ಕಟೀಲು

ಕಟೀಲು ದಕ್ಷಿಣಕನ್ನಡದ ಒಂಜಿ ತೀರ್ಥಕ್ಷೇತ್ರೊ. ಈ ಊರು ನಂದಿನಿ ಸುದೆತ್ತ ದಂಡೆಡ್ ಉಂಡು

ಕಟೀಲು
ಪೇಂಟೆ, ತೀರ್ಥಕ್ಷೇತ್ರೊ
ಕಟೀಲು ಕರ್ನಾಟಕೊಡು ಕಟೀಲು
Coordinates: 13.0438238°N 74.8701417°E / 13.0438238; 74.8701417
ದೇಸೊ	ಭಾರತ
ರಾಜ್ಯೊ	ಕರ್ನಾಟಕ
ಜಿಲ್ಲೆ	ದಕ್ಷಿಣ ಕನ್ನಡ
Government
• Type	ಗ್ರಾಮ ಪಂಚಾಯತ್
• Body	ಕಿನ್ನಿಗೋಳಿ
ಬಾಸೆಲು
• Official	ತುಳು, ಕನ್ನಡ
Time zone	UTC+5:30 (Indian Standard Time)
ಪಿನ್ ಕೋಡ್	574148
ತಾಲೂಕು	ಮಂಗಳೂರು
ಲೋಕಸಭೆ	ಮಂಗಳೂರು
ವಿಧಾನಸಭೆ	ಮೂಡಬಿದ್ರೆ
Website	http://www.kinnigolitown.mrc.gov.in/

ಕಟೀಲು ದುರ್ಗಾಪರಮೇಶ್ವರಿ ದೇವಸ್ಥಾನೊ

ಇಪ್ಪುನ ಜಾಗೆ

ಕುಡ್ಲಡ್ದ್ 21 ಕಿಲೋಮೀಟರ್ ದೂರಡ್ ಕಟೀಲ್ ಉಂಡು. ಕುಡ್ಲ- ಉಡುಪಿ ಮಾರ್ಗಡ್ 5 ಕಿಲೋಮೀಟರ್ ಉಲಾಯಿ ಕಟೀಲ್ ತಿಕ್ಕುಂಡು. ಕಟೀಲ್ಡ್ 11 ಕಿಲೋಮೀಟರ್ ದೂರೊಡು ಬಜ್ಪೆ ವಿಮಾನ ನಿಲ್ದಾಣ ಉಂಡು. ಕುಡ್ಲಡ್ದ್ ಕಿನ್ನಿಗೋಳಿಗ್ ಮಸ್ತ್ ಬಸ್ಸು ಬರ್ಪುಂಡು. ಮೂಲ್ಕಿ ಕಟೀಲ್ ಗ್ ಮುಟ್ಟದ ರೈಲ್ವೇ ಸ್ಟೇಶನ್.

ಪುದಾರ್ ದ ಅರ್ಥೊ

ತುಳುಟ್ಟ್ ಕಟಿ ಪಂಡ ನಡುಮಧ್ಯ ಪಂಡ್ದ್ ಅರ್ಥೊ. ನಂದಿನಿ ಸುದೆತ್ತ ಉಗಮಸ್ಥಾನ ಕನಕಗಿರಿ ಅಂಚನೆ ಅವು ಕಡಲ್ಗ್ ಸೇರುನ ಜಾಗೆದ (ಪಾವಂಜೆ) ನಡುಟ್ಟ್ ಕಟೀಲ್ ಉಂಡು. ಇಲ ಪಂಡ ಜಾಗೆ ಪಣ್ಪಿನ ಅರ್ಥೊ. ಅಂಚಾದ್ ಈ ಜಾಗೆಗ್ ಕಟೀಲ್ ಪಂಡ್ದ್ ಪುದಾರ್ ಬತ್ತ್ಂಡ್

ಇತಿಹಾಸೊ

ಶುಂಭ ನಿಶುಂಭರೆನ ವಧೆನ್ ಅಪ್ಪೆ ಶಾಂಭವಿ ಮಲ್ತಿ ಬೊಕ್ಕ ಶುಂಭ ನಿಶುಂಭೆರೆನ ಮಂತ್ರಿ ಅರುಣಾಸುರೆ ದೆಂಗ್ ದ್ ಕುಲ್ಯೆ. ತಪಸ್ಸ್ ಮಲ್ತ್ ಬ್ರಹ್ಮದೇವೆರ್ನಾ ವರ ಗೆತ್ತೊಂದು ಯಜ್ಞ ಯಾಗಾದಿಲೆಗ್ ತೊಂದರೆ ಮಲ್ತೆ. ಅಯ್ಡ್ ದೇವತೆಲೆಗ್ ತೊಂದರೆ ಆದ್ ಭೂಮಿಡ್ ಬರ್ಸೊ ಬತ್ತಿಜಿ. ಬರ್ಸೊ ಬರ್ಪಿಲೆಕ್ಕ ಯಾಗ ಮಲ್ಪಾರೆ ಜಾಬಾಲಿ ಋಷಿ ಪಿದಾಡಿಯೇರ್. ಯಜ್ಞಗ್ ಬೋಡಾಯಿನ ವಸ್ತುಲೆನ್ ಕೊರು ಪಂಡ್ ದ್ ದೇವಲೋಕೊಗ್ ಪೋದು ಕಾಮಧೇನುನ ಮಗಲಾಯಿನ ನಂದಿನಿನ್ ಭೂಮಿಗ್ ಲೆತ್ತೆರ್. ಆಂಡ ನಂದಿನಿ ಅಹಂಕಾರದ ಪಾತೆರ ಪಾತೆರ್ದ್ ಯಾನ್ ಬರ್ಪುಜಿ ಪಂಡ್ ಪಂಡೊಲು. ಜಾಬಾಲಿ ಮಹರ್ಷಿ ಕೋಪೊಡ್ ಈ ಭೂಲೋಕಡ್ ಸುದೆಯಾದ್ ಪುಟ್ಟುಲ ಪಂಡ್ದ್ ಶಾಪ ಕೊರಿಯೆರ್. ನಂದಿನಿ ಅಪ್ಪೆ ದೇವಿನ ಪ್ರಾರ್ಥನೆ ಮಲ್ತಿಬೊಕ್ಕ, ಈ ಸುದೆಯಾದ್ ಪುಟ್ಟುಲ, ಯಾನ್ ನಿನ್ನ ಜಾಗೆಡ್ ನೆಲೆಯಾಪೆ ಪಂಡ್ದ್ ಇಂಬು ಕೊರ್ಯೆರ್. ಅರುಣಾಸುರನ್ ವಧೆ ಮಲ್ಪರ ದೇವಿ ಮೋಹಿನಿನ ರೂಪೊಡ್ ಉದ್ಯಾನೊಡ್ ಇತ್ತೊಳು. ಅರುಣಾಸುರೆ ಅಡೆ ಬತ್ತ್ದ್ ಎನ್ನ ಯಜಮಾನೆರ್ ಶುಂಭ-ನಿಶುಂಭೆರೆನ್ ಕೆರ್ತಿನ ಈಯೇ ಪಂಡ್ದ್ ಯುದ್ಧ ಶುರು ಮಲ್ತೆ. ದೇವಿ ಪಾದೆದುಲಾಯಿ ಮಾಯ ಆಯೊಳು. ಅರುಣಾಸುರೆ ಆ ಪಾದೆನ್ ಪುಡಾನಾಗ ಸಾವಿರಗಟ್ಟಲೆ ದುಂಬಿಲ್ ಬತ್ತ. ದೇವಿ ದುಂಬಿದ ರೂಪೊಡ್ ಅರುಣಾಸುರನ್ ಕೆರ್ಯೊಳು. ಜಾಬಾಲಿ ಮಹರ್ಷಿ ದೇವಿನ್ ಶಾಂತ ಮಲ್ಪರೆ ದೇವಲೋಕದ ಕಲ್ಪವೃಕ್ಷದ ಬೊಂಡದ ಅಭಿಷೇಕ ಮಲ್ತ್, ದೇವಿನ್ ನಂದಿನಿ ಸುದೆತ್ತ ಮಧ್ಯಡು ನೆಲೆ ಮಲ್ತೆರ್.

ದುರ್ಗಾಪರಮೇಶ್ವರಿ ದೇವಸ್ಥಾನೊ

ಕಟೀಲ್ದ ದುರ್ಗಾಪರಮೇಶ್ವರಿ ದೇವಸ್ಥಾನೊ ದಕ್ಷಿಣ ಕನ್ನಡದ ಪ್ರಮುಖ ದೇವಸ್ಥಾನೊಲೆಡ್ ಒಂಜಿ. ದುರ್ಗಾಪರಮೇಶ್ವರಿ ಮುಲ್ತ ಮುಖ್ಯ ದೇವತೆ. ದುರ್ಗಾಪರಮೇಶ್ವರಿನ್ ಭ್ರಮರಾಂಬೆ ಪಂಡ್ದ್ ಲಾ ಲೆಪ್ಪುವೆರ್. ಈ ದೇವಸ್ಥಾನೊ ನಂದಿನಿ ಸುದೆತ್ತ ನಡುಟ್ಟ್ ಉಂಡು. ಕಟೀಲ್ಗ್ ದಿನೋಲಾ ಸಾವಿರತ್ತ ಸಂಖ್ಯೆಡ್ ಭಕ್ತಾಭಿಮಾನಿಲು ಬರ್ಪೇರ್. ಕಟೀಲ್ದ ದೇವೆರ್ ದುರ್ಗಾಪರಮೇಶ್ವರಿ ಅಪ್ಪೆ. ಕಟೀಲ್ದ ದೇವಸ್ಥಾನೊಡು ಗೋಶಾಲೆ, ಗಜಶಾಲೆಲಾ ಉಂಡು. ಕಟೀಲ್ಡ್ ಅನ್ನಸಂತರ್ಪಣೆಲಾ ನಡಪ್ಪುಂಡು.

ವಿದ್ಯಾಸಂಸ್ಥೆಲು

ಕಟೀಲು ವಿದ್ಯಾಕೇಂದ್ರ ಆದ್ ಲಾ ಪುದಾರ್ ಮಲ್ತ್ಂಡ್. ಹೆಚ್ಚಿನ ವಿದ್ಯಾಸಂಸ್ಥೆಲೆನ್ ದೇವಸ್ಥಾನೊದ ಲೆಕ್ಕಡೇ ನಡಪ್ಪಾವೇರ್. ಎಸ್.ಡಿ.ಪಿ.ಟಿ ಫಸ್ಟ್ ಗ್ರೇಡ್ ಕಾಲೇಜ್, ಕಟೀಲು ಸಂಸ್ಕೃತ ಕಾಲೇಜ್ ಪ್ರಸಿದ್ಧ ವಿದ್ಯಾಸಂಸ್ಥೆಲು.

ಯಕ್ಷಗಾನ ಮೇಳೊ

ಕಟೀಲ್ದ ಯಕ್ಷಗಾನ ಮೇಳೊಲು ಲಾ ಪ್ರಸಿದ್ಧ. ಕಟೀಲು ದೇವಸ್ಥಾನೊದ ಆಜಿ ಯಕ್ಷಗಾನ ಮೇಲೊಲು ಉಲ್ಲ. ಈ ಯಕ್ಷಗಾನ ಮೇಳೊಲೆನ ಬಯಲಾಟೊಲು ಇಡೀ ವರ್ಷ ಬೇತೆ ಬೇತೆ ಕಡೆಟ್ಟ್ ಆವೊಂದಿಪ್ಪುವ. ಕಟೀಲ್ ಮೇಳದಕುಲು ಸಾಮಾನ್ಯವಾದ್ ದೇವಿ ಮಹಾತ್ಮೆ, ಕಟೀಲು ಕ್ಷೇತ್ರ ಮಹಾತ್ಮೆನ್ ರಾತ್ರೆ ಇಡೀ ಗೊಬ್ಬುವೇರ್

ಪಿದಾಯಿದ ಲಿಂಕ್

• Kateel Shri Durga Parameshwari Temple
• Kateelu
• Durga Parameshwari Temple Kateel
• Kateel Temple
• "Local Bus Transport – City bus Mangalore – Bus route – Travel in city bus". Archived from the original on 28 ಮಾರ್ಚಿ 2022. Retrieved 18 ಜುಲಾಯಿ 2022. {{cite web}}: Unknown parameter |dead-url= ignored (help)
• "Distance between Mangalore International Airport and Kateel".
• "How To Reach Kateel By Train – How To Reach Kateel By Rail".