ಕಂಚಿಲ್ ಪರಕೆ ತುಳುವೆರ್ ಪನ್ಪಿ ಪರಕೆದ ಕ್ರಮೊ. ಪಿರಾಕ್ ಡ್ ಜೋಕುಲು ಆಯಿಜಿಂಡ , ಜೋಕುಲೆಗ್ ದಾಲ‌ ಸಿರ್ಕ್ ಸಂಕಡೊಲು ಬತ್ತ್ಂಡ ಈ ಪರಕೆನ್ ಪನ್ಪೆರ್.  ತುಳುನಾಡ ಆಚರಣೆಲೆಡ್ ನಂಬೊಲಿಗೆದ ಬಾಗವಾದ್ ತೋಜುನ ಕಂಚಿಲ್ದ ಬಾಲೆ ಆಚರಣೆ ದೈವ ಬೊಕ್ಕ ನಮ್ಮ ನಡುತ ಅಪ್ಪೆ ಬಾಲೆದ ಸಮ್ಮಂದೊನು ತೆರಿಪಾವುಂಡು . ಜೋಕುಲಾವೆರೆ ದುಂಬುದಕುಲು ಮಡತ್ತಾನ ಮಲ್ತೊಂದಿತ್ತೆರ್ ,ನಾಗಮುರಿ ಸೇವೆ ಮಲ್ತೊಂದಿತ್ತೆರ್ , ಇತ್ತೆ ನಾಗಮಂಡಲ ಮಲ್ಪಾವೆರ್ . ಕೇಪು ಉಳ್ಳಾಲ್ದಿನ ಸನ್ನಿದಿಡ್ ಬಾಲೆಲೆನ್ ಅಂಗಣಕೊಟ್ಟು ಪಾಡ್ಪಾದ್ ನಾಪೊಕ್ಲೆ ಆಶೀರ್ವಾದ ಜೋಕ್ಲೆಗ್ ಮಲ್ಪಾವುನೆಕ್ ಕಜಂಬು ಪನ್ಪೆರ್ . ಬಡಕಾಯಿ ತುಳುನಾಡ್ ಬಾಗೊಡು ಉಲ್ಲಾಯಗ್, ಉಲ್ಲಾಲ್ದಿಗ್ , ಬೆಮ್ಮೆರೆಗ್ ಇಜ್ಜಾ ರಾಜಂದೈವೊಲೆಗ್ ಪರಕೆ ಪಂಡ್ ದ್ ಜೋಕುಲಾಂಡ ದೈವೊಗು ಒಪ್ಪಿಪುನ ಪರಕೆನ್ ಕಂಚಿಲ್ದ ಬಾಲೆ ಒಪ್ಪಿಪುನು ಪನ್ಪೆರ್ .ಪಿರಾಕುಡ್ ಆದಿ ಆಲಡೆಗ್ ಈ ಪರಕೆ ಪನೊಂದಿತ್ತೆರ್ ಕಾಲೊ ಕರಿಲೆಕ ಗರೋಡಿ ಕ್ಷೇತ್ರೊಲೆಡ್, ರಾಜನ್ ದೈವಸ್ತಾನೊಡು ಈ ರೀತಿದ ಪರಕೆ ಸೇವೆದ ಕ್ರಮೊ ಬತ್ತುಂಡು. ಎಚ್ಚಾದ್ ನಾಗಬೆರ್ಮೆರ್-ಕೋಟಿ ಚೆನ್ನಯೆರ್ನ ಆರಾದನಾ ಗರೋಡಿಲೆಡ್ ಈ ಪರಕೆ ತೂವರೆ ತಿಕ್ಕುಂಡು.
ಮಾಸ್ತ್ಯಮ್ಮನ ಆರಾದನೆಡ್ ಜೋಕ್ಲಾಂಡ ಮಾಸ್ತ್ಯಮ್ಮಗ್ ತೊಟ್ಟಿಲ್ ಪರಕೆ ಕೊರ್ಪೆರ್ . ಕಂಚಿಲ್ ಪರಕೆಡ್ ಆಣ್ ಜೋಕುಲಾಂಡ ಮದಿಮಯೆಲೆಕ ಸಿಂಗಾರ್ತ್ ದ್ ,ಪೊಂಜೋಕುಲಾಂಡ ಮದಿಮಲ್ ಲೆಕ ಸಿಂಗಾರ ಮಲ್ಪುವೆರ್ . ಈ ಆರಾದನೆ ಗರೋಡಿಲೆಡ್ ,ಆಲಡೆಲೆಡ್ ಎಚ್ಚಾದ್ ಬೆಮ್ಮೆರೆಗ್ ಒಪ್ಪಿಪುನ ಸೇವೆ. ಸಿರ್ಕ್ ಸಂಕಡ ಜೋಕ್ಲೆಗ್ ಬನ್ನಗಲ ಕಂಚಿಲ್ದ ಪರಕೆ ಪನ್ಪೆರ್ . ಪೊಣ್ಣಗ್ ಜೋಕುಲಾಯಿಜಿಂಡ ಅಪಗ ಫಲವಂತಿಗೆಗಾದ್ ಆಲ್ ದೈವೊಲೆಗ್ ಪಟ್ಟ ಪರಕೆ ಪಂಡ್ ದ್ ಅಲೆಗ್ ಜೋಕ್ಲೆ ಭಾಗ್ಯ ತಿಕ್ಕೊಂದಿತ್ತ್ಂಡ್ . ಕಂಚಿಲ್ದ ಪರಕೆ ಎಚ್ಚಾದ್ ಇರ್ಲ್ ಡೇ ಆವೊಂದಿತ್ತ . ಕೊಂಡಾಣದ್ ಕೊಡಿ ಏರ್ನ ಪಗೆಲ್ಡ್ ಕಂಚಿಲ್ ಸೇವೆ ನಡಪುಂಡು . [೧]


ದೈವೊಲೆಗ್ ಪರಕೆ ಸಂಪೊಲಿಪುಲೆ

ಈ ಪರಕೆ ದೈವೊಲೆಗ್ ಪನ್ಪಿನವು, ಮುಖ್ಯವಾದ್ ತುಳುನಾಡ್ದ ಮೂಲ ತಾಣ ಆಯಿನ ಆದಿ ಆಲಡೆಲೆಡ್ ಈ ಪರಕೆ‌ ನಡತ್ ಬರೊಂತುಂಡ್ ಕಾಲ ಕರಿಲೆಕೊನೆ , ಗರೊಡಿಲೆಡ್  , ಕೆಲವು ರಾಜಾನ್ ದೈವೊಲೆನ ಕೊಡಿಯಡಿಟ್ಲ ಈ ಪರಕೆ ಕೊರ್ಪಿನ ಕ್ರಮೊ ಉಂಡು. 

ಪರಕೆ ಕೊರ್ಪುನ ಸಂಪೊಲಿಪುಲೆ

ಪಂಡಿ ಪರಕೆ ಸತ್ಯ ಆಯಿ ಬೊಕ್ಕ ಪಂಡ ಬಾಲೆ ಪುಟ್ಟಿ ಬೊಕ್ಕ ಅತ್ತ್ಂಡ ಸೀಕ್  ಕಮ್ಮಿ ಆಯಿ ಬೊಕ್ಕ ಜೋಕುಲೆಗ್ ಏಳ್ ವರ್ಷೊಡ್ದು ಪದ್ರಾಡನೆ ಪ್ರಾಯ ಮುಟ್ಟ ಸಂದಾವುನ ಕ್ರಮ ಉಂಡು.  ಕಂಚಿಲ್ದ ಬಾಲೆ ಪೊಣ್ಣುಪೋದು ಪೊಂಜೊವು ಆಪಿನೆರ್ದ್ ದುಂಬು , ಅಂಚೆನೆ ಆಣ್ ಅಂಜೊವು ಆಪಿನ ಲಚ್ಚಣೊಲು ತೋಜುನೆರ್ದ್ ದುಂಬೆ ಪರಕೆ ಒಪ್ಪ್ಯಾವೊಡು ಪನ್ಪಿನ ಮೂಲ ಕಟ್ಟ್ ಕ್ರಮೊ. 

ಕ್ರಮೊ ಸಂಪೊಲಿಪುಲೆ

ಆಣ್ ಪೋದು ಆಂಜೊವಾಪುನ ದುಂಬು ,ಪೊಣ್ಣು ಪೋದು ಪೊಂಜೊವಾಪುನ ದುಂಬು ಪಂಡ ಜೋಕ್ಲೆಗ್ ೧೨ ವರ್ಸ ಆಪುನ ದುಂಬು ಕಂಚಿಲ್ದ ಪರಕೆ ಒಪ್ಪಿಸಾವೊಡು ಪನ್ಪಿನ ಕಿರಮ ಉಂಡು. ಆಂಡ ಇನಿತ ದಿನೊಕ್ಲೆಡ್ ಸಂಪ್ರದಾಯ ಮೀರ್ದ್ ಪ್ರಾಯ ಕರಿಬೊಕ್ಕಲ ಪರಕೆ ಸಂದಾವೊಂದುಲ್ಲೆರ್ . ೨೫ ವರ್ಸ ಕರಿ ಬೊಕ್ಕಲಾ ಇತ್ತೆ ಕಂಚಿಲ್ದ ಪರಕೆ ಒಪ್ಪಿಸಾವೆರ್ . ತೆನ್ಕಾಯಿ ಬಾಗೊದ ತುಳುನಾಡ್ ಡ್ ಈ ಆರಾದನೆ ಒಂತೆ ಕಮ್ಮಿ. ದಾಯೆ ಪಂಡ ಮೂಲು ಆಲಡೆಲು ತೂವೆರೆ ತಿಕ್ಕುಜ.
ಕಂಚಿಲ್‌ ಪನ್ಪಿನ ಪರಕೆ‌‌ ಕೊರ್ಪಿನ ಜೋಕುಲೆಗ್ ಪರಕೆ ಒಪ್ಪ್ಯಾವುನ ದಿನೊತ್ತಾನಿ ದಿನಾಲ ತಿನ್ಪಿನ ತೆನಸ್ ಲೆಡ್ ಕೆಲವು ಎತ್ಯೊಸೊಲು ಇಪ್ಪುಂಡು .‌ ಇಂಚ ಪರಕೆ ಸಂದಾವುನ ಜೋಕುಲೆಗ್ ಆನಿದ ದಿನ ರಾತ್ರೆ ಆಣ್ ಬಾಲೆ ಆದಿತ್ತ್ಂಡ ಮದಿಮಾಯನ , ಪೊಣ್ಣಾಂಡ ಮದಿಮಾಲೆನ ಒರುಟು ಸಿಂಗರ್ಪುವೆರ್ . ಇಂಚ ಸಿಂಗರ್ತಿನ ಜೋಕುಲೆನ ಕೈಟ್ ಬಚ್ಚಿರೆ ಬಜ್ಜೇಯಿ , ಪುಡತಿನ ಪಾಲೆ ಪಿಂಗಾರದ ಪುರ್ಪೊನು ಕೊರ್ಪೆರ್ ( ಮುಲ್ಪ ಪಿಂಗಾರ ಫಲವಂತಿಕೆದ ಸಂಕೇತ ಆದಿಪ್ಪುಂಡು ಪಂದ್ ಪನೊಲಿ ) ಬೊಕ್ಕ ದೇವೆರ್ / ಬೆರ್ಮೆರ್ / ಉಲ್ಲಾಯೆ / ಆ ಜಾಗೆದ ಅದಿಕಾರೊದ ಸತ್ಯದ ಬಲಿ ಪಿದರುನ ಪೊರ್ತುಗು ದಲ್ಲ್ಯ ( ಬೊಲ್ದು ಕುಂಟು ) ಪಾಡುದ್ ಎದುರುಡು ಒಂಜಿ ಕೊಡಿ ಬಾರೆದ ಇರೆಟ್ ಒಂಜಿ ಸೇರ್ ಅರಿ , ಒಂಜಿ ತಾರಯಿ ದೀದ್ ಎದುರುಡು ಒಂಜಿ ಸಾನದಿಗೆ ಅರ್ಲಾವೆರ್ . ಕಂಚಿಲ್ ಪರಕೆ ಪಂತಿನ ಬಾಲೆಗ್ ಪರಕೆ ಸಂದಾವುನೆರ್ದ್ ದುಂಬು ನಾಯಿ ತುಚಿದು ಇತ್ತ್ಂಡ ಅ ಬಾಲೆಗ್ ಕಟ್ಟುದ ಪಿರ್ಕಾರ ಕಂಚಿಲ್ದ ಕಲೊಕು ಜಪ್ಪರೆ ಇಜ್ಜಿ‌, ಅವೆತ ಬದಲ್ ಪುಂಡಿಪಣವು ಪಾಡುನ ಕ್ರಮೊ ಉಂಡು .
ಆನಿದ ಕಡೆತ ಬಲಿಕ್ ಕಂಚಿಲ್ ಕುಲ್ಲುದಿನ ಜೋಕುಲೆನ್ ಲಕ್ಕಾವುನ ಕ್ರಮ ನಡಪುಂಡು . ಲಕ್ಕಿನ ಬಾಲೆನ್  ಬಾಲೆದ ತಮ್ಮಲೆ / ಅಮ್ಮೆರ್ ಪುಗೆಲ್ಡ್ ಕುಲ್ಲಾದ್ , ಅಪ್ಪೆ ಸಾನದಿಗೆ ( ಪಿರಾಕ್ಡು ತೂಂಕಣ ದೀಪ ಪತೊಣ್ಣ ಕ್ರಮ ಇತ್ತ್ಂಡ್)  ಬೊಕ ಅರಿ ತಾರಾಯಿ  ಪತೊಂದು ಬಲಿಕ್ ಎದುರು ಮೋನೆ ಪಾಡುದ್ ಪಿರ ಪಜ್ಜೆ ದೀವೊಂದು ಪಿರ ಬಲಿ ಬರ್ಪೆರ್ ‌ . ಕಡೆಕ್ ಕೊಡಿಮರತ ಅಡಿಟ್ ಕಂಚಿಲ್ದ ಬಾಲೆದ ಕೈಟ್ ಪುಂಡಿಪಣವು ಪಾಡುನಡೆಗ್ ಪರಕೆ ಸಂದುಂಡು .‌

ಕಂಚಿಲ್ ಪಾಡುನಾನಿ ವ್ರತೊಟ್ಟ್ ಕುಲ್ಲುನ ಕ್ರಮೊ ಸಂಪೊಲಿಪುಲೆ

ಕಂಚಿಲ್ದ ಪರಕೆ ಉಪ್ಪುನ ಜೋಕ್ಲೆಗ್ ಪಲಾರ ಮಾತ್ರ ಕೊರ್ದು ಆನಿದ ದಿನ ಜೋಕ್ಲು ಉಪಾಸ ಉಪ್ಪೊಡು . ಒಂಜಿ ವೇಳೆ ಬಡವುಗು ದಾಲ ತಿನ್ಪಾಂಡ ಕುಡ ಮೀಪಾದ್ ಕುಲ್ಲಾವೊಡು. ಆಲಡೆ , ಬೆರ್ಮೆರೆ ಸಾನೊಲೆಡ್ ನಡತ್ತೊಂದಿತ್ತಿನ ಕಂಚಿಲ್ದ ಸೇವೆ ರಾಜಂದೈವ ಸನ್ನಿದಿಡ್ಲಾ , ಉಲ್ಲಾಲ್ದಿ ಸನ್ನಿದಿಡ್ಲಾ ನಡಪುಂಡು . ಉದಾರ್ಮೆಗ್ ಕೊಂಡಾಣ ಕ್ಷೇತ್ರಡ್ ಕಂಚಿಲ್ದ ಸೇವೆ ನಡಪುಂಡು.

ಪಾರ್ದನೊಲೆಟ್ ಸಂಪೊಲಿಪುಲೆ

ಕೋಟಿ-ಚೆನ್ನಯೆರೆನ ಪಾಡ್ದನೊಡ್ ಬರ್ಪಿನ ಕೆಮ್ಮಲಜೆ ನಾಗಬಿರ್ಮೆರ್ ಪಾಡ್ದನೊಡು ಕಂಚಿಕಡಗಿನದ ಎರಂತಿಲ್ಲದ ಏಕಸಾಲೆರೆನ ಬೊಡೆದಿ ದೆಯ್ಯಾರ್ ಸರಿಯಾಯಿನ ಕಾಲೊಗು ಪೊಂಜೊವು ಆವಂದೆ  ಇಪ್ಪುನಗ ಸರಿಯಾಯಿನ ಕಾಲೊಗು ಪೊಣ್ಣು ಪೋದು ಪೊಂಜೊವು ಆದ್ ಆಣ್ ಬಾಲೆ ಆಂಡ ಮಾರಿ ಮಾಕಲ್ದಿನ ನಡೆಟ್  ಕಂಚಿಲ್ ಪಾಡವೆ  , ಪುಂಡಿ ಪಣವು ಪರಕೆ ಪಾಡುವೆ , ಪೊಣ್ಣುಬಾಲೆ ಆಂಡ ಬೊಲ್ಲಿದ ತೊಟ್ಟಿಲ್ಡ್ ಬಂಗಾರ್ದ ಬಾಲೆ ಒಪ್ಪ್ಯಾವೆ , ಅಂಗಣ  ಅಡಿತುದ್ ಸುದ್ದ ಮನ್ಪುವೆ. ಅಂಚನೆ ಆದಿ ಆಲಡೆ ಕಬತ್ತಾರ್'ಡ್ ಪರಕೆ ಸಂದಿನೆರ್ದ್ ಬೊಕ್ಕ ಕಲಟ್ ಉಂತುದಿನ  ಕುಮಾರಡ ಪರಕೆ ಸಂದಿನ ಬಗೆಟ್ ನುಡಿ ದೆತೊನುನ ಕ್ರಮ ನಡಪುನ ಉಲ್ಲೇಕಲ ಉಂಡು. 

ಕಂಚಿಲ್ ಪಾಡ್ನಗ ಇಪ್ಪುನ ನಿದಿ ನಿಯಮೊಲು ಸಂಪೊಲಿಪುಲೆ

ಕಂಚಿಲ್ದ ಬಾಲೆ ಆಚರಣೆಡ್ಲಾ ಕೆಲವೊಂಜಿ ವಿದಿ ನಿಷೇದೊಲು ಉಲ್ಲ . ಉಚ್ಚು ತುಚ್ಚಿದ್ ಇತ್ತಿನ ಅಂಚನೆ ನಾಯಿ ತುಚ್ಚಿದ್ ಇತ್ತಿನ ಕಂಚಿಲ್ದ ಬಾಲೆನ್ ಅಂಗಣೊಗು ಲೆತೊಂದು ಬರ್ರೆ ಬಲ್ಲಿ. ಅಕ್ಲೆನ್ ಪಾಗಾರದ ಮಿತ್ತ್ ಉಂತಾದ್ ಅಪ್ಪೆ ಅಮ್ಮೆ ಆ ಪರಕೆದ ವಸ್ತುಲೆನ್ ದೈವದ ಕಡೆ ಬಲಿತ ಸುತ್ತುಡು ಒಪ್ಪಿಪೊಡು .ಇಜ್ಜಾ ಪುಂಡಿ ಪಣವು ಬಾಲೆದ ಲೆಕ್ಕೊಡು ಕೊಡಿಮರತ ಮುದೆಲ್ಡ್ ಪಾಡೊಡು . ಬಾಲೆಗ್ ಏಲ್ ರ್ದ್ ಪದ್ರಾಡ್ ವರ್ಸದುಲಯಿ ಕಂಚಿಲ್ದ ಪರಕೆ ಸಂದಾವೊಡು.

ಸಿನಿಮೊ ಸಂಪೊಲಿಪುಲೆ

ಕಂಚಿಲ್ ದ ಪರಕೆದ ಕ್ರಮೊನ್ ಕನ್ನಡ ಸಿನಿಮವಾಯಿನ, ರಘುನಾತ್ ರೈ ಮೆರೆನ ನಿರ್ದೇಸನದ 'ಕಂಚಿಲ್ದ ಬಾಲೆ' ಸಿನಿಮೊಡ್ ತೋಜಾದ್ ಕೊರ್ತೆರ್. ಈ ಸಿನಿಮೊಡ್ ಉಡುಪಿದ ಚೈತ್ರ ಹೆಗ್ಡೆ ಮೇರ್ ನಟನೆ ಮಲ್ದೆರ್.

ಉಲ್ಲೇಕೊ ಸಂಪೊಲಿಪುಲೆ

  1. "ಉರ್ವ ಮಾರಿಯಮ್ಮ ವಾರ್ಷಿಕ ಜಾತ್ರೆ-ದೇವರ ವೈಭವನೊಮ್ಮೆ ಕಣ್ತುಂಬಿಕೊಳ್ಳಿ!". Vijay Karnataka (in ಕನ್ನಡ). Retrieved 6 February 2024.