ಚೆಕ್ ಇಲಾವರಿ ವ್ಯವಸ್ಥೆ(ಸಿಟಿಎಸ್ 2010)

ಚೆಕ್ ಇಲಾವರಿ ವ್ಯವಸ್ಥೆ (ಇಂಗ್ಲೀಷ್‍ಡ್ Cheque Truncation System, ಕನ್ನಡೊಡು ಚೆಕ್ ವಿಲೆವಾರಿ ವ್ಯವಸ್ಥೆ ಅತ್ತಂದೆ ಸಿಟಿಎಸ್ 2010 ಪಂಡ್‌ದ್‍ಲಾ ಪುದರ್ ಉಂಡು.) ಭೌತಿಕ ರೂಪೊದ ಬ್ಯಾಂಕ್ ಚೆಕ್‍ಲೆನ್ ಇಲಾವರಿ ಮಲ್ಪುನ, ಅತ್ಯಾಧುನಿಕವಾಯಿನ ಒಂಜಿ ವ್ಯವಸ್ಥೆ. ಬ್ಯಾಂಕ್ ಚೆಕ್‍ಲೆನ್ ಶೀಘ್ರವಾದ್ ಅತ್ತಂದೆ ಸುರಕ್ಷಿತವಾದ್ ಇಲಾವರಿ ಮಲ್ಪೊಡು ಪನ್ಪಿನ ಉದ್ದೇಶಗಾದ್, ಈ ವ್ಯವಸ್ಥೆನ್ ನಮ ದೇಸೊದ ರಿಸರ್ವ್ ಬ್ಯಾಂಕ್ ಆಗಷ್ಟ್ ೧ನೇ ತಾರೀಕ್‍ಗ್ ದೇಸೊಡೊರ್ಮೆ ಜಾರಿ ಮಲ್ತ್ಂಡ್. ಸಿಟಿಎಸ್ 2010 ಜಾರಿ ಆಯಿಬೊಕ್ಕ ಬ್ಯಾಂಕ್ ಚೆಕ್ಕ್‌ಲೆಗ್ ಒಂಜಿ ಸಾಬೀತಾಯಿನ ರೂಪರೇಷೆ ಬತ್ತ್ಂಡ್ ಪನೊಲಿ^[೧].

ಸಿಟಿಎಸ್ 2010 ವ್ಯವಸ್ಥೆ ಬರ್ರ ದುಂಬು

ಒಂಜಿ ಉದಾರ್ಮೆದ ಮೂಲಕ ಬ್ಯಾಂಕ್ ಚೆಕ್‍ನ್ ಎಂಚ ಇಲಾವರಿ ಮಲ್ತೊಂದಿತ್ತೆರ್ ತೂಕ.

ಕರ್ನಾಟಕ ಬ್ಯಾಂಕ್‍ಡ್ ಇರೆನ ಒಂಜಿ ಖಾತೆ ಉಂಡು. ಇರೆನ ದೋಸ್ತಿ ಒರಿಯಗ್ ಕಾಸ್ ಕೊರಿಯೆರೆಗಾದ್ ಇರ್ ಚೆಕ್ ಬರೆದ್, ಐಟ್ ಏತ್ ರುಪಾಯಿ ಸಂದಾಯ ಮಲ್ಪೊಡು ಪಂದ್ ಈರ್ ಬರೆದ್ ಆಯಗ್ ಕೊರ್ಪರ್. ಚೆಕ್ ದೆತೊಂದಿನ ಇರೆನ ದೋಸ್ತಿ, ತನ್ನ ಊರುಡಿತ್ತಿನ ಕರ್ನಾಟಕ ಬ್ಯಾಂಕ್‍ಗ್ ಪೋದು ಬ್ಯಾಂಕ್‍ದಕಲೆಡ ಕೊರ್ಪೆ. ಬ್ಯಾಂಕ್‍ದ ಅಧಿಕಾರಿಲು ಆ ಚೆಕ್‍ನ್ ಚೆಕ್ ಇಲಾವರಿ ಕೇಂದ್ರೊಗು ಕಡಪುಡುವೆರ್. ಚೆಕ್ ಇಲಾವರಿ ಕೇಂದ್ರೊಡು, ಚೆಕ್‍ದ ಮಾಹಿತಿ, ಚೆಕ್‍ಡ್ ಬರೇತಿನ ಅಮೌಂಟು- ಇಂಚಿನ ಬೇತೆ ಬೇತೆ ಮಾಹಿತಿಲೆನ್ ತೂದು ಪರಿಶೀಲನೆ ಮಲ್ತ್‍ದ್ ಸರಿ ತಪ್ಪು ತೂದು ಇರೆನ ದೋಸ್ತಿನ ಖಾತೆ ಇತ್ತಿನ ಬ್ಯಾಂಕ್‍ದಕುಲೆಗ್ ಮಾಹಿತಿ ಕಡಪುಡುವೆರ್. ಅಕೇರಿಡ್ ಚೆಕ್‍ಡ್ ಬರೆತಿನ ಮೊತ್ತದಾತ್ ಪಣವು ಆಯನ ಖಾತೆಗ್ ಜಮಾ ಆಪುಂಡು.

ಈ ವ್ಯವಸ್ಥೆಡ್ ಒಂಜಿ ಚೆಕ್, ಇಲಾವರಿ ಆವರ ಸುಮಾರ್ ಸಮಯ ದೆತೊನೊಂದು ಇತ್ತ್ಂಡ್. ಬ್ಯಾಂಕ್‍ಡ್ದ್ ಇಲಾವರಿ ಕೇಂದ್ರೊಗು ಚೆಕ್ ರವಾನೆ ಆನಗ, ಚೆಕ್‍ದ ಪಾಲೆಗ್ ಹಾನಿ ಆಪುನ ಸಂಭವ ಇತ್ಂಡ್. ಮುಖ್ಯವಾದ್ ಬೇತೆ ಬೇತೆ ಬ್ಯಾಂಕ್‍ದ್ ಚೆಕ್ ಬೇತೆ ಬೇತೆ ನಮೂನೆದ ಗಾತ್ರೊಲೆಡ್ ಇತ್ಂಡ್ ಅತ್ತಂದೆ ಭದ್ರತಾ ಇಸೇಸೊಲು ಇಜ್ಜಾಂಡ್. ಆಂಚಾದ್ ಚೆಕ್ ದೆತೊಂದಿನಾಯೆ ಬ್ಯಾಂಕ್‍ಗ್ ಸುಲಭೊಡು ಮೋಸ ಮಲ್ಪರ ಅವಕಾಶ ಇತ್ಂಡ್.

ವ್ಯವಸ್ಥೆದ ಪರೀಕ್ಷೆ ಬೊಕ್ಕ ಜಾರಿ

ಸಿಟಿಎಸ್ 2010 ವ್ಯವಸ್ಥೆನ್ ಪರೀಕ್ಷಿಸಾವರ, ಭಾರತದ ರಿಸರ್ವ್ ಬ್ಯಾಂಕ್ ದೇಸೊದ ರಾಜಧಾನಿ ನವದೆಹಲಿಡ್, ೧೦ ಬ್ಯಾಂಕುಲೆನ ಸಹಕಾರೊಡು ೨೦೦೮ನೇ ಫೆಬ್ರವರಿ ೧ನೇ ತಾರಿಕ್‍ಡ್ ಸಿಟಿಎಸ್ ಆಧಾರಿತವಾಯಿನ ಚೆಕ್‍ನ್ ಬುಡುಕಡೆ ಮಲ್ತ್ಂಡ್. ಈ ವ್ಯವಸ್ಥೆದ ಲೋಪದೋಸೊಲೆನ್ ತನ್ಕ್ ತೆರಿಪಾವರಗಾದ್ ೨೦೦೮ನೇ ಇಸವಿ ೩೦ನೇ ತಾರೀಕ್ ಎಪ್ರಿಲ್ ಮುಟ್ಟ ದಿನ ಗೊತ್ತು ಮಲ್ತ್ಂಡ್. ತಮಿಳುನಾಡುದ ರಾಜಧಾನಿ ಚೆನ್ನೈಡ್ ೨೪ನೇ ಸೆಪ್ಟೆಂಬರ್ ೨೦೧೧ಡು^[೨]., ಬುಕ್ಕ ಮುಂಬೈಡ್ ೨೦೧೩ನೇ ಇಸವಿ ಏಪ್ರಿಲ್ ೨೭ನೇ ತಾರೀಕ್‍ಗ್ ಸಿಟಿಎಸ್ ಅಧಾರಿತವಾಯಿನ ಚೆಕ್‍ಲೆನ್ ಪ್ರಾಯೋಗಿಕವಾದ್ ಬುಡ್ಕಡೆ ಮಲ್ತ್ಂಡ್^[೨].

ಸಿಟಿಎಸ್ 2010 ಚೆಕ್‍ದ ಪ್ರಾಯೋಗಿಕವಾದ್ ಜಾರಿ ಮಲ್ತಿಬೊಕ್ಕ ಸಿಕ್ಕಿನ ಫಲಿತಾಂಸೊಲೆನ್ ಪರಿಶೀಲನೆ ಮಲ್ತಿನ ರಿಸರ್ವ್ ಬ್ಯಾಂಕ್, ಉಂದೇನ್ ದೇಸೊಡೊರ್ಮೆ ಜಾರಿ ಮಲ್ಪರಗಾದ್ ಅಧಿಸೂಚನೆನ್ ಪ್ರಕಟ ಮಲ್ತ್ಂಡ್. ಐತ ಪ್ರಕಾರ ೨೦೧೩ನೇ ಇಸವಿ, ಆಗಷ್ಟ್ ೧ನೇ ತಾರೀಕ್‍ದಾನಿ ಸಿಟಿಎಸ್ 2010 ಪ್ರಕಾರದ ಚೆಕ್‍ಲೆನ್ ದೇಸೊಡೊರ್ಮೆ ಜಾರಿ ಮಲ್ಪೊಡು ಪಂಡ್‍ದ್ ದೇಸೊದ ಮಾತಾ ಬ್ಯಾಂಕುಲೆಗ್, ರಿಸರ್ವ್ ಬ್ಯಾಂಕ್ ಅಧೀಕೃತವಾದ್ ಸೂಚನೆ ಕೊರಿಂಡ್. ಉಂದು ಅತ್ತಂದೆ, ಜುಲೈ ೧೭ನೇ ತಾರೀಕ್ ೨೦೧೩ನೇ ಇಸವಿದಾನಿ ಒಂಜಿ ಅದಿಸೂಚನೆನ್ ಬುಡ್ಕಡೆ ಮಲ್ತಿನ ರಿಸರ್ವ್ ಬ್ಯಾಂಕ್, ಸಿಟಿಎಸ್ 2010 ಬರ್ರ ದುಂಬು ಇತ್ತಿನ ಪರತ್ ಮಾದರಿದ ಚೆಕ್‍ಲೆನ್ ೨೦೧೩ನೇ ಇಸವಿ, ಡಿಸೆಂಬರ್ ೩೧ನೇ ತಾರೀಕ್‍ದ ಉಲಾಯಿ ಇಲಾವರಿ ಮಲ್ಪೊಡು ಪಂಡ್‌ದ್ ಬ್ಯಾಂಕುಲೆಗ್ ಸೂಚನೆ ಕೊರಿಂಡ್^[೨]

ಬೇಲೆ ಮಲ್ಪುನ ಬಗೆ

ಸಿಟಿಎಸ್ 2010 ವ್ಯವಸ್ಥೆಡ್ ಚೆಕ್‍ದ ಪಾಲೆ, ಭೌತಿಕ ರೂಪೊಡು ರವಾನೆ ಆಪುಜಿ. ಚೆಕ್‍ದ ಪಾಲೆನ್ ಒಂಜಿ ವಿಶೇಷವಾಯಿನ ಸ್ಕ್ಯಾನಿಂಗ್ ಮಿಶನ್‍ಡ್ ಸ್ಕ್ಯಾನ್ ಮಲ್ತ್‍ದ್, ಎಲೆಕ್ಟ್ರಾನಿಕ್ ರೂಪೊದ ಚಿತ್ರ ಬೊಕ್ಕ, ಎಮ್‍ಐಸಿಆರ್ ಸಂಕೇತೊಲೆಡ್ ಇಪ್ಪುನ ದತ್ತಾಂಶನ್ ನಾಡ್ ಪತ್‌ದ್, ಅವೆನ್ ಸುರಕ್ಷಿತ ರೂಪೊದ ಫೈಲ್ ಮಲ್ತ್‌ದ್ ಕಂಪ್ಯೂಟರ್ ಜಾಲದ ಮೂಲಕ ಇಲಾವರಿ ಕೇಂದ್ರೊಗು ಕಡಪವೆರ್. ಬ್ಯಾಂಕ್‍ಡ್ದ್ ಬತ್ತಿನ ದತಾಂಶೊಲೆನ್ ಇಸೇಸವಾಯಿನ ಸಾಫ್ಟ್‌ವೇರ್‌ದ ಮೂಲಕ ಸಂಸ್ಕರಣೆ ಮಲ್ಪುವೆರ್. ಅಂಚ ತಿಕ್ಕಿನ ದತ್ತಾಂಶೊಲೆನ್, ಪಣವು ಸಂದಾಯ ಮಲ್ಪುನ ಬ್ಯಾಂಕ್‍ಲೆಗ್ ಪಿರ ಕಡಪಡುವೆರ್. ಅಕೇರಿಗ್ ಚೆಕ್ ಕೊರಿನಾಯಗ್ ಪಣವು ಬುಡ್ಕಡೆ ಮಲ್ಪುವೆರ್^[೨].

ಪ್ರೇಜನೊಲು

ಬ್ಯಾಂಕುಲೆಗ್^[೨]

ಬ್ಯಾಂಕ್‍ಲೆಗ್ ಚೆಕ್ ಇಲಾವರಿ ಮಲ್ಪರ ಜಾಸ್ತಿ ಸಮಯದ ಅಗತ್ಯ ಇಪ್ಪುಜಿ.
ಒಂಜಿ ದಿನಟ್ಟ್ ಜಾಸ್ತಿ ಚೆಕ್‍ಲೆನ್ ಇಲಾವರಿ ಮಲ್ಪೊಲಿ.
ಇಲಾವರಿ ಕೇಂದ್ರೊಗು ಚೆಕ್ ಕಡಪುಡುನ ಅಗತ್ಯ ಇಜ್ಜಿ. ಬದಲಾದ್, ಚೆಕ್ ಸ್ಕ್ಯಾನ್ ಮಲ್ತ್ ಚಿತ್ರ ಬೊಕ್ಕ ಚೆಕ್‍ದ ದತ್ತಾಂಶ ಕಡಪುಡಿಂಡ ಯಾವು.
ಚೆಕ್‍ದ ಪಾಲೆ, ಭೌತಿಕ ರೂಪೊಡು ರವಾನೆ ಆಪುಜಿ. ಅಂಚಾದ್ ಚೆಕ್‍ದ ಪಾಲೆಗ್ ಹಾನಿ ಆಪುನ ಪ್ರಸಂಗ ಇಜ್ಜಿ.
ಬ್ಯಾಂಕ್‍ಲೆಗ್ ಬೊಕ್ಕ ಬ್ಯಾಂಕ್‍ದ ಗಿರಾಕಿಲೆಗ್ ಮೋಸ ಆಪುನ ತಪ್ಪಾವೊಲಿ.

ಬ್ಯಾಂಕ್‍ದ ಗಿರಾಕಿಲೆಗ್^[೨]

ಚೆಕ್‍ ಕಮ್ಮಿ ಪೊರ್ತುಡು ಇಲಾವರಿ ಆಪುಂಡು.
ಪಣವು ಕೈಕ್ ಬೇಗೊಡು ತಿಕ್ಕುಂಡು.
ಸಿಟಿಎಸ್ 2010 ವ್ಯವಸ್ಥೆದ ಚೆಕ್‍ಡ್ ಮೋಸ, ಅವ್ಯವಹಾರ ಆಪುಜಿ. ಆತ್ ಸುಲಭೊಡು ವಂಚನೆ ಮಲ್ಪರೆ ಆಪುಜಿ.

ಸಿಟಿಎಸ್ 2010 ವ್ಯವಸ್ಥೆದ ಮಾನದಂಡೊಲು

ಸಿಟಿಎಸ್ 2010 ವ್ಯವಸ್ಥೆ ಬರ್ರೆ ದುಂಬು ಬೇತೆ ಬೇತೆ ಬ್ಯಾಂಕ್‍ದ್ ಚೆಕ್ ಬೇತೆ ಬೇತೆ ನಮೂನೆದ ಗಾತ್ರೊಲೆಡ್ ಇತ್ಂಡ್. ಪಂಡ, ಏಕರೂಪತೆ ಇತ್ತಿಜಿ. ಅತ್ತಂದೆ ಅಗತ್ಯವಾಯಿನ ಭದ್ರತಾ ವ್ಯವಸ್ಥೆ ಇತ್ತಿಜಿ. ಸಿಟಿಎಸ್ 2010 ವ್ಯವಸ್ಥೆ ಬತ್ತಿಬೊಕ್ಕ ಬ್ಯಾಂಕ್‍ದ್ ಚೆಕ್‍ಲೆಗ್ ಒಂಜಿ ಸಾಬೀತಾಯಿನ ರೂಪ ಬತ್ಂಡ್.

ಸಿಟಿಎಸ್ 2010 ವ್ಯವಸ್ಥೆದ ಕೆಲವೊಂಜಿ ನೀತಿ ನಿಯಮೊಲು ಇಂಚ ಉಲ್ಲ^[೩]:

ಸಾಮಾನ್ಯ ನಿಯಮೊಲು

ಚೆಕ್ ಪಾಲೆದ ಗಾತ್ರ- ಒಂಜಿ ಚೆಕ್, ೧೦ ಸೆಮೀ ಉದ್ದ, ೩.೯ ಸೆಮೀ ಅಗೆಲ ಆದ್ ಇಪ್ಪೊಡು.
ಶಾಯಿ- ಚೆಕ್ ಮುದ್ರಿಸಾವರಗಾದ್, ಕಪ್ಪು ಬಣ್ಣೊದ ಮ್ಯಾಗ್ನೆಟಿಕ್ ಶ್ಯಾಯಿನ್ ಗಲಸೊಡು.
ಕಾಕಜಿದ ದಪ್ಪೊ- ಚೆಕ್ ಪಾಲೆನ್ ಮುದ್ರಿಸಾವರ ಗಲಸುನ ಕಾಕಜಿ ೯೦ಜಿಎಸ್‍ಎಮ್ ದಪ್ಪ ಇಪ್ಪೊಡು.
ಕಾಕಜಿದ ಹಿನ್ನೆಲೆ ಬಣ್ಣ- ಚೆಕ್‍ಡ್ ಮುದ್ರಿಸಾಯಿನ ಕಪ್ಪು ಅಕ್ಷರೊಲು ಸ್ಪಷ್ಟವಾದ್ ತೋಜರಗಾದ್, ಚೆಕ್ ಪಾಲೆದ ಹಿನ್ನೆಲೆ ಬಣ್ಣ ಹೆಳಿದ್ ಇಪ್ಪೊಡು.

ಭದ್ರತಾ ನಿಯಮೊಲು

ಜಲಚಿಹ್ನೆ- ಚೆಕ್ ಪಾಲೆಡ್ ಸಿಟಿಎಸ್ ಇಂಡಿಯಾ ಜಲಚಿಹ್ನೆ ಇಪ್ಪೊಡು. ಈ ಚಿಹ್ನೆ ತೂವರ ಕೋರಿದ ತೆತ್ತಿದ ಲೆಕ ಇಪ್ಪುಂಡು, ನೆತ್ತ ವ್ಯಾಸ, ೨.೬ಸೆಂಟಿ ಮೀಟರ್‍ಡ್‍ದ್ ೩.೦೬ ಸೆಂಟಿಮೀಟರ್ ಇಪ್ಪೊಡು. ಚೆಕ್‍ದ ಪ್ರತಿಯೊಂಜಿ ಪಾಲೆಡ್ ಕನಿಷ್ಟ ಒಂಜಿ ಪೂರ್ಣಗಾತ್ರೊದ ಸಿಟಿಎಸ್ ಇಂಡಿಯಾ ಜಲಚಿಹ್ನೆ ಇಪ್ಪೊಡು. ಸಾಮಾನ್ಯ ಬೊಲ್ಪುದ ಎದುರುಗು ಚೆಕ್‍ದ ಪಾಲೆನ್ ಪತ್ತಿಂಡ, ಜಲಚಿಹ್ನೆನ್ ತೂವೊಲಿ.
ವಾಯ್ಡ್ ಪಾಂಟೋಗ್ರಾಫ್- ಒರಕ್ ತೂನಗ ಉಂದು, ದಾಲ ಅರ್ತ ಆವಂದಿನ ಕಲ್‍ಗೀಚಿದ ಲೆಕ್ಕ ತೋಜುನ ಚಿತ್ರ. ಆಂಡ, ಚೆಕ್ ಪಾಲೆನ್ ನಕಲ್ ಮಲ್ಪುನಗ, ನಕಲ್ ಕಾಪಿಡ್ ವಾಯ್ಡ್(ಉಂದು ನಕಲಿ ಕಾಪಿ ಪಂಡ್‌ದ್ ಅರ್ಥ) ಪನ್ಪಿನ ಇಂಗ್ಲಿಷ್ ಅಕ್ಷರ ತೋಜುದು ಬರ್ಪುಂಡು.
ಅಗೋಚರ ಚಿಹ್ನೆ-ಚೆಕ್‍ದ ಪಾಲೆಡ್ ಬ್ಯಾಂಕ್‍ದ ಲೋಗೋ(ಚಿಹ್ನೆ)ನ್ ಅತಿನೇರಳೆ ಶಾಯಿಡ್ ಮುದ್ರಿಸಾವೊಡು. ಚೆಕ್‍ದ ಪಾಲೆನ್ ಅತಿನೇರಳೆ ಬೊಲ್ಪುಗು ಒಡ್ಡಾದ್ ಪತ್‍ನಗ ಮಾತ್ರ ಈ ಚಿಹ್ನೆ ತೋಜುಂಡು. ಸಾಮಾನ್ಯ ಬೊಲ್ಪುಗು ಈ ಚಿಹ್ನೆ ತೋಜುಜಿ.
ಮೈಕ್ರೋ ಲೆಟರಿಂಗ್- ಚೆಕ್ ಪಾಲೆಡ್ ತಾರೀಕ್, ಪಣವುದ ಮೊತ್ತ, ನೇನ್ ಮಾತ ಬರೆಪಿನ ಜಾಗೆದ ಅಡಿಗೆರೆನ್ ಬೂತಗನ್ನಡಿಡ್ ತೂನಗ, ಬಾರೀ ಸೂಕ್ಷ್ಮ ಅಕ್ಷರೊಲೆಡ್ ಬ್ಯಾಂಕ್‍ದ ಪುದರ್‌ನ್ ಮುದ್ರಿಸಾಯಿನ ತೋಜುದು ಬರ್ಪುಂಡು. ಉಂದೆಕ್ ಮೈಕ್ರೋ ಲೆಟರಿಂಗ್ ಪನ್ಪೆರ್. ಈ ಅಕ್ಷರೊಲು ಸಾಮಾನ್ಯ ದೃಷ್ಟಿಡ್ ತೂವರ ಕಷ್ಟ, ಅಂಚಾದ್ ಬೂತಗನ್ನಡಿನ್ ಗಲಸೊಡಾಪುಂಡು.

ಗ್ರೀಡ್ ವ್ಯವಸ್ಥೆ

ಬ್ಯಾಂಕ್‍ದ ಗಿರಾಕೆಲೆಡ್‌ದ್ ಜಮೆ ಆಯಿನ್ ಚೆಕ್ಕ್‍ಲೆನ್ ಬೇಗೊಡು ಇಲಾವರಿ ಮಲ್ಪರಗಾತ್ರ, ಬ್ಯಾಂಕ್‍ಲೆಗ್ ಗ್ರೀಡ್ ವ್ಯವಸ್ಥೆನ್ ಜಾರಿ ಮಲ್ತ್‍ದೆರ್. ದುಂಬು ಇತ್ತಿನ ೬೬ ಚೆಕ್ ಇಲಾವರಿ ಕೇಂದ್ರೊಲೆನ್ ೩ ಗುಂಪು‍ಲೆಡ್ ಕ್ರೋಢೀಕರಣ ಮಲ್ತ್‌ದೆರ್. ಐತ ಮಾಹಿತಿ ತಿರ್ತ್‌ದ ಪಟ್ಟಿಡ್ ಉಂಡು^[೨].

ಚೆಕ್ ಇಲಾವರಿ ಮಲ್ಪರಗಾತ್ರ ಗ್ರೀಡ್‍ ವ್ಯವಸ್ಥೆ
ದಕ್ಷಿಣ ವಿಭಾಗೊ	ಪಶ್ಚಿಮ ವಿಭಾಗೊ	ಉತ್ತರ ವಿಭಾಗೊ
ಚೆನ್ನೈ	ಮುಂಬೈ	ದೆಹಲಿ
ಕೊಯಂಬತ್ತೂರು	ಅಹ್ಮದಾಬಾದ್	ಆಗ್ರಾ
ಹೈದರಾಬಾದ್	ಪುಣೆ	ಅಲಹಾಬಾದ್
ತಿರುವನಂತಪುರ	ಸೂರತ್	ಅಮೃತ್‍ಸರ್
ಇರೋಡ್	ನಾಗ್ಪುರ	ಭಿಲ್ವಾರಾ
ತಿರುಪ್ಪೂರ್	ವಡೋದರಾ	ಚಂಢೀಗಡ
ಬೆಂಗಳೂರು	ಇಂದೋರ್	ಡೆಹ್ರಾಡೂನ್
ಕೊಲ್ಕತ್ತಾ	ರಾಜ್‍ಕೋಟ್	ಗೋರಖ್‍ಪುರ
ತಿರುನಲ್ವೇಲಿ	ನಾಸಿಕ್	ಜೈಪುರ
ಎರ್ನಾಕುಲಮ್	ಭೋಪಾಲ್	ಜಲಂಧರ್
ಸೇಲಮ್	ಪಂಜಿಮ್	ಜಮ್ಮು
ತ್ರಿಶೂರು	ಗ್ವಾಲಿಯರ್	ಜೆಮ್‍ಶೆಡ್‍ಪುರ
ವಿಶಾಖಪಟ್ಟಣಂ	ರಾಯ್ಪುರ	ಜೋಧಪುರ
ವಿಜಯವಾಡ	ಕೊಲ್ಹಾಪುರ	ಕಾನ್ಪುರ
ಹುಬ್ಬಳ್ಳಿ	ಔರಂಗಾಬಾದ್	ಕೋಟಾ
ಕೋಝಿಕೋಡ್	ಜಬಲ್ಪುರ	ಲಖ್ನೋ
ಮಧುರೈ	ಸೋಲಾಪುರ	ಲುಧಿಯಾನಾ
ತಿರುಚಿರಾಪಳ್ಳಿ	ಜಾಮ್ನಗರ್	ಪಾಟ್ನಾ
ಪುದುಚೇರಿ	ಭಾವ್‍ನಗರ್	ರಾಂಚಿ
ಮೈಸೂರು	ಆನಂದ್	ಉದಯಪುರ
ಮಂಗಳೂರು	ವಾರಣಾಸಿ
ಬೆಳಗಾವಿ
ಭುವನೇಶ್ವರ
ಗುವಾಹಟಿ
ಕಟಕ್

ಉಲ್ಲೇಕೊಲು

↑ "FREQUENTLY ASKED QUESTIONS (FAQ) ON CHEQUE TRUNCATION PROJECT IN THE NATIONAL CAPITAL REGION" (PDF). rbidocs.rbi.org.in. Reserve Bank of India Department of Payment & Settlement Systems Central Office Mumbai. Retrieved 26 September 2020.
↑ ^೨.೦ ^೨.೧ ^೨.೨ ^೨.೩ ^೨.೪ ^೨.೫ ^೨.೬ "FREQUENTLY ASKED QUESTIONS". www.rbi.org.in. ಭಾರತೀಯ ರಿಸರ್ವ್ ಬ್ಯಾಂಕ್. Retrieved 26 September 2020.
↑ ""CTS-2010 Standard" for Cheque Forms – Specifications" (PDF). rbi.org.in. ಭಾರತೀಯ ರಿಸರ್ವ್ ಬ್ಯಾಂಕ್. Retrieved 26 September 2020.

[1] "FREQUENTLY ASKED QUESTIONS (FAQ) ON CHEQUE TRUNCATION PROJECT IN THE NATIONAL CAPITAL REGION" (PDF). rbidocs.rbi.org.in. Reserve Bank of India Department of Payment & Settlement Systems Central Office Mumbai. Retrieved 26 September 2020.

[FREQUENTLY_ASKED_QUESTIONS-2] ೨.೦ ^೨.೧ ^೨.೨ ^೨.೩ ^೨.೪ ^೨.೫ ^೨.೬ "FREQUENTLY ASKED QUESTIONS". www.rbi.org.in. ಭಾರತೀಯ ರಿಸರ್ವ್ ಬ್ಯಾಂಕ್. Retrieved 26 September 2020.

[3] ""CTS-2010 Standard" for Cheque Forms – Specifications" (PDF). rbi.org.in. ಭಾರತೀಯ ರಿಸರ್ವ್ ಬ್ಯಾಂಕ್. Retrieved 26 September 2020.

[೧]

[೨]

[೩]