ಕುಲೆ ಮದಿಮೆ

ಕುಲೆ ಮದಿಮೆ ಪಂಡ ರಡ್ಡ್ ಕುಲೆಕ್ಕ್‌ಲೆನ್ ಒಂಜಿ ಮಲ್ಪುನೆ. ಎಲ್ಯ ಪ್ರಾಯೊಡು ಮದಿಮೆಯಾವಂದೆ ತೀರ್ದ್ ಪೋಯಿನ ಆಣು ಪೊಣ‍್ಣು ಪ್ರೇತೊಲೆಗ್ ಮದಿಮೆ ಮಲ್ಪುನ ಕ್ರಮ. ನರಮಾನ್ಯೆ ಜೂವೊಡಿತ್ತೆಂಡ ಆಕ್ಲೆಗ್ ಮದಿಮ್ಮೆ ಮಲ್ಪುವೆರ್. ಆಂಡ ತುಳುನಾಡ್‍ಡ್ ಪ್ರಾಯೊ ಬರಿಯರಾಯಿನ ಬಾಲೆ ಸೈತ್ಂಡ ಅವು ಇಲ್ಲಡೆಡ್ ಇತ್ತಿನಕ್ಲೆಗ್ ಕುಲೆ ಪತ್ತ್‌ದ್ ಮದಿಮ್ಮೆ ಮಲ್ಪೊಡುಂದು ಕೇನುಂಡು. ಅಂಚಿತ್ತಿ ಸಂದರ್ಭೊಡು ಅಂಚನೇ ಸೈತಿನ ಬಾಲೆ ಇತ್ತ್ಂಡ ಅಂಚಿನ ಬಾಲೆದ ಕುಲೆನ್ ನಾಡ್ದ್, ರಡ್ಡ್ ಕುಟುಮ್ಮೊ ಸಂಸಾರೊಲಾ ಸೇರ್ದ್, ಹಿರಿಯೆರ್ ಒಪ್ಪೊಂದು ಕುಲೆಕ್ಕ್ ಮದಿಮ್ಮೆ ಮಲ್ಪುನವು ತುಳುವೆರೆಡ ಇನಿಕ್ಕ್ ಮುಟ್ಟ ನಡತ್ತ್ ಬತ್ತ್ಂಡ ಉಂಡು. ಇಜ್ಜಂಡ ಈ ಪ್ರೇತೊಲು ಮದಿಮೆ ಆತಿನ ದಂಪತಿಲೆಗ್ ಉಪದ್ರ ಕೊರ್‍ಪುಂಡು ಪನ್ಪಿನ ನಂಬಿಕೆ ಉಂಡು.

ಜಾತಿಲು

ಬಂಟ, ಪೂಜಾರಿ, ಗೌಡ, ಮೊಗೇರ, ಕೊರಗ, ಇತ್ಯಾದಿಲು

ಕ್ರಮೋ

ತೀರ್ದ್ ಪೋಯಿನ ಆಣ‍್ ಪೊಣ್ಣುನು ನಾಡ್ದ್ ಒಂಜಿ ದಿನತಾನಿ ಬಿನ್ನೆರ್ ಪೊಣ‍್ಣನ ಇಲ್ಲಾಡ್ ಸೇರುವೆರ್. ಅರಿನ್ ಕಡೆದ್ ಅಯಿಡ್ದ್ ಆಣ್ ಪೊಣ್ಣನ ಗೊಂಬೆ ಮಲ್ಪುವೆರ್. ಅವೆನ್ ಬಾರೆದ ಇರೆತ ಮಿತ್ತ್ ದೀಪೆರ್. ಆಣನ ಕಡೆತಕುಲು ಬೊಕ್ಕ ಪೊಣ‍್ಣನ ಕಡೆತಕುಲು ಕುಲೆತ ಪುದರ್ ಪಂಡ್‍ದ್ ಬಚ್ಚಿರೆ ಬಜ್ಜಾಯಿನ್ ಪಗಪುವೆರ್. ಕರಿಮಣಿ, ಕಾಜಿ, ಸೀರೆನ್ ಇರೆತ ಮಿತ್ತ್ ದೀದ್ ಧಾರೆ ಮೈಪುವೆರ್. ಬೊಕ್ಕ ಅವೆನ್ ಪಿದಯಿ ಕಂತ್‍ದ್ ಮರಿಯಾಲ ಆದಿತ್ತ್ಂಡ ನೀರ್‌ಡ್ ಬುಡ್ಪೆರ್. ಇಜ್ಜಂಡ ಕೌಂಪುವೆರ್. ಬೊಕ್ಕ ಕೋರಿನ್ ಕೆರ್ಪೆರ್. ಆಯಿಡ್ದ್ ಬೊಕ್ಕ ಮಾತೆರ್ಲಾ ವನಸ್ ಮಲ್ಪುವೆರ್.

ಮದಿಮೆ ಮಾಲ್ಪುನ ಕ್ರಮೊ

ಕುಲೆ ಮದಿಮೆ ಸಾಮಾನ್ಯವಾದ್ ಆಟಿಡ್ ಅತ್ತ್ಂಡ ಅಮಾವಾಸೆದ ಪೊರ್ತುಡು ಬೊಕ್ಕ ಆಣುನ ಇಲ್ಲಡ್, ರಾತ್ರೆ ಪೊರ್ತುಡು ನಡಪುಂಡು. ಉಂದು ಒಂಜಿ ಕಟ್ಟ್ ಕಟ್ಟಳೆನ್ ಅನುಸರಿಸವುಂಡು: ಕುಟುಮೊದ ಕಡೆತ ಆಣ್ ಬಾಲೆ ಬೊಕ್ಕ ಕಡೆತ ಪೊಣ್ಣು ಬಾಲೆನ್ ಮದಿಮೆ ಆಯೆರೆ ಅನುಮತಿ ಇಜ್ಜಿ. ಮದಿಮೆದ ದುಂಬೇ ದಿನಲಾ ನಿಶ್ಚಿತಾರ್ಥ ಮಲ್ಪುವೆರ್. ಪೊಣ್ಣನ ಇಲ್ಲದ ಮದ್ಮೆ ನಿಶ್ಚಯ ಆಂಡ ಆಣನ ಕುಟುಂಬದಕುಲು ಪಿಂಗಾರ, ಸೀರೆ, ರವಕೆ, ಕರಿಮಣಿ, ಕಾರುಂಗಿಲ ದೆತೊಂದು ಪೊಣ್ಣನ ಇಲ್ಲಗ್ ಪೋಪೆರ್. ಪೊಣ್ಣನ ಕುಟುಂಬದಕುಲು ಆಣಗ್ ಮುಂಡ, ಅಂಗಿ, ಶಾಲ್, ಪಗಡಿ ಇಂಚಿತ್ತಿನ ಕುಂಟು ತಯಾರ್ ಮಲ್ಪುವೆರ್. ಮದಿಮೆದ ಆಚರಣೆ ಮಲ್ಪರೆ, ಮಣೆಟ್ ಆಣ್ ಬೊಕ್ಕ ಪೊಣ್ಣು ಲೆನ ಮೂರ್ತಿಲೆಕ್ಕ ದೀಪೆರ್. ಕೆಲವು ಕಡೆಟ್ ಅರಿತ ಹಿಟ್ಟುಡ್ ಮಲ್ದಿನ ಆಣ್ ಪೊಣ್ಣನ ಮೂರ್ತಿಲೆನ್ ಮಣೆದ ಮಿತ್ತ್ ದೀದ್ ಅಯಿತ್ತ ಮಿತ್ತ್ ಕುಂಟು ದೀಪೆರ್. ಪರ್ಯಾಯವಾದ್ ಆಣ್ ಬಾಲೆದ ಮೂರ್ತಿಲೆನ್ ಬೊಲ್ದು ಬಟ್ಟೆಡ್ ಮುಚ್ಚಿದ್ ಕುರ್ಚಿಲೆಡ್ ದೀದ್ ಅಲಂಕಾರ ಮಲ್ಪುವೆರ್ ಆಂಡ ಈ ಮದಿಮೆಡ್ ಹೋಮ ಹವನ ಮಲ್ಪುಜೆರ್, ಮಂತ್ರ ಜಪಿಸೆರೆ ಭಟ್ರು ಇಜ್ಜಿ. ನಿಜವಾಯಿನ ಮದಿಮೆದಲೆಕನೆ ಈ ಮದಿಮೆನ್ ರಡ್ಡ್ ಕುಟುಂಬೊದ ಹಿರಿಯೆರ್, ಅಪ್ಪೆ ಅಮ್ಮೆ ಆಚರಣೆ ಮಲ್ಪುವೆರ್. ಮದಿಮೆ ಆಯಿಬೊಕ್ಕ ಮಾತಾ ಬಿನ್ನೆರೆಗ್ ಬಯ್ಯದ ವನಸ್ ಕೊರ್ಪೆರ್. ಬಯ್ಯದ ವನಸ್ ಮಲ್ಪುನ ದುಂಬು ಮದಿಮಾಲ್ ಬೊಕ್ಕ ಮದಿಮಾಲ್ನ ಮೂರ್ತಿಲೆಗ್ ಪದಿನಾಜಿ ಇರೆತೊಟ್ಟುಗು ಬಲಸುವೆರ್. ಅತ್ತಂದೆ ಆಣ್ ಬೊಕ್ಕ ಪೊಣ್ಣನ ಆತ್ಮೊಗು ಪ್ರಾರ್ಥನೆದೊಟ್ಟುಗು ರಡ್ಡ್ ಇರೆಲೆನ್ ಪ್ರತ್ಯೇಕವಾದ್ ಅರ್ಪಣೆ ಮಲ್ಪುವೆರ್.

ಮದಿಮೆದ ಅಂತ್ಯ

ಪ್ರಾರ್ಥನೆ ಮುಗಿದ್ ಮದ್ಮೆ ಆಯಿನ ದಂಪತಿಲೆನ್ ಹಿರಿಯಕುಲೆನೊಟ್ಟುಗು ಸಂಪರ್ಕ ಮಲ್ಪುನ ರೀತಿಡ್ ಪದಿನಾಜಿ ಇರೆತ ಮಿತ್ತ್ ರಡ್ಡ್ ಇರೆನ್ ಸೇರಾವೆರ್. ಇಡೆಗ್ ಕುಲೆ ಮದಿಮೆದ ಆಚರಣೆದ ಅಂತ್ಯ ಆಪುಂಡು.