ ಒಪ್ಪಿಪ್ವೆರ್ .

ದೈವೊಲೆಗ್ ಪರಕೆ

ಈ ಪರಕೆ ದೈವೊಲೆಗ್ ಪನ್ಪಿನವು, ಮುಖ್ಯವಾದ್ ತುಳುನಾಡ್ದ ಮೂಲ ತಾಣ ಆಯಿನ ಆದಿ ಆಲಡೆಲೆಡ್ ಈ ಪರಕೆ‌ ನಡತ್ ಬರೊಂತುಂಡ್ ಕಾಲ ಕರಿಲೆಕೊನೆ , ಗರೊಡಿಲೆಡ್  , ಕೆಲವು ರಾಜಾನ್ ದೈವೊಲೆನ ಕೊಡಿಯಡಿಟ್ಲ ಈ ಪರಕೆ ಕೊರ್ಪಿನ ಕ್ರಮೊ ಉಂಡು. 

ಪರಕೆ ಕೊರ್ಪುನ

ಪಂಡಿ ಪರಕೆ ಸತ್ಯ ಆಯಿ ಬೊಕ್ಕ ಪಂಡ ಬಾಲೆ ಪುಟ್ಟಿ ಬೊಕ್ಕ ಅತ್ತ್ಂಡ ಸೀಕ್  ಕಮ್ಮಿ ಆಯಿ ಬೊಕ್ಕ ಜೋಕುಲೆಗ್ ಏಳ್ ವರ್ಷೊಡ್ದು ಪದ್ರಾಡನೆ ಪ್ರಾಯ ಮುಟ್ಟ ಸಂದಾವುನ ಕ್ರಮ ಉಂಡು. ಕಂಚಿಲ್ದ ಬಾಲೆ ಪೊಣ್ಣುಪೋದು ಪೊಂಜೊವು ಆಪಿನೆರ್ದ್ ದುಂಬು , ಅಂಚೆನೆ ಆಣ್ ಅಂಜೊವು ಆಪಿನ ಲಚ್ಚಣೊಲು ತೋಜುನೆರ್ದ್ ದುಂಬೆ ಪರಕೆ ಒಪ್ಪ್ಯಾವೊಡು ಪನ್ಪಿನ ಮೂಲ ಕಟ್ಟ್ ಕ್ರಮೊ. 

ಕ್ರಮೊ

ವಿಶೇಷವಾದ್ ಬೆಮ್ಮೆರೆ ಬಲಿಯಾನಗ ಕಡೇತ ಬಲಿ ಸುಮಾರ್ ಪುಲ್ಯಕಾಲ ಆನಗ ನಡಪುಂಡು . ದೈವ ಬಲಿ ಬನ್ನಗ ಅಪ್ಪೆ ಅಮ್ಮೆ ಜೋಕ್ಲೆನ್ಅಂಗಣೊಡು ದಲ್ಯ ಪಂಡ ಬೊಲ್ದು ಕುಂಟುದ ಮಿತ್ತ್ ಕುಲ್ಲಾದ್ ಎದುರು ಕೊಡಿ ಇರೆಟ್ ಒಂಜಿ ಸೇರ್ ಅರಿ,ಒಂಜಿ ತಾರಾಯಿ , ಬಚ್ಚಿರೆ ಬಜ್ಜೆಯಿ ತುಡರ್ದ ಸಾನಾದಿಗೆ ದೀದುಪ್ಪುವೆರ್ .

ದೈವ ಕಡೇ ಸುತ್ತು ಬನ್ನಗ ಬಲಿಕ್ ಕಂಚಿಲ್ದ ಬಾಲೆ ಎದುರು ಮೋನೆ ಪಾಡೊಂದು ಪಂಡ ದೈವೊಗು ಎದುರು ಮೋನೆ ಪಾಡೊಂದು ಒಂಜಿ ಕೈಟ್ ಪಿಂಗಾರ ಪತೊಂದು ಕುಡೊಂಜಿ ಕೈಟ್ ಬಚ್ಚಿರೆ ಬಜ್ಜೆಯಿ ಪತೊಂದು ದೈವ ಎದುರೆದುರು ಬನ್ನಗ ಪಿರ ಪಿರ ಪಜ್ಜೆ ಪಾಡೊಂದು ಪೋದು ದೈವ ಗುಂಡದುಲಯಿ ಪೋಯಿ ಬೊಕ್ಕ ಪಿಂಗಾರೊನು ಕೋಡಿಮರತ ಮುದೆಲ್ಗ್ ಪಾಡೊಡು. ಅಂಚನೆ ಪುಂಡಿ ಪಣವು ಪಾಡೊಡು . ಅಪ್ಪೆ ಅಮ್ಮೆ ಅರಿ ,ತಾರಾಯಿ ,ತೂಂಕನದ ಸಾನಾದಿಗೆ ನೇಲ್ ತುಡರ್,ಪುಂಡಿ ಪಣವು ಪತೊಂದು ಬಾಲೆದೊಟ್ಟುಗು ಸುತ್ತು ಬತ್ತ್ದ್ ಕೊಡಿಮರತ ಮುದೆಲ್ಗ್ ಪುಂಡಿ ಪಣವುನು ಜೋಕ್ಲೆಡ ಪಾಡ್ಪಾವೊಡು. ಕಂಚಿಲ್ ಸೇವೆ ಕೊರ್ಪುನಾನಿ ಕಂಚಿಲ್ದ ಬಾಲೆನ್ ಮಸ್ತ್ ಶುದ್ಧಾಚಾರಡ್ ಇಪ್ಪಾವೆರ್ ಪಂಡ ತಿನಸುಡ್ ಒಂತೆ ಎತ್ವಾಸ ಇಪ್ಪುಂಡು ಕಂಚಿಲ್ದ ಸೇವೆದಾನಿ ಬಾಲೆಗ್ ಪೇರಗಂಜಿದ(ತಾರಾಯಿದ ಪೇರ್) ಪಲಾಹಾರ ಮಲ್ಪಾವೆರ್.

ಕಂಚಿಲ್ದ ಬಾಲೆನ್ ಅಪ್ಪೆ ಅಮ್ಮೆ ದೈವೊಗು ಕೈ ಮುಗಿಯವೊಂದು ದೈವ ಎದುರೆದುರು ಬನ್ನಗ ಮೊಕ್ಲು ದೈವೊಗು ಮೋನೆ ಪಾಡೊಂದು ದೈವಸಾನೊಗು ಬಲಿಸುತ್ತು ಬರ್ಪುನಿ.ಎಲ್ಯ ಬಾಲೆ ಆಂಡ ಅಪ್ಪೆ ಅಮ್ಮೆ ತಟೊಂದು ಇಜ್ಜಾ ಪುಗೆಲ್ಡ್ ಕುಲ್ಲಾವೊಂದು ಒರಿ ಸಾನದಿಗೆನ್ ಒರಿ ಪಿಂಗಾರ ,ಅರಿ ,ತಾರಾಯಿ ನ್ ಪತೊಂದು ದೈವದೊಟ್ಟುಗು ಸುತ್ತು ಬರ್ಪೆರ್ . ಮಲ್ಲ ಜೋಕುಲು ಆಂಡ ಅಕ್ಲೆ ದೈವದೊಟ್ಟುಗು ಸುತ್ತು ಬರ್ಪೆರ್ . ಇತ್ತೆ ಅರಿ ,ತಾರಾಯಿನ್ ಕುಲ್ಲುನವುಲೆ ದೀಂಡ ಚಾಕಿರ್ದಕ್ಲೆ ಅವೆನ್ ದಿಂಜಾದ್ ಕೊನೋಪೆರ್.

ಕಂಚಿಲ್ದ ಪರಕೆ ಉಪ್ಪುನ ಜೋಕ್ಲೆಗ್ ಪಲಾರ ಮಾತ್ರ ಕೊರ್ದು ಆನಿದ ದಿನ ಜೋಕ್ಲು ಉಪಾಸ ಉಪ್ಪೊಡು . ಒಂಜಿ ವೇಳೆ ಬಡವುಗು ದಾಲ ತಿನ್ಪಾನ್ದ ಕುಡ ಮೀಪಾಡ್ ಕುಲ್ಲವೊಡು.ಆಲಡೆ ,ಬೆರ್ಮೆರೆ ಸಾನೊಲೆಡ್ ನಡತ್ತೊಂತ್ನ ಕಂಚಿಲ್ದ ಸೇವೆ ರಾಜಂದೈವ ಸನ್ನಿದಿಡ್ಲಾ ,ಉಲ್ಲಾಲ್ದಿ ಸನ್ನಿದಿಡ್ಲಾ ನಡಪುಂಡು . ಉದಾರ್ಮೆಗ್ ಕೊಂಡಾಣ ಕ್ಷೇತ್ರಡ್ ಕಂಚಿಲ್ದ ಸೇವೆ ನಡಪುಂಡು.

ಪಾರ್ದನೊಲೆಟ್

ಕೋಟಿ-ಚೆನ್ನಯೆರೆನ ಪಾಡ್ದನೊಡ್ ಬರ್ಪಿನ ಕೆಮ್ಮಲಜೆ ನಾಗಬಿರ್ಮೆರ್ ಪಾಡ್ದನೊಡು ಕಂಚಿಕಡಗಿನದ ಎರಂತಿಲ್ಲದ ಏಕಸಾಲೆರೆನ ಬೊಡೆದಿ ದೆಯ್ಯಾರ್ ಸರಿಯಾಯಿನ ಕಾಲೊಗು ಪೊಂಜೊವು ಆವಂದೆ  ಇಪ್ಪುನಗ ಸರಿಯಾಯಿನ ಕಾಲೊಗು ಪೊಣ್ಣು ಪೋದು ಪೊಂಜೊವು ಆದ್ ಆಣ್ ಬಾಲೆ ಆಂಡ ಮಾರಿ ಮಾಕಲ್ದಿನ ನಡೆಟ್  ಕಂಚಿಲ್ ಪಾಡವೆ  , ಪುಂಡಿ ಪಣವು ಪರಕೆ ಪಾಡುವೆ , ಪೊಣ್ಣುಬಾಲೆ ಆಂಡ ಬೊಲ್ಲಿದ ತೊಟ್ಟಿಲ್ಡ್ ಬಂಗಾರ್ದ ಬಾಲೆ ಒಪ್ಪ್ಯಾವೆ , ಅಂಗಣ  ಅಡಿತುದ್ ಸುದ್ದ ಮನ್ಪುವೆ. ಅಂಚನೆ ಆದಿ ಆಲಡೆ ಕಬತ್ತಾರ್'ಡ್ ಪರಕೆ ಸಂದಿನೆರ್ದ್ ಬೊಕ್ಕ ಕಲಟ್ ಉಂತುದಿನ  ಕುಮಾರಡ ಪರಕೆ ಸಂದಿನ ಬಗೆಟ್ ನುಡಿ ದೆತೊನುನ ಕ್ರಮ ನಡಪುನ ಉಲ್ಲೇಕಲ ಉಂಡು. 

ವಿದಿ ನಿಷೇದೊಲು

• ಉಚ್ಚು ತುಚ್ಚಿದ್ ಇತ್ತ್ನ ಅಂಚನೆ ನಾಯಿ ತುಚ್ಚಿದ್ ಇತ್ನ ಕಂಚಿಲ್ದ ಬಾಲೆನ್ ಅಂಗಣೊಗು ಲೆತೊಂದು ಬರ್ರೆ ಬಲ್ಲಿ . ಅಕ್ಲೆನ್ ಪಾಗಾರದ ಮಿತ್ತ್ ಉಂತಾದ್ ಅಪ್ಪೆ ಅಮ್ಮೆ ಆ ಪರಕೆದ ವಸ್ತುಲೆನ್ ದೈವದ ಕಡೆ ಬಲಿತ ಸುತ್ತುಡು ಒಪ್ಪಿಪೊಡು ಇಜ್ಜಾಂಡ ಪುಂಡಿ ಪಣವು ಬಾಲೆದ ಲೆಕ್ಕೊಡು ಕೊಡಿಮರತ ಮುದೆಲ್ಡ್ ಪಾಡೊಡು.
• ಬಾಲೆಗ್ ೭ರ್ದ್ ೧೨ವರ್ಸದುಲಯಿ ಕಂಚಿಲ್ದ ಪರಕೆ ಸಂದಾವೊಡು.
• ಆಣ್ ಪೋದು ಆಂಜೊವಾಪುನ ದುಂಬು, ಪೊಣ್ಣು ಪೋದು ಪೊಂಜೊವಾಪುನ ದುಂಬುಪಂಡ ಜೋಕ್ಲೆಗ್ ಪದ್ರಾಡ್ ವರ್ಸ ಆಪುನ ದುಂಬು ಕಂಚಿಲ್ದ ಪರಕೆ ಒಪ್ಪಿಪೋಡುಂಡು ಕಿರಮೋ ಉಂಡು.

ಸಿನಿಮೊ

ಕಂಚಿಲ್ ದ ಪರಕೆದ ಕ್ರಮೊನ್ ಕನ್ನಡ ಸಿನಿಮವಾಯಿನ, ರಘುನಾತ್ ರೈ ಮೆರೆನ ನಿರ್ದೇಸನದ 'ಕಂಚಿಲ್ದ ಬಾಲೆ' ಸಿನಿಮೊಡ್ ತೋಜಾದ್ ಕೊರ್ತೆರ್. ಈ ಸಿನಿಮೊಡ್ ಉಡುಪಿದ ಚೈತ್ರ ಹೆಗ್ಡೆ ಮೇರ್ ನಟನೆ ಮಲ್ದೆರ್. ಈ ಸಿನಿಮೊಡು ಕಂಚಿಲ್ ಪರಕೆನ್ ಬೂಟುನ ಕ್ರಮೊ ಬುಕ್ಕ ಕಂಚಿಲ್ ಪರಕೆದ ಆಚರಣೆ, ಸಂಸ್ಕೃತಿದ ಬಗೆಟ್ ಕತೆನ್ ತೆರಿಪಾದೆರ್.