ಸೇಮೆದಡ್ಯೆ

ಸೇಮೆದಡ್ಯೆ(ನೂಕಡ್ಯೆ) ಉಂದು ಒಂಜಿ ಬಗೆತ್ತ ತುಳುವೆರೆ ತೆನಸ್. ಉಂದೆಕ್ಕ್ ನೂಕಡ್ಯೆ ಪಂದ್ಲಾ ಪನ್ಪೆರ್. ಪಿರಾಕ್ ಡ್ ಸೇಮೆದಡ್ಯೆ ನ್ ಏರಾಂಡಲ ಬಿನ್ನೆರ್ ಬತ್ತ್ಂಡ ಇಜಿಂಡ ಅಸ್ಟೆಮಿ, ಮಸುಲುಡ್ಕೆ (ಮೊಸರು ಕುಡಿಕೆ)ದಂಚಿನ ಪರ್ಬೊದಪಗ ಮಲ್ತೊಂದಿತ್ತೆರ್. ಇತ್ತೆಲಾ ಪರ್ಬದಪಗ ಈ ಅಡ್ಯೆನ್ ಮಲ್ಪುವೆರ್. ಉಂದೆನ್ ತಾರಾಯಿದ ಪೇರ್, ಕೋರಿದ ಕಜಿಪು, ಪರ್ಂದ್ ದ ರಸಾಯನ, ಸಾಂಬಾರ್, ಮಾಸದ ಕಜಿಪುದೊಟ್ಟುಗು ತಿನ್ಪೆರ್. ಅವ್ ಅತ್ತಂದೆ ಸೇಮೆದಡ್ಯೆದ ಪೂಂಬೆನ್ ದೊಂಬುಗ್ ನುಂಗಾದ್ ಅವೆತ್ತ ಉಪ್ಪಿಟ್ಟ್ ಲಾ ಮಲ್ಪುವೆರ್.

ಸೇಮೆದ ಅಡ್ಯೆ

ಸೇಮೆದ ಅಡ್ಯೆ
ಬೇತೆ ಪುದರ್	ಸೇಮೆದಡ್ಯೆ ,ಸೇಮಾಯಿಡ್ಯೆ, ನೂಕಡ್ಯೆ
ಬಗೆ	ತೆನಸ್
ಮೂಲದ ಜಾಗೆ	ಭಾರತ
ಪ್ರದೇಸೊ	ಕುಡ್ಲ , ಉಡುಪಿ
ಬೊಡಾಯಿನ ಸಾಮಾನ್	ಸೇಮಿಗೆ

ಬೋಡಾಯಿನ ಸಾಮಾಗ್ರಿಲು

• ತಾರಾಯಿದ ಪೂ .
• ಬೆಲ್ಲ.
• ಬೊಲಂತೆ /ಉರ್ಪೆಲ್ ಅರಿ.
• ಸೇಮೆದ ಮನೆ.

ಮಲ್ಪುನ ವಿದಾನೊ

ಸೇಮೆ ಮಲ್ಪುನ ವಿದಾನೊ

ದುಂಬುನಾನಿ ಬೊದುಲ್ಪಾದಿನ ಅರಿನ್ ಕಡೆದ್ ,ಬಂದನ್ ದೆತ್ ದ್ , ರುಚಿಗ್ ಬೋಡಾಯ್ನಾತ್ ಉಪ್ಪು ಪಾರ್ದ್ ಅವೆನ್ ಬಾಣಲೆಡ್ ಬೆಚ್ಚ ಮಲ್ತ್ದ್ ಮಲ್ಲ ಮಲ್ಲ ಉಂಡೆ ಮಲ್ಪೊಡು . ಮಲ್ತಿನ ಉಂಡೆನ್ ತೊಂದುರುಡ್ ಬೆಯ್ಪಾದ್ ಬೆಯೋಂದು ಬತ್ತಿ ಲೆಕ ಬೆಚ್ಚ ಉಂಡೆನ್ ಪರಸೆಗ್ ಪಾರ್ದ್ ತಿರಗಣೆನ್ ತಿರ್ಗಾವೊಡು. ಇಂಚ ತಿರ್ಗಾನಗ ಪರಸೆಡ್ ಅಡ್ಯೆ ನೂಲುದ ಲೆಕ ಜಪ್ಪುಂಡ್. ಈ ಅಡ್ಯೆ ಮಲ್ಪರೆ ೨ ಜನ ಬೋಡಾಪುಂಡ್ . ಒಂಜಿ ಜನ ಮಣೆ ಒತ್ತರೆ ನನೊರಿ ತಿರ್ತ್ ಜತ್ತಿನ ಅಡ್ಯೆನ್ ದೆಪ್ಪರೆ. ಸೇಮೆದ ಒಂಜಿ ಪ್ಲೇಟ್ ಅಡ್ಯೆಗ್ ಪೂಂಬೆ ಪಂದ್ಲಾ ಪನ್ಪೆರ್ .

ತಾರಾಯಿದ ಪೇರ್ ಮಲ್ಪುನ ವಿದಾನೊ

ಪೆರೆದಿನ ತಾರಾಯಿಗ್ ಚೀಪೆಗ್ ಬೋಡಾಯ್ನಾತ್ ಬೆಲ್ಲ ಪಾರ್ದ್ ಕಡೆದ್ ಅವೆಟ್ಟ್ ಬತ್ತಿನ ಪೇರ್ ನ್ ಅರ್ಪೊಡು. ಇಜಿಂಡ ಕಾಲಿ ತಾರಾಯಿನಕ ಕಡೆದ್ ಪೇರ್ ದೆತ್ ದ್ ಬೊಕ್ಕಲಾ ಬೆಲ್ಲ ಪಾರ್ದ್ ಕಲಡಾವೊಲಿ.

ಬೇತೆ ಬಾಸೆಡ್ ಸೇಮೆದಡ್ಯೆ

• ಕನ್ನಡ - ಒತ್ತು ಶ್ಯಾವಿಗೆ, ಅಕ್ಕಿ ಶ್ಯಾವಿಗೆ.
• ತಮಿಳ್ - ಇಡಿಯಪ್ಪಂ.
• ಇಂಗ್ಲಿಷ್ - ಸ್ಟ್ರಿಂಗ್ ಹಾಪರ್.

ಸೇಮೆದಡ್ಯೆಗ್ ನೂಕಡ್ಯೆ ಪನ್ಪಿನ ಪುದರ್ ಬತ್ತಿನ ವಿಚಾರೊ

ಸೇಮೆದಡ್ಯೆ ಮಲ್ಪೆರೆ ಕಷ್ಟ. ಬತ್ತಿ ಬಿನ್ನೆರ್ ನಾಲೈನ್ ದಿನ ಉಂತ್‌ದ್ ಪೋಪಿನ ಪೊರ್ತುಗು ಈ ಅಡ್ಯೆನ್ ತುಳುನಾಡ್ ದ್ ಮಲ್ಪೆದೆರ್. ದುಂಬುದ ಕಾಲೊಡು ಈ ಅಡ್ಯೆ ಮಲ್ಪುನ ಮಣೆ ಮಾತೆರ್ನ ಇಲ್ಲಡ್ ಇಜ್ಜಾಂಡ್. ಅಪಗದ ಕಾಲೊದ ಸೇಮೆದಡ್ಯೆದ ಮಣೆಲಾ ತಿರ್ಗಾವರೆ ಮಸ್ತ್ ಬಂಗ ದಾಯೆ ಪಂಡ ಅವ್ವು ಮರತ್ತ ಮಣೆ. ಆ ಮಣೆನ್ ಒತ್ತೆರೆ ಉಜ್ಜೆರ್. ಆ ಉಜ್ಜೆರ್‌ನ್ ಊಂದೆರೆ ರಡ್ಡ್ ಕೋಡಿಡ್ ರಡ್ಡ್ ಗಟ್ಟಿ ಜವನೆರ್ ಬೋಡಿತ್ತ್ಂಡ್. ಈ ಅಡ್ಯೆ ಮಲ್ತಿ ಬೊಕ್ಕ ಬತ್ತಿನ ಬಿನ್ನೆರ್ ಜಾಸ್ತಿ ದಿನ ಉಂತುಜೆರ್‌ ಪನ್ಪಿನ ವಾಡಿಕೆ ಇತ್ತ್ಂಡ್. ಅಂಚಾದ್ ಬಿನ್ನೆರೆನ್ ನೂಕುನ ಅಡ್ಯೆ ನೂಕಡ್ಯೆ ಪಂಡ್ ದ್ ಪುದರ್ ಬತ್ತ್ಂಡ್.

ಸೇಮೆದ ಅಡ್ಯೆ ಮಲ್ಪುನೆ ವಿದಾನೊ ವಿಡೀಯೊ ರೂಪೊಡು