ಯಶ್ಮಿತಾ ಬೆಳ್ಳೂರು

ಅಂತರಾಷ್ಟೀಯ ಮಟ್ಟೊಡು ಭಾರತದ ಕೀರ್ತಿ ಪತಾಕೆನ್ ರಾಪಾಯಿನ ಕ್ರೀಡಾತಾರೆ ಯಶ್ಮಿತಾ ಬೆಳ್ಳೂರು. ಬಂಗಾರ್ದ ಪದಕ ಗೆಂದಿನ ತುಳುನಾಡ್‍ದ ಪೆರ್ಮೆದ ಪೊಣ್ಣು.

ಜೀವನ

ಬಡತನದ ಜೀವನೊಡುಲ ಮಿಂಚಿನನಂಚಿನ ಕ್ರೀಡಾತಾರೆ ಯಶ್ಮಿತಾ. ಕಾಸರಗೋಡು ಜಿಲ್ಲೆದ ಬೆಳ್ಳೂರು ಗ್ರಾಮ ಪಂಚಾಯತ್ ದ ಮಿತ್ತಜಾಲ್ ಪನ್ಪಿ ಎಲ್ಯ ಊರುಡು ಕೃಷಿತ ಬೇಲೆ ಅಂಚನೆ ಕೂಲಿ ಬೇಲೆ ಪೋಪಿನಂಚಿನ ಸುಬ್ಬಣ್ಣ ಬೊಕ್ಕ ಸುಮತಿ ದಂಪತಿಲೆನ ಮೂಜಿ ಜೋಕುಲೆಡ್ ರಡ್ಡನೆದ ಮಗಳಾದ್ ಯಶ್ಮಿತಾ ಪುಟ್ಯೆರ್. ದಿನ ದಿನ ಬೆಂದಿನವು ದಿನ ದಿನತ ಖರ್ಚಿಗ್ ಸರಿ ಆಪಿನಂಚಿನ ಆರ್ಥಿಕ ಪರಿಸ್ಥಿತಿ ಆಂಡ ಮಲೇಶಿಯಾ ಪಂದ್ಯಾಟಡ್ ಪಾಲ್ ಪಡೆಪಿನಂಚಿನ ಯಶ್ಮಿತಾನ ಮಲ್ಲ ಕನೊಕು ಸರಕಾರ ಸಹಾಯ ಮಲ್ತ್ಂಡ್. ಮಲೇಶಿಯಾದ ಪ್ರವಾಸದ ಮಲ್ಲ ಮೊತ್ತದ ಖರ್ಚಿನ್ ಪರಿಶಿಷ್ಟ ವರ್ಗ ವಿಭಾಗೊರ್ದ್ ಸರಕಾರ ಮಂಜೂರು ಮಲ್ತ್ ದ್ ಮೆರೆನ ಸಾಧನೆಗ್ ಬೆರಿ ಸಹಾಯ ಕೊರ್ಂಡ್.

ವಿದ್ಯಾಭ್ಯಾಸ

ಯಶ್ಮಿತಾ ಬೆಳ್ಳೂರು ಮೆರೆನ ಪ್ರಾಥಮಿಕ ವಿದ್ಯಾಭ್ಯಾಸನು ಎ. ಎಲ್. ಪಿ. ಶಾಲೆ ಬೆಳಿಂಜ ಬೊಕ್ಕ ಹೈಸ್ಕೂಲ್ ವಿದ್ಯಾಭ್ಯಾಸ ಶ್ರೀ ಅನ್ನಪೂರ್ಣೇಶ್ವರಿ ಶಾಲೆ ಅಗಲ್ಪಾಡಿಡ್ ಮಲ್ತೆರ್. ದೈಹಿಕ ಶಿಕ್ಷಣ ಶಿಕ್ಷಕೆರಾಯಿನ ಶಶಿಕಾಂತ ಬಲ್ಲಾಲ್ ಯಶ್ಮಿತಾನ ಕ್ರೀಡಾಸಕ್ತಿನ್ ಪೊಲಬು ಮನ್ತ್ ದ್ ತರಬೇತಿ ಕೊರ್ಪುನೆದೊಟ್ಟುಗು ಸಲಹೆ, ಪ್ರೋತ್ಸಾಹ ಕೊರ್ದು ಮಾರ್ಗದರ್ಶನ ಮಲ್ತೆರ್.

ಸಾಧನೆ

ಮಲೇಶಿಯಾಡ್ ನಡತಿನ ಪೊಂಜೊವುಲೆನ ತ್ರೊ ಬಾಲ್ ಪಂಥೊಡು ಪಾಕಿಸ್ತಾನದ ಕೂಟೊನು ಸೋಪಾದ್ ಭಾರತದ ವಿಜಯ ಪತಾಕೆನ್ ದೆರ್ತ್ ಪತ್ತಿನ ತುಳುವಪ್ಪೆನ ಮಗಳ್ ಗಡಿನಾಡ ಪ್ರತಿಭೆ ಯಶ್ಮಿತಾ ಬೆಳ್ಳೂರು.ವಿದ್ಯಾಭ್ಯಾಸದೊಟ್ಟುಗು ಕ್ರೀಡಾಭ್ಯಾಸನು ಮಲ್ತ್‌ದ್ ವಿದ್ಯಾರ್ಥಿ ಜೀವನಡೆ ಶಾಲಾ ಕ್ರೀಡಾಕೂಟದ ನಾಯಕಿಯಾದ್ ಮಸ್ತ್ ಪ್ರಶಸ್ತಿನ್ ಪಡೆಯೊಂದು ತನ್ನ ಕಿನ್ಯ ಪ್ರಾಯೊಡೆ ಭಾರತ ಕೂಟೊಡು ಸೇರ್ದ್ ಅಂತರಾಷ್ಟೀಯ ಮಟ್ಟೊಡು ಗೊಬ್ಬುದು ಭಾರತೊಗು ಕೀರ್ತಿ ಕನತಿನಾರ್ ಗಡಿನಾಡ್ ದ ಪೆರ್ಮೆದ ಪೊಣ್ಣು ಮಗಳ್ ಯಶ್ಮಿತಾ

ಆಸಕ್ತಿ

ಯಶ್ಮಿತ ಕ್ರೀಡಾಸಕ್ತಿದೊಟ್ಟುಗು ಕಥೆ ಕವಿತೆ ಬರೆಪುನಂಚಿನ ಆಸಕ್ತಿ ಇತ್ತಿನಂಚಿನ ಬಹುಮುಖ ಪ್ರತಿಭೆ. ಎಸ್. ಎಸ್. ಎಲ್. ಸಿ. ಪರೀಕ್ಷೆಡ್ ಶೇಕಡಾ ೮೫% ಅಂಕ ಪಡೆದ್ ಆಟೊಡು ಮಾತ್ರತ್ತ್ ಪಾಠೊಡುಲ ಪ್ರತಿಭಾವಂತೆ ಪನ್ಪುನೆನ್ ತೋಜ್ಪಾದ್ ಕೊರ್ತೆರ್.