ಶ್ರೀ ಕ್ಷೇತ್ರ ಪಣೋಲಿಬೈಲ್

ಶ್ರೀ ಕ್ಷೇತ್ರ ಪಣೋಲಿಬೈಲ್  ದಕ್ಷಿಣ ಕನ್ನಡ ಜಿಲ್ಲೆದ ಬಂಟ್ವಾಳ ತಾಲೂಕುದ, ಸಜೀಪ ಮೂಡ ಗ್ರಾಮಡಿಪ್ಪುನ ದೈವಸ್ಥಾನ. ಮುಲ್ಪ ತುಳುನಾಡ್ದ ದೈವ ಕಲ್ಲುರ್ಟಿ ಕಲ್ಕುಡೆರೆನ್ ಆರಾಧನೆ ಮಲ್ಪುವೆರ್. ಉಂದು ಬಿ.ಸಿ.ರೋಡ್ ಕರಿದ್ ಪಾಣೆಮಂಗಳೂರು (ಪಾಣೇರ್)  ಮೆಲ್ಕಾರ್‌ಡ್ದ್ ಬಲತ ಮೈಕ್ ಮಾರ್ನಬೈಲ್‌ಡ್ದ್ ಎಡತ್ತ್‌ಗ್ 4 ಕಿ.ಮೀ. ದೂರೊಡು  ಇಪ್ಪುನ ತುಳುನಾಡ್‌ದ  ಬಾರೀ ಕಾರ್ನಿಕೊದ ಜಾಗೆ. ಅಂಚನೇ  ಪಟ್ಟೆ ಸೀರೆ ಪರಕೆ, ಅಗೆಲ್,  ಕೋಲ,  ಮಲ್ಲಿಗೆ ಪೂ, ಬೊಳ್ಳಿ ಬಂಗಾರ ಇಂಚಿನ ಮಾತಾ ಪರಕೆ ಬೂರುನ ಕಲ್ಲುರ್ಟಿ ಕಲ್ಕುಡ ನ್ಂಬುನಕ್‍ಲೆಗ್ ಇಂಬು ಕೊರ್ದು ಕಾಪುನ ದೈವೊಲು.

ಪುದರ್ದ ಪೊಲಬು

ಪಣೋಲಿಬೈಲ್ ಪನ್ಪುನ ಪುದರ್ದ ಪಿರವುದ ಇತಿಹಾಸೊನು ತುಳಿಪುನಗ ಆ ಜಾಗೆಡ್   ದಿಂಜ ಪನೆತ್ತ  ಮರ ಇತ್ತ್ಂದ್ಂದ್ ತೆರಿದ್ ಬರ್ಪುಂಡು.  ಕಾಲ ಸಂದ್ ಲೆಕೊ ಉಂದುವೆ ಪುದರ್ ಊರುಗಾಂಡ್. ಪನೆತ್ತ ಮರ  ೬೦ ವರ್ಸೊಗೊರ ಪೂ ಬುಡ್ಪುಂಡು. ಪೂ ಬುಡಿ ಬೊಕ್ಕ ಅವು ಸಯಿಪುಂಡು. ಈ ಮರ ಅನಿಸ್ಟ ಪನ್ಪುನ ಕುರುಡು ನಂಬಿಕೆ ಇತ್ತ್ನೆದ್ದಾವರ ಅಯಿಕ್ ಪೂಜೆ ಮಲ್ತ್ ದ್ ಅಯಿನ್ ಕಡ್ಪೊಂದಿತ್ತೆರ್. ಈ  ಜಾಗೆಡ್ ಇಂಚ ಪನೆತ್ತ ಮರಕುಲೆನ್ ಕಡ್ತ್ ದ್ ಮರಲಾ, ಕಾಡ್ ಲಾ ಕಮ್ಮಿ ಆಂಡ್.  ಅಂಚಿನ ಜಾಗೆಗ್  ಕಲ್ಲುರ್ಟಿ ಬತ್ತ್ ಪೊಗ್ಗುನೆದ್ದ್ ಬೊಕ್ಕ ಅಯಿಕ್    ಪಣೋಲಿಬೈಲ್ ಕ್ಷೇತ್ರ ಪಂಡ್ದ್ ಪುದರಾಂಡ್. ಈ ಪುದರ್ ಲೆಪ್ಪುನಗೊ ಬಾರೀ ಸತ್ಯೊದ ಗೋಚರ ಆದ್ ನಂಬುಗೆದ ಜಗೆ ಆತ್ಂಡ್.  

ಇತಿಹಾಸೊ

೪೦೦ ವರ್ಸೊದ ಪಿರವುಗು ಉಬಾರ್ ದ ಮಂತ್ರವಾದಿ ವೈಲಾಯರ ಇಲ್ಲದ ದೈವ ಆದ್, ಇಲ್ಲ್ ಬೆಳಗಯಿನ ಕಲ್ಲುರ್ಟಿ-ಕಲ್ಕುಡೆ ದೈವೊಲು ಅಯಿದ್ ಬೊಕ್ಕ ಕಲ್ಲೇಗ, ನೇರಳಕಟ್ಟೆ, ಕಡಂಬು, ಪೊಳತ್ತೂರು ಅಯಿದ್ ಬೊಕ್ಕ ಪಣೋಲಿಬೈಲ್ ಡ್ ನೆಲೆ ಆಯೆರ್. ಆ ಜಾಗೆಡ್ ಪಗೆಲ್ಡ್ ಅಗೆಲ್ ಸೇವೆ, ರಾತ್ರೆಡ್ ಬೂತೊದ ಕೋಲ ನಡಪುಂಡು. ಸೇವೆ ಪಡೆಯಿನ ದೈವೊಲು ಭಕ್ತೆರೆನ್ ಕಾತೊಂದು ಬತ್ತದೆರ್. ಈ ದೈವ ಸಜಿಪ ಮಾಗಣೆಗೆ ಸುರುಕು ಪೊಗ್ಗುನಗ,  ಈ ಜಾಗೆದ  ಪ್ರಧಾನ ದೈವ ಆದ್ ಮಾಗಣೆದ  ದೈವವಾಯಿನ  ನಾಲ್ಕೈತ್ತಾಯ, ನುಡಿಯೇಳು ದೈಯಂಗುಳ, ಉಲ್ಲಾಲ್ದಿ ಅಮ್ಮ ಇಂಚ ಬೇತೆ ದೈವೊಲುಲಾ ಇತ್ತೆರ್.  

ಈ ದೈವೊಲೆನ  ಅಪ್ಪಣೆ ಪಡೆಯಿನ ಕತೆ ಬಾರಿ ಪೊರ್ಲು. ಮಿತ್ತ ಮಜಲ ಜಾಗಡ್ ನಡಿಯೇಳು ದೈಯಂಗುಲು ದೈವೊಗು  ನೇಮ ಆವೊಂದಿಪ್ಪುನಗ , ನಡಿಯೇಳು ದೈಯೊಂಗುಲು ದೈವೊದ ಬರಿಟ್ ನಾಲ್ಕೆತ್ತಾಯ ದೈವೊದ  ದರ್ಶನ ಪಾತ್ರಿನ  ದರ್ಸೊನೊಡು ಇಪ್ಪುನಗ ಕಲ್ಲುರ್ಟಿ ಮಿತ್ತ ಮಜಲ್ ಗ್  ಪೊಗ್ಗುವಲ್. ಎಂಕ್ ಈ  ಮಾಗಣೆಡ್  ನೆಲೆ  ಆವೆರೆ  ಜಾಗ ಬೋಡು ಪಂದ್,  ಮಾಗಣೆದ  ಮೂಲ್ಯನ ಮೈಟ್ ಬತ್ತ್ ದ್ ಕಲ್ಲುರ್ಟಿ ದೈವೊ  ದರಿತ್ತ್ ದ್ ಪನ್ಪಲ್. ಅಲ್ಪದ  ಗರ್ಕಾರೆ ಪನ್ಲೆಕೊ ದರಿತ್ ನ ಮಾನ್ಯ ನ್ ಮೈಮಿತ್ತ್  ಕೈ ಪಾಡ್ದ್ ಪಿದಾಯಿ ನೂಕುವೆರ್. ಅಪಗ ಕಲ್ಲುರ್ಟಿ ದೈವೊಗು ಕೋಪ ಬತ್ತ್ ದ್ ಎನ್ನ ಶಕ್ತಿನ್ ತೂಪಾಬೆ ಪಂದ್ ದೈವಂಗುಳ ದೈವದ ನೇಮದ ಸಿರಿಮುಡಿಕ್  ಸೂ ಪಾಡ್ಬಲ್, ಅಂಚನೆ ಪಾಡಿ ಸೂ ತೆಕ್ಕಾವಲ್.  ಅಯಿದ್ ಬೊಕ್ಕ ಸಜಿಪ ಮಾಗಣೆದ  ದೈವೊಲುಲಾ  ಕಲ್ಲುರ್ಟಿಗಲಾ ರಾಜಿ ಆದ್ ಅಲ್ಪನೆ ಇತ್ತ್ ನ ಕಲ್ಲ್ ಡ್ ನೆಲೆ ಆಪಲ್.

ಅಂಚ  ಕಲ್ಲ್ ಡ್ ನೆಲೆ ಆಯಿನ ಕಲ್ಲುರ್ಟಿ ನ್  ಬರ್ಕೆ ಶೆಟ್ಟಿ ವಂಸೊದಕುಲೆನ್ ಕೂಡೊನುವಲ್. ಅಕ್ಲ್ ಆ  ಕಲ್ಲನ್  ಗುಡ್ಡ ಮೂಲ್ಯ ಪನ್ಪಿನಾರೆಡ ತುಂಬಾವೊಂದು ಪೋನಗ ಇತ್ತೆ  ನೆಲೆಯಾಯಿನ  ಪಣೋಲಿಬೈಲ್ ಗ್ ಎತ್ತ್ನಗ ಗುಡ್ಡ ಮೂಲ್ಯರೆಗ್ ಬಚ್ಚಿದ್ ಕಲ್ಲ್ ನ್ ಅಲ್ಪ ದೀಪೆರ್. ಅಂಚ ದೀನ ಕಲ್ಲ್ ನ್ ಪಿರ ದೆರ್ಪೆರಾಯಿಜಿ. ಕಲ್ಲ್ ಪಂದಾಯೆರೆ ಆಯಿಜಿ. ಆನಿ ಅಂಗಾರೆದಾನಿ ಕಲ್ಲುರ್ಟಿ ಕಲ್ಕುಡೆರ್ ಅಲ್ಪ ನೆಲೆ ಆಯೆರ್. ಆನಿದ ದಿನೊನೆ ದೈವೊದ ಕೋಲಲಾ ನಡಪುಂಡು. ಪೇರ್ ಪರ್ಯಲ್. ತನ್ನ ಕಟ್ಟುಕಟ್ಟಳೆನ್ ಪಂಡಲ್. ಎನ್ನ ಸೇವೆನ್ ಗುಡ್ಡ ಮೂಲ್ಯರ್ , ಆರ್ನ ಸಂತಾನೊದಕುಲು ಮಲ್ಪೊಡು ಪಂದ್, ಅಗೆಲ್ ಬಲಸುನೆ, ಅಗೇಲ್ದ ಅಡಿಗೆ ಅಕುಲು ಮಲ್ಪೊಡು ಪನ್ಪಲ್. ಇತ್ತೆಲ ಭಂಡಾರೊ ಬನ್ನಗ ಗುಡ್ಡ ಮೂಲ್ಯರೆನ ಇಲ್ಲ್ ದ ಎದುರುದ ಭಂಡಾರದ ಇಲ್ಲದ್ದ್ ಆ ಜಾಗೆಗ್ ಬರ್ಪುನ ಸಂಪ್ರದಾಯೊ ಉಂಡು. ಈ ಜಾಗೆದ ದೈವದ ಚಾಕಿರಿನ್ ಸಾಲ್ಯಾನ್ ಗೋತ್ರದ ಗುಡ್ಡ ಮೂಲ್ಯರೆನ ಸಂತಾನೊದಕುಲು ಮಲ್ಪುವೆರ್. ಅಕ್ಲೆಗ್ ಸೂತಕೊ ಬತ್ತಂಡ  ಕಲ್ಲುರ್ಟಿ ದೈವೊ ದ ಸೇವೆ ಉಂತಿಯೆರೆ ಬಲ್ಲಿ ಪಂದ್ ಗುಡ್ಡ ಮೂಲ್ಯರೆನ್  ಸಂಬಂದೊದ  ಗುಜರನ್ ಗೋತ್ರದಕುಲು ಮಲ್ಪೊಡು ಪಂದ್  ದೈವೊ ಅಪ್ಪಣೆ  ಕೊರ್ಪಲ್. ಈ ದೈವೊಗು  ಈ ಜಾಗದಲ್ಲಿ ಈ ರಡ್ಡ್  ಗೋತ್ರದಕ್ಲೆನ ಕೈದ್ದ್  ಪೂಜೆ ಪೇರ್ ದೆತೊನುನು.  ೧೮೮೦ ಡು ಗುಡ್ಡ ಮೂಲ್ಯರ್ ನ  ವಂಸೊದ ಆಸ್ತಿ ವಾರ್ ಮನ್ಪುನಗ , ಅಯಿನ್ ಪತ್ತ್ ಮುಡಿ ಕೃಷ್ಣರಾಯೆರ್ ಪಡೆಯೆರ್. ಅಯಿನ್ ಆರ್  ೧೮೮೮ ಡು  ನಂದಾವರ ವೆಂಕಟೇಶ ನಾಯಕೆರೆಗ್ ಮಾರಿಯೆರ್.  ೧೯೩೧ ಟ್ ಈ ಜಾಗೆನ್ ಕಾಂತಾಡಿಗುತ್ತು ಸಂಕಮ್ಮ ಶೆಡ್ತಿಗ್  ಮಾರಿಯೆರ್. .

ಹಿಂದೂ - ಮುಸ್ಲಿಂ ಸಾಮರಸ್ಯೊದ ಕತೆ

೧೯೫೬ ಟ್  ಮಂಚಿ ಗ್ರಾಮೊದ  ಅಹಮ್ಮದ್ ಬ್ಯಾರಿ   ಪಣೋಲಿಬೈಲಿದ ಜಾಗೆ ಪಡೆಯೆರ್.  ಅಹಮ್ಮದ್ ಬ್ಯಾರಿ ಈ ಜಾಗೆನ್ ದೆತೊನಿ ಬೊಕ್ಕ, ಕಲ್ಲುರ್ಟಿ ದೈವೊಗು  ಅಗೇಲು ಸೇವೆ ಮನ್ಪೆರೆ, ಅಗೇಲಿಗ್ ನುಪ್ಪು, ಕೋರಿದ ಕಜಿಪು ಅಡಿಯೆರೆ ಮೂಲ್ಯರ್ ನಕುಲು ಬೆದ್ರ್ ಕಡ್ಫುವೆರ್. ಅಯಿನ್ ಅಕುಲು ಕನಕಾದ್ ಗಲಸೊಂದಿತ್ತೆರ್. ಅಹಮ್ಮದ್ ಬ್ಯಾರಿ ನನ್ ಮಿತ್ತ್ ಗ್ ಎನ್ನ ಜಾಗೆಡ್ ಬೆದ್ರ್ ಕಡ್ಪೆರೆ ಬಲ್ಲಿ ಪಂದ್ ಪನ್ಪೆರ್. ಗುಡ್ಡ ಮೂಲ್ಯ ರೆನ ಸಂತಾನೊದಕುಲು  ಕಲ್ಲುರ್ಟಿ ದೈವೊ ಡ ದೂರು ಕೊರ್ಪೆರ್. ಅಯಿದ್ ಬೊಕ್ಕ ಅಹಮ್ಮದ್ ಬ್ಯಾರಿಯು ಕಟ್ಟ್ ನ  ಮಲ್ಲ ಮಾಲಿಗೆದ ಕಟ್ಟೊಣ ನೆಲಕ್ಕ್ ಬೂರುಂಡು. ಆರೆಗ್ ಬೇರೊಡುಲಾ ಬಾರಿ ನಸ್ಟೊ ಆಂಡ್. ಆರ್ ಬಾರೀ ಬಂಗಡ್ ಬೂರುವೆರ್. ಅಯೆದ್ ಬೊಕ್ಕ  ತಾಂಬೂಲ ಪ್ರಶ್ನೆಡ್  ದೈವದ ತೊಂದರೆ ಪಂದ್ ಆರೆಗ್ ತೋಜೆದ್ದ್ ಬರ್ಪುಂಡು. ಅಯಿದ್ದ್ ಬೊಕ್ಕ  ದೈವೊದ ಪುದರ್ಡ್   ೯  ಸೆನ್ಸ್ ಜಾಗೆನ್  ಸರ್ವೆನಂಬ್ರ 224-2 ಟ್   ಕಲ್ಲುರ್ಟಿ ದೈವೊದ ಪುದರ್ಡ್ ದಾನೊ ಕೊರ್ಪೆರ್.  ದೈವೊದ  ಸೇವೆನ್  ಗುಡ್ಡ ಮೂಲ್ಯರೆನ ಸಂತಾನದಕುಲು ಮಲ್ತಿಲೆಕೊನೆ,  ಕ್ಷೇತ್ರಡು ದೈವದ ಮಧು (ಅರಿಕೆ) ಪನ್ಪಿನ ಕೆಲಸೊನು ಸಜೀಪಮೂಡದ ಬರ್ಕೆ ಶೆಟ್ಟಿ ವಂಶದಕುಲು ಪನ್ಪುನ ಸಂಪ್ರದಾಯ ಪಿರಾಕ್ ದ್ದ್ ನಡತ್ತ್ ಬತ್ತ್ ದ್ಂಡು.

ಕಾರ್ಣಿಕ

ಪಣೋಲಿಬೈಲ್ ಕಲ್ಲುರ್ಟಿ ಕ್ಷೇತ್ರ ತುಳುನಾಡ್ ದ ಬಾರೀ ಶ್ರೀಮಂತ ಕ್ಷೇತ್ರ. ಆತ್ಬ ಮಾತ್ರೆ ಅತ್ತ್ ಮುಲ್ಪ ಪಾಪೊದಾಯೆ, ಮಲ್ಲಯೆ ಪನ್ಪಿ ಬೇದೊ ಇದ್ಯಾಂದೆ ಮಾತೆರೆಗ್ ಲಾ , ಕೈ-ಕಂಜಿಲೆಗ್ ಲಾ, ಪೊನ್ನು ಸಂಸಾರೊಗುಲಾ, ಕಾಪುನ ದೈವೊ ಗು ವಾರೊಡಿ ೫ ದಿನೊ ಇರ್ವೊ ಪರಕೆದ ಕೋಲ, ವಾರೊಡು ಮೂಜಿ ದಿನೊ , ದಿನೊಕ್ಕು ನಾಲ್ ಸ್ಸ್ರೊದ್ದ್ಲಾ ಮಿತ್ತ್ ಅಗೇಲ್ ನಡಪುಂಡು. ಮದಿಮೆ, ಬರವು, ಕಷ್ಟಕಾರ್ಪಣ್ಯ, ಕಂಡ್ ದ್ ಪೋಪಿನೆಕ್, ಉದ್ಯೊಗ, ಪ್ರೆತೊದ ಬಾದೆ, ಇಂಚ ಪೂರ ದುಸ್ಟೊ ಶಕ್ತಿಲೆನ್ ದೂರೊ ಮಲ್ಪುನ ಕಜ್ಜಲಾ ದೈವೊದ ನೇಮೊಡು ಆಪುಂಡೂ. ಈ ಜಾಗಡ್ ಪಟ್ಟ ಪರಕೆ ಪಂಡ್ ದ್ ಜನೊಕುಲು ಕಷ್ಟ ಕಳೆಪೆರ್. . ಈ ಜಾಗೆಗ್ ಸುಳ್ಯ , ಪುತ್ತೂರು , ಬೆಳ್ತಂಗಡಿ , ಬಂಟ್ವಾಳ , ಸುಬ್ರಹ್ಮಣ್ಯ, ನೆಲ್ಯಾಡಿ, ಮಡಿಕೇರಿ, ಕುಡ್ಲ, ಮಂಜೇಶ್ವರ , ಕಾಸರಗೋಡ್, ಉಡುಪಿ , ಕುಂದಾಪುರ , ಕಾರ್ಕಳ, ಮೂಡುಬಿದಿರೆ ಕೊಡಗು , ಇಂಚ ಬೇತೆ ಬೇತೆ ಊರುದ್ದು ಜನೊ ಬರ್ಪೆರ್. ಆಸ್ತಿ ವಿಚಾರೊ, ತಕರಾರ್, ಕೋರ್ಟ್ ವಿಚಾರೊ, ಇಂಚ ನಾನಾ ಕಸ್ಟೊಲೆಗ್ ಪರಕೆ ಪಂದ್ ಕಾಣಿಕೆ, ಅಗೇಲ್, ಕೋಲ, ಬೊಳ್ಳಿ, ಬಂಗಾರದ ಸೇವೆನ್ ಕೊರ್ಪೆರ್.

ಕಲ್ಲುರ್ಟಿ ಕೋಲ

ಕಲ್ಲುರ್ಟಿ ದೈವೊಗು ಸಜೀಪ ನಡುಟು ಕುಂಞತ್ ಬೈಲು, ಸಜೀಪ ಪಡುಟು ಇಡಿಪಡ್ಪು, ಕುಂಞತ್ ಬೈಲ್ ಡ್ ವರ್ಸೊಗೊಂಜಿ ಸರ್ತಿ ಕೋಲ ಆನಗ  ಪಣೋಲಿಬೈಲಿದ್ದ್  ದೈವೊದ  ಪದೇಯಿ ಬಂಗಾರ ಬತ್ತದ್ ಅಯಿಟೆ  ಕೋಲ ಆಪುಜಿ. ಅವು ಅತ್ತಂದೆ ಸಜೀಪ ಮಾಗಣೆದ  ದೈವೊಲಾಯಿನ  ನಾಲ್ಕೈತ್ತಾಯ, ನಡಿಯೇಳ್ ದೈಯಂಗುಲ ಉಲ್ಲಾಲ್ದಿಗ್  ನೇಮ ಆನಗ,  ನಂದಾವರ ವಿನಾಯಕ ಕ್ಷೇತ್ರಡು  ಜಾತ್ರೆ ಆನಗ  ಪಣೋಲಿಬೈಲ್ಡ್  ಅಗೆಲ್, ಕೋಲ ಆಪುನ ಕ್ರಮೊ ಇದ್ದಿ.  ಆಟಿ ತಿಂಗಳೊಡು  ಕೋಲ ಇದ್ದಿ. ಸುಬ್ರಮಣ್ಯ ಷಷ್ಠಿದಾನಿಲಾ  ಕೋಲ ಇದ್ದಿ. ಅಗೇಲ್ , ಪರಕೆ ಉಪ್ಪುಂಡು. ವಾರೊಡು ಅಗೇಲ್ ನಡಪುನ ದಿನ ಅಂಗಾರೆ, ಶುಕ್ರವಾರ, ಐತಾರ,  ವಾರೊಡು  5 ದಿನ  (ಶನಿವಾರ, ಸೋಮವಾರ ಬುಡ್ದು) ಕೋಲ ನಡಪುಂಡು.  ಕಾಂಡೆ 10.30 ತ ಉಳಾಯಿ ಅಗೇಲ್ ಪರಕೆ ಗ್ ಬೋಡಾಪುನ ೧ ಕೋರಿ, ಒಂಜಿ ಸೇರ್ ಅರಿ,೩ ತುಂಡು ಬಾರೆದ ಇರೆ. ೧ ತಾರಾಯಿ, ಅಗೇಲಿದ  ಸಾಮಾನ್ ಗ್ ಒಂಜೆಕ್ ೧೫ ರೂಪಾಯಿ ಕೊರೊಡು.  ಜೋಡಿ ಅಗೇಲಿಗ್ ೨ ಕೋರಿ, ೨ ಸೇರ್ ಅರಿ, ೫ ತುಂಡು ಬಾರೆದ ಇರೆ, ೨  ತಾರಾಯಿ,   ಅಗೇಲಿದ  ಸಾಮಾನ್ ಗ್ ೩೦ ರೂಪಾಯಿ ಕೊರೊಡು.

ಪಣೋಲಿಬೈಲ್ ಕ್ಷೇತ್ರದ ಲೆಕ್ಕೊಡು ಇಡೀ ಮಾಗಣೆದ  ಸಜೀಪ ಮುನ್ನೂರು, ಸಜೀಪ ಮೂಡ, ಸಜೀಪ ನಡುಟು ಬಾರಿ ಎಡ್ಡೆ ಕೆಲಸ ಆತ್ಂಡ್. ನಂದಾವರ ಶ್ರೀ ವಿನಾಯಕ ಶಂಕರ ನಾರಾಯಣ ಕ್ಷೇತ್ರಡುಲಾ  ಜೀರ್ಣಾಭಿವೃದ್ಧಿ ಕೆಲಸ ಅಂಚನೆ,   ನಂದಾವರ ಕ್ಷೇತ್ರಗು  ಮಾರ್ನಬೈಲಿಡ್  ಮಹಾದ್ವಾರ ಆತ್ಂಡ್. ಸಜೀಪದ ನಾಲ್ಕೈತ್ತಾಯ ದೈವಸ್ಥಾನೊದ  ಪುನರ್ ನವೀಕರಣದ ಗರ್ಭಗುಡಿನ್ ಕಟ್ಟೀಯೆರೆ ದುಡ್ಡು ಸಹಾಯೊ, ಮಿತ್ತಮಜಲ್ ಕ್ಷೇತ್ರದ  ನಡಿಯೇಳ್ ದೈಯಂಗುಲ ದೈವದ ದೈವಸ್ಥಾನೊದ ನವೀಕರಣಗು, ಬೊಕ್ಕ ಸಂಕೇಶೊಡು ಉಪ್ಪುನ ಉಲ್ಲಾಲ್ದಿ ದೈವಸ್ಥಾನಗುಲಾ ಪಣೋಲಿಬೈಲ್ ದ  ಕ್ಷೇತ್ರದ ಲೆಕ್ಕೊಡು ದುಡ್ಡು ಸಹಾಯ ಮಲ್ತ್ ದೆರ್. ಉಂದು ಮಾತಾ  ನಡಿಯೇಳ್ ದೈಯಂಗುಲ ದೈವೊದ  ನೇಮ ಬೊಕ್ಕ  ನಾಲ್ಕೈತ್ತಾಯ ದೈವೊದ  ಮಾಣಿಯಚ್ಚಿದ ಕಾಲೊಡು ಪಣೋಲಿಬೈಲ್  ಕಲ್ಲುರ್ಟಿ ದೈವೊದೊಟ್ಟುಗು ಇಪ್ಪುನ ೪೦೦ ವರ್ಸೊದ ಕಟ್ಟು ಕಟ್ಟಲೆ ಪ್ರಕಾರ ನಡತ್ಂಡ್.

ಅಭಿವೃದ್ಧಿ ಕಾರ್ಯ

ಇಂಚಿಪ್ಪ ಭಕ್ತೆರೆನ ಸಹ್ಹಯೋಡು ಮಲ್ಲ ಮಹದ್ವಾರ ನಿರ್ಮಾಣ ಆತ್ಂಡ್.

ಸಾಮರಸ್ಯ ಕ್ಷೇತ್ರ

ಈ ಜಾಗೆಗ್ ಇಂಚಿಪ್ಪ   ಮುಸ್ಲೀಂ ಬೊಕ್ಕ  ಕ್ರಿಶ್ಚಿಯನ್ ಧರ್ಮದಕುಲುಲಾ ಪರಕೆ ಪನ್ಪೆರ್.